Ахыр кюнледе социал сетьледе Къабарты-Малкъарда жашырын мобилизация бардырылады, региондан келишим бла аскерде къуллукъ этерге чакъырылгъанланы планы он кереге кётюрюлгенди, деген хапарла жюрюйдюле. КъМР-ни аскер комиссары Дмитрий Пахомов ала терс болгъанларын, бюгюнлюкде аскер комиссариат къаллай жумушла бла кюрешгенин билдирир мурат бла республиканы асламлы информация органларыны журналистлери бла тюбешгенди.
- Бек алгъа Къабарты-Малкъарда жашырын мобилизация барады деген хапарла ётюрюк болгъанларын айтыргъа сюеме. Шёндю мобилизация резервде тургъан инсанладан республикада артыкъда магъаналы объектлени къорууларыкъ мобиль къауумла къураладыла. Баям, адамла «мобилизация» деген сёзню эшитип, аны терс ангылап, жалгъан хапарла андан чыкъгъандыла, - дегенди военком, брифингни башлай.
Ол айтханыча, быллай къауумла къыралны хар субъектинде да къураладыла. Ол украинлы БПЛА бла Россейни регионларында тюрлю-тюрлю мекямланы чачдыргъан кезиуле бла байламлы этиледи.
– Мобилизация резервде инсан кесини ыразылыгъы бла къуллукъ этеди, борчлу халда чакъырыу жокъду. Анга запасда болгъан инсанла киредиле, – дегенди Дмитрий Юрьевич.
Резервге киргенде, 3-5 жылгъа келишимге къол салынады. Алай, инсанны тюрлю-тюрлю сылтаула бла къуллукъ этерге онгу болмаса, аны тохтатыргъа эркинди.
Военком айтханыча, мобилизация резервге кирген адам ишчи жеринде турады, кесини жумушларын толтурады, алай керек болгъанда, аны энчи къорууланыу къауумлагъа чакъырлыкъдыла.
Бу жумушла РФ-ни Президентини «Мобилизация резервде болгъан инсанлагъа энчи чакъырыу бардырыуну юсюнден» 1007-чи номерли Указына тийишлиликде бардырыладыла. Ол оноу 2025 жылда 30 декабрьде къабыл кёрюлгенди. Аны толтурур мурат бла РФ-ни Правительствосу 2127-чи номерли бегим хазырлагъанды: «Энчи мобилизация чакъырыуну бардырыуну жорукъларыны юсюнден».
Мобилизация резервге кирген инсаннга Къоруулау министерство ай сайын, ол толтургъан къуллукъгъа кёре, 2-5 минг сом тёлейди – ол сборлагъа къатышханына бла къалгъанына да къарамай.
РФ-ни Президентини белгиленнген Указына кёре, мобилизация резервде болгъан инсанладан къорууланыу къауумла къураладыла. Энчи магъаналы объектлени ала сакъларыкъдыла. «Бюгюн мен аллай инсанла бла тюбеширикме. Бюгюнлюкде 60-дан аслам адам мобилизация резервде турууну юсюнден келишимге къол салгъандыла, энди аладан къорууланыу къауумла сайланырыкъдыла», – дегенди аскер комиссар.
Бу кюнледе уа мобиль къауумлада къуллукъ этерик жашланы юйретиу къолгъа алынырыкъды. «Аланы аскер сауутладан атаргъа, БПЛА-ны илишаннга алыргъа юйретирикдиле, ызы бла ала объектлени къоруулауда къуллукъ этип башларыкъдыла», – дегенди Дмитрий Пахомов.
Мобиль къауумда къуллукъ этгенлеге аскерчини даражасы бериледи. Алагъа хакъ тёленеди, ала аш-суу, кийимле, башха керекле бла да жалчытылынадыла. Орталыкъ хакъны ёлчеми 30-50 минг сомгъа жетеди, аскер къуллугъуна кёре. Къуллукъ этген кезиуде инсанны ишчи жери эмда хакъы сакъланадыла. РФ-ни Къорууланыу министерствосу уа иш бериучюле этген къоранчланы къайтарлыкъды.
КъМР-ни Башчысы Казбек Коков оператив штабны жыйылыуунда мобиль къорууланыу къауумлагъа къатышханлагъа къошакъ халда республиканы бюджетинден ай сайын 100 минг сом тёлерге деп оноу этгенди.
– Алай бла жамауатны жалгъан хапарлагъа ийнанмазгъа чакъырама. Резервде болгъан инсан энчи аскер операциягъа, Россейден тышында аскер борчланы толтурургъа ашырылмагъанын эсгертирге сюеме. Бу къауумлада инсан кесини ыразылыгъы бла къуллукъ этерикди. Ол регионну ичинде энчи магъаналы объектлени сакъларыкъды, – деп къатлагъанды республиканы аскер комиссары.
Тикаланы Фатима.
Сурат авторнуду.
