Элбрус районда инклюзив билим бериуню амалларын сюзгендиле. Озгъан ыйыкъда Тырныауузда Сабийлени эм жаш тёлюню айнытыу Мокъаланы Магомет атлы арада 2022-2030 жыллада Къабарты-Малкъар Республикада инклюзияны айнытыуну ведомствола аралы планыны бардырылыууна къарагъан ишчи къауумну кенгеши болгъанды.
Анда баш магъаналы соруула сюзюлгендиле. Энчи эс билим берген учреждениялада саулукъларында чекленнген онглары болгъан эм сакъат сабийлени окъууда эм чыгъармачылыкъ жаны бла айныуларында ала тенглеринден артха къалмазча къуралгъан онглагъа бёлюннгенди.
Тюбешиуню Элбрус районну администрациясыны башчысыны биринчи орунбасары Толгъурланы Расул ачханды.
-Инклюзив болумну юсюнден айтханда, ол жаланда билим бериу бла чекленмей, социал тюзлюкню, хар юйюрге къайгъырыуну белгиси болады, -дегенди.
КъМР-ни жарыкъландырыу эм илму министрини орунбасары Екатерина Мисостова уа бу ызда регионну бла муниципалитетни араларында байламлыкъны кючлеп, магъаналы ишлени юсюнден сёлешгенди.
Аталаны бла аналаны бу жумушда тилеклерин бла жарсыуларын Сакъат эм саулукъларында чекленнген онглары болгъан сабийлени ата-аналарыны Битеуроссей организациясыны регион бёлюмюню таматасы Бёзюланы Марина билдиргенди.
Андан ары сёз Элбрус районну Билим бериу управлениясыны таматасы Атаккуланы Нуржаннга берилгенди. Ол, бу жаны бла районну билим берген учрежденияларында керти хал къалай болгъанын ачыкълап, сабийлени бу къауумуна тийишли онгла къуралгъанларын, атала бла анала да ыразы болгъанларын билдиргенди. Къошакъ билим бериуде да башда сагъынылгъан сабийлеге уллу эс бурулгъанын дагъыда бир чертгенди. Билим бериу управленияны районда инклюзив билим бериу жаны бла координатору Ахкёбекланы Жанна сабийлени бу къауумуну саулукъларында энчиликлерини, аны бла байламлы къуралгъан онгланы юсюнден айтханды.
Кенгешни магъаналы кесеги уа инклюзив халда билим бериуню жашауда эркин бардыргъан мектеплени таматаларыны сёлешиулери болгъанды.
Отарланы Керим атлы 1-чи лицейни таматасы Мухамед Лихов, 5-чи номерли гимназияны таматасы Моллаланы Фатима, «Энчиликлери болгъан сабий» араны таматасы Моллаланы Зарета, Элбрус районну Сабийлени эм жаш тёлюню айнытыу Мокъаланы Магомет атлы арасыны таматасы Мисирланы Фарида сынамларыны юслеринден хапарлагъандыла.
Кенгешни ахырында жыйылгъанла бу жаны бла бир оюмгъа келгендиле. Жаланда администрация, устазла эм тюрлю-тюрлю ведомствола бла атала-анала биригип, къауумда ишлеселе, жетишимлеге жетерге боллукълары да чертилгенди.
Быллай тюбешиуню жангы окъуу жылны аллында ётгени да бек магъаналыды. Жай кезиуде билим бериу учрежденияла окъуу жылгъа планларын бла программаларын жарашдыра туруп, жангы амалланы эсге ала, аланы ишлеринде кенг эм эркин хайырланыр онгла излерикдиле.
Темуккуланы Асият.
