Тюнене КъМР-ни Башчысы Казбек Коков КъМР-де ич ишлени министри Вячеслав Крючков, КъМР-ни транспорт эмда жол мюлк министри Аслан Дышеков, республиканы цифралы айныу, связь эмда асламлы коммуникацияла министри Аскер Бозиев, Нальчик шахарны администрациясыны башчысыны къуллугъун болжаллы халда толтургъан Азаматгерий Ашхотов бла бирге транспорт къоркъуусузлукъну жалчытыуда эмда шахарда къурулушла бардырыуда жангы цифралы амалла бла шагъырейленнгенди.
Анга жораланнган тюбешиу КъМР-ни Транспорт эмда жол мюлк министерствосуну «Къоркъуусуз республика» арасында ётгенди. Анда асламысында видео бла тинтиуле бардырыуну кенгертиуню, транспортда жангы амалланы сингдириуню юсюнден сёлешиннгенди.    
Республикада бюгюнлюкде 1700-ден аслам  камера ишлеп турадыла. Жангы амалла уа алада жалгъан акъылны онгларын хайырланыргъа себеплик этедиле. Аланы сингдириу жоллада халны, ол санда машиналаны кёплюгюн бла азлыгъын, улоу тохтарыкъ жерледе болумну, андан сора да, зыбыр къалгъан-къулгъанла жыйылгъан орунла толгъанларын бла къалгъанларын дайым билип турургъа онг береди.
Математика тергеулени хайыры бла  транспорт бла байламлы ишлени алгъадан белгилерге боллукъду. Ол а жоллада машинала кёп жыйылмазча этерге,  тереклени бла юлкюлени да сакъларгъа болушурукъду.
Жамауат къоркъуусузлукъну сорууларына тюбешиуде энчи эс бурулгъанды. Камераланы, ГЛОНАСС эмда «Системы-112» амалланы бирикдириу болушлукъгъа терк келген эмда коммунал службаланы да байлашдырлыкъды. Ол а къаллай тюрлениулени да терк эслеп, мычымай мадарла этерге, алай бла уа жоллада къоркъуусузлукъну жалчытыргъа, шахарны жашауун а бютюн тынчлыкълы эмда ырахатлы этерге онг берликди.
Казбек Коков тюбешиуге чакъырылгъан экспертлени республикагъа ол магъаналы проектлени юслеринден тынгылы хапар айтханлары ючюн жюрек ыразылыгъын билдиргенди. «Регионубузда бек иги федерал амалланы сингдириу сакълайды бизни», – деп билдириледи  КъМР-ни Башчысыны МАХ-да энчи каналында.

Юсюпланы Галина 
хазырлагъанды.