Тырныауузда хыйлалыкълагъа къажаулукъну жорукъларын ангылатыу жумушла болгъандыла. Полициячылагъа, Элбрусда регион колледжни кеслерини ыразылыкълары бла ишлеген халкъ дружинасыны студентлери эм ОМВД-да жамауат советни келечиси Къазакъланы Фатима къошулуп, шахарчыланы аманлыкъчыланы ётюрюклеринден сакъланыуну амалларына юйретгендиле.  

 Хыйлачыла адамланы алдау амалларын кенгертгенлей, тюрлендиргенлей турадыла, аны ючюн халкъгъа къоркъуусузлукъну жорукъларын эсгертиу артыкъда магъаналыды, деп белгилегендиле акциягъа къатышханла.

 Ахыр заманда  «ахчаны эсепге салыргъа керекди» деген алдаула бютюнда кёп болгъандыла. Хыйлачыла ахча къоллу болур ючюн, биринчи ариу айтып, алдаргъа кюреше эселе, ызы бла къоркъутуп, абызыратып башлайдыла. 

 Дагъыда «женгил ахчагъа» алданмазгъа да юйретгендиле. Артыкъда файдалы инвестицияла неда къайдан эсе да тюшген саугъала адамны ишекли этерге керекдиле.

 Аманлыкъчыла жангы ётюрюк да къурагъандыла: энди ала администрацияны атындан сёлешебиз, сизге социал тёлеуле этилликдиле деп, инсанны  банк картасыны тарихлерин сурайдыла.

 Право низамны сакълаучула бла жаш адамла шахарчыланы сакъ болургъа, танымагъан адамны айтханына ийнанмазгъа, интернетде ишекли ссылкаланы ачмазгъа, кесини юсюнден шартланы башхалагъа билдирмезге чакъыргъандыла. Бек игиси уа  - ишекли адам бла ушакъны тохтатып, аны юсюнден право низамны сакълаучулагъа белгили этергеди, деп юйретгендиле.

Тикаланы Фатима хазырлагъанды.