ЩIалэгъуалэм я унэм щекIуэкIащ «Откровение» макъамэ усэ пшыхьыр. Ар къызэрагъэпэщащ Урысейм ис лъэпкъхэм я зэкъуэтыныгъэм и илъэсым хыхьэу. Зыщыщ лъэпкъми емылъытауэ, усэбзэр лъэпкъ псомкIи гурыIуэгъуэщ икIи зэкъуэзыгъэувэщ.
- ПсынщIэу зызыужь икIи зызыхъуэж иджырей гъащIэм цIыхум и гумрэ и псэмрэ щыщIэ щэхухэм щIэдэIужыным мыхьэнэшхуэ иIэщ. Апхуэдэущ усэ, макъамэ жыпIэми, гущIагъщIэлъхэр сэтей къызэрыхъур. ПшыхьымкIэ ди къалэныр творчествэм, усэм, макъамэм дахьэххэр зэкъуэдгъэувэнырщ, япэ дыдэу зи усэ утыку къизыхьэну е усэ къеджэну гупыж зыщIхэм Iэмал еттынырщ, - жиIащ КъБР-м Къалэн куэд щагъэзащIэ щIалэгъуалэ центрым зэфIэкI зиIэ щIалэгъуалэм ядэIэпыкъунымрэ зегъэужьынымкIэ и къудамэм и унафэщI ТыIэщ Валерэ.
Пшыхьым хыхьэу, зы утыку зэдитащ артист цIэрыIуэхэр, уэрэджыIакIуэхэр, усэм дихьэххэр. КъБР-м и Музыкэ къэрал театрым и актёрхэм «Единство народов России» уэрэдымкIэ ар къызэIуахащ. Дызэрыгушхуэ усакIуэ цIэрыIуэхэм я усэхэм къеджащ, уэрэдхэр жаIащ ПащIэ Маринэ, Дэгу Каринэ, ЦокIыл Азэмэт сымэ. Музыкэ театрымрэ КъБКъУ-м уэрэдымрэ къафэмкIэ и «Каллисто» театрымрэ я артистхэм зэдагъэзэщIащ «Калинка» композицэр.
УэрджыIакIуэхэм папщIэ къызэрагъэпэщ лъэпкъхэм зэдай зэпеуэхэм, «Голос. Дети II» зэхьэзэхуэри хыхьэу, я лауреат, «Славянский базар в Витебске» зэпеуэм щытекIуа Бэрэгъун Заур «Ритм сердца» уэрэдыр япэу зэхыхьэм щигъэзэщIащ икIи къызэхуэсахэм я гугъу яхуищIащ абы зэрелэжьам.
Бэрэгъун Заур жиIащ и уэрэдымкIэ цIыхухэр зэкъуэувэну, зэгурыIуэну къызэрыхуриджэр. Пшыхьым абы щытраха нэтыныр «Гордость нации» федеральнэ зэпеуэм ирагъэхьынущ.
Зэхыхьэр ягъэдэхащ артист цIэрыIуэхэмрэ усэм дихьэххэмрэ. Абыхэм ящыщу нэхъыщIэ дыдэ Хьэвеящхьэ Ясминэ адыгэбзэкIи балъкъэрыбзэкIи усэ къеджащ. Куэдым ягу дыхьащ Бахъсэн къалэм и курыт еджапIэ №2-нэм и унафэщI Нэгъуей Ахьмэд и къэпсэлъэныгъэр.
- Сыт хуэдэ зэманми цIыхухэм я лъапIэныгъэхэм ящыщу зэманым имыпхъэххэр къызэрыгуэкIщ. Мыпхуэдэ пшыхьхэр ди щIыналъэм и къалэ, къуажэ псоми къыщызэгъэпэщын хуейщ. Гуапэщ иджырей артистхэми нэхъыжьыIуэхэми зы утыку зэрызэдагъэбжьыфIар. Ар щIэблэм я дежкIэ щапхъэщ. ЗэIущIэ щхьэпэм сыхэтыну Iэмал сызэриIам сигу хигъэхъуащ, - жиIащ Нэгъуейм.
Пшыхьыр и кIэм щынэблагъэм, ар къызэзыгъэпэщахэм къекIуэлIахэр хуит ящIащ езыхэм я Iэдакъэ къыщIэкIа, нэгъуэщIхэм ятхахэм щыщу нэхъыфIу ялъагъу усэхэм къеджэну.
ТЕКIУЖЬ Заретэ.
