Афган урушну, энчи аскер операцияны, башха жер-жерли къаугъаланы ветеранлары жаш адамла бла ишлерге, аланы Ата журтха сюймекликге юйретиу жумушланы къалай бардырыргъа кереклисин биледиле. Бу магъаналы иш «СВО-ну лекторларыны лигасы» республикалы проектни чеклеринде бардырылады, анга 30-гъа жууукъ ветеран къатышады.
Шабат кюн а Жаш тёлюню юйюнде проектни ачылыууна аталгъан жумушла бардырылгъандыла. Анга КъМР-ни Парламентини депутаты, «Афганистанда урушну, жер-жерли къаугъаланы бла СВО-ну ветеранларыны советини» регион бёлюмюню башчысы Тимур Тхагалегов, Жаш тёлюню ишлери жаны бла министерствону бёлюмюню таматасы Ахмед Коготыжев, «Ата журтну къоруулаучулары» фондну башчысыны орунбасары Ахмед Пшихачев, «Боевое братство» жамауат организацияны регион бёлюмюню башчысы Гелястанланы Барисбий къатышхандыла.
Ала шёндюгю заманда СВО-ну, жер-жерли къаугъаланы ветеранлары жаш адамла бла къалай ишлерге кереклисине, къаллай амалла бютюнда хайырлы болгъанларына эмда ёсюп келген тёлюню юйретиу ишни магъанасына кёз къарамларын билдиргендиле.
Кабинетде олтуруп, адам туугъан журтун сюерге, аны айнытыргъа керекди деген праволу актла чыгъарыргъа, бегимле хазырларгъа да болады. Алай жаш адамлагъа ала сейир тюйюлдюле, алагъа ахшы юлгюле керекдиле. Анга Ата журтну къоруулаучуларындан, аланы жигитликлеринден, берген антларына кертиликлеринден юйренирге боллукъду деген оюмну айтхандыла сёлешгендиле.
Ахмед Коготыжев былтыр республикада 2030 жылгъа дери КъМР-де жаш тёлю политиканы стратегиясы, аны жашауда бардырыуну жумушлары да къабыл кёрюлгенлерин эсгертгенди. «Ол артыкъда магъаналы документди. Алай жаш адам аны 27 бетин окъуп, жашауда бардырлыкъды десек, жангылгъан этерикбиз. Алагъа сизнича насийхатчыла керекдиле. Болсада жаш адамла бла ишлеген тынч тюйюлдю. Энчи аскер операциядан энди къайтхан адам кесини оюмларын, кёз къарамын башхалагъа юйрете билмейди. Бу проект а насийхатчылагъа болушур мурат бла къуралгъанды», - дегенди ол.
Тимур Тхагалегов ветеранла Ата журтубузну сейирлерин къоруулау борчларын толтургъанларын, алай аланы болушлукълары энтта изленнгенин айтханды. «Сиз къыралгъа, жамауатха керек боласыз. Халкъларыбызны адетлерин, энчиликлерин, тарыхларын, тёрели хазналарын сакълау иш сизни къолугъуздады»,- деп, ол Ата журтну къоруулай жан бергенлени бир минут шумсуз туруп эсгерирге чакъыргъанды.
Гелястанланы Барисбий а совет къырал чачылгъандан сора ёсюп келген тёлюню юйретиу иш ахырда бардырылмагъанын, аны хатасы уа бюгюн билиннгенин чертгенди. «Къыралыбызгъа къажау болгъанла, ахчагъа алданып, аны сейирлерин сатханла да ма аны ючюн чыкъгъандыла. Биз а Ата журтубузгъа ант бергенбиз. Жаш адамла бла ишлегенде, бирде сабий бла тенг болургъа керекди, дейдиле. Алай, мен акъыл этгенден, ол терсди. Сабийге къыралыбызны аллында жууаплылыгъын ангылатыргъа, келир жашауубуз ол чыгъаргъан оноугъа кёре къураллыгъына юйретирге керекди», - дегенди ол.
Ахмет Пшихачев а энчи аскер операциягъа къатышханла украинлы жаш тёлюню акъылы терсине къалай бурулгъаныны хатасын кёргенлерин чертгенди. «Биз да таматаланы юлгюсюнде ёсгенбиз. Келир тёлюлени ариу юйретиу энди бизни борчубузду»,- дегенди ол.
Сёлешгенле юйретиу ишни бюгюнлюкде къолгъа алмасала, жаш адамларыбызны акъылларына башха ниетле сингдирилликлерини юслеринден да айтхандыла. Анга уа юлгюле бардыла: башха къыралланы энчи органларыны буйрукъларын толтуруп, объектлени чачдыргъан, башха аманлыкъла этген кезиуле бардыла.
Тюбешиуге къатышханла шёндюгю жашла бла къызла алгъын тёлюледен энчи болгъанларын, аны ючюн а ала бла ишлегенде, эслерин айтылгъаннга бурур ючюн, шёндюгю амалланы хайырланыргъа кереклисинде келишгенди. Ол санда презентация, видео материалла хазырлап.
Алай бла эки кюнню ичинде ветеранла проектле къураргъа, школчуланы энчиликлерине, ала бла ушакъла бардырыуну психология жорукъларына юйреннгендиле, мастер-классла бардыргъандыла.
«СВО-ну лекторларыны лигасы» республикалы проект Жаш тёлюню ишлери жаны бла министерствону башламчылыгъы бла къуралгъанды. Аны келечиси Чигирланы Эвелина бизге айтханыча, ол юч бёлюмден къуралады. Биринчиден, теория жаны бла билим аладыла. Ызы бла сентябрьде федерал экспертлени къатышыулары бла уллу форум къураллыкъды. Ючюнчю кесегинде уа мастер-классла боллукъдула.
«Алай бла ала жаш адамланы алларында къалай сёлеширге, ушакъла бардырыргъа кереклисин билликдиле. Ызы бла программада билим алгъанла школлада, колледжледе, вузлада жаш адамла бла тюбешип, Кишиликни дерслерин бардырлыкъдыла, Ата журтха сюймекликге юйретиу ишге къатышырыкъдыла»,- дегенди ол.
Тикаланы Фатима.
Сурат авторнуду.
