КъМР-ни Граждан обществону институтлары бла байламлыкъла жюрютюу эмда миллетлени ишлери жаны бла министерствосунда Шимал Кавказ фашист ууучлаучуладан эркин этилгенли 77 жыл эмда Нальчикге Аскер махтаулукъну шахары деген ат берилгенли 10 жыл толгъанына аталгъан тюбешиу болгъанды. Анга урушну эм урунууну ветеранларыны шахар советини, КъМКъУ-ну, "Къурулушчу" колледжни, "Россейни ышаны" деген коммерциялы болмагъан жамауат организацияны келечилери, партияны, комсомолну, право низамны сакълаучу органланы ветеранлары къатышхандыла.
Келгенле Хорламны байрагъыны копиясына, "Ол кюнле бир заманда да унутуллукъ тюйюлдюле" деген ат бла кёрмючге да эс бурмай къалмагъандыла. Анда фронтдан письмола, документле, майдалла, дагъыда кёп башха сейир затла кёрюрге боллукъ эди. Ала барысы да КъМР-да МВД-ны тарых музейинден алыннгандыла.
Хар келгенни къолуна уа Уллу Ата журт урушха къатышхан Х.Х.Бердовну "Рассказы фронтового разведчика" деген китабын саугъагъа бергендиле. Ич ишле министерствону музейини директору Алёна Чернова Уллу Хорламгъа Шимал Кавказда жашагъанла, ол санда бизни республика къаллай юлюш къошханыны юсюнден къысха билдириу этгенден сора сёзню КъМКъУ-ну преподаватели, тарых илмуланы кандидаты Азамат Татаровха бергенди. Алим республиканы азатлауну юсюнден тюрлю-тюрлю шартла келтирип, хапар айтханды.
-Ол къыйын жыллада партизанла да Нальчикни эркин этиуге кеслерини тийишли юлюшлерин къошхандыла. Кёпле этген кишиликлери, жигитликлери ючюн орденле эм майдалла бла саугъаланнгандыла. Бизни, бюгюн жашагъанланы, эмда келир тёлюлени борчлары уа ала жанларын берип, къанларын тёгюп келтирген Уллу Хорламны унутмазча этиудю,-дегенди Азамат Амурович.
Абдуллаланы Мустафа уа, жаш тёлюге айланып: «Уллу Хорламда сизни аппаларыгъызны къыйынлары айтып айтмазча уллуду. Ынналарыгъыз да бир затларын аямагъаныла. Сентябрь-октябрьде жаш тиширыула, къол аязларындан да хыппиллери ашланып, къан келе тургъанына къарамай, узун индекле къазгъандыла, жылы кийимле эшип, ашарыкъ затла жыйып, фронтха жибергендиле",-дегенди.
Ол дагъыда Нальчикни эмда Шимал Кавказны къоруулай 9 минг адам жоюлгъанын, бусагъатда аладан жаланда 400 аты белгили болгъанын да айтханды. Хар ветеранны да аты эсде къалырча этер ючюн, терек салып, аны юсюне атын жазаргъа чакъыргъанды.
Маргаритта Дьяченко - уруш жылланы сабийиди. Ол кеси кёрген, сынагъан затланы, ачлыкъны, жаланнгачлыкъны да юсюнден эсгериулерин айтханда, залда олтургъанла кёз жашларын тыялмагъандыла. "Сябры" миллет маданият араны башчысы Павел Сидорук а республикадан Белоруссияны къоруулай эмда андан бизни жерибизни эркинлиги ючюн жан бергенлени атларын туура этгенди. Аладан сора, запасдагъы полковник Залимгерий Шогемов, аскерни ветераны, биринчи космонавт Юрий Гагаринни самолётуна дайым да къарагъан Леонид Маремкулов, урунууну ветераны Сулейман Алиев да сёлешгендиле.
"Блокадалы гыржынны" юсюнден башланырыкъ акциягъа да эс бургъандыла тюбешиуню къурагъанла. Ары келген хар кимге да волонтёр къызла гыржын туурамла юлешгендиле. 115-чи атлы дивизияны юсюнден тарых маталлы материалла жыйышдырылып, китап чыгъарыргъа хазырлагъанларын да билдиргендиле. "Свеча" адабият клубдан келген къызчыкъла бла жашчыкъла урушха жораланнган назмуларын айтхандыла.
Коммунист партияны Нальчик шахар комитетини биринчи секретары, окъутуу-юйретиу ишни ветераны Евгения Шидакова уа, келгенлеге жюрек ыразылыгъын билдире: "Бюгюн мында айтылгъан затланы жаш адамла эшитгенлери бек аламатды. Аладыла келир заманны келечилери, алай эсе уа, уруш жылланы юсюнден керти хапарны да келир тёлюлеге сакъларыкъла да аладыла",-дегенди ол.