«Таулу» («Горец») медиа ара Кёнделенни Доттуланы Ахмат атлы 1-чи номерли школунда башланып, аны жаш журналистлери тюрлю-тюрлю конкурслагъа, тюбешиулеге, жыйылыулагъа къатыша, проектле хазырлай, атын республикада, андан да тышында белгили этгенди. Арада журналистикагъа, медиагъа, сурат алдырыргъа сейирлери, хунерлери болгъан жашла бла къызла кеслерини билимлерин игилендирирча, фахмуларын сынарча профессионал оборудование, башха керекле бардыла.
Алай бу къысха материалда уа медиа араны къуралыуунда кеслерини ызларын къойгъан къызланы юслеринден жазаргъа сюебиз: Жолаланы Аминаны бла Текуланы Мариямны.
- Медиа араны къурагъан кезиуде, къалай ишлеригибиз, хазыр проектлерибиз болмагъандыла. Жаланда итиниулюгюбюз, бираз техникабыз эмда биринчи атлам этерге къоркъмагъан фахмулу школчуларыбыз бар эдиле. Жолаланы Амина «Таулуну» биринчи журналисти болгъанды, ол жунчумай, къоркъмай: «Келигиз, башлайыкъ!»,-деп, къолуна микрофонну алып, кадргъа сюелгенди, башхала бла ушакъла жаздырып башлагъанды. «Халкъ эсде тутуу» проектни башламчысы да олду. Аны къатылыгъы бла къагъытда жазылгъан иш керти да сейир, адамлагъа керек болгъан, тарых магъаналы жумушха бурулгъанды. Ол тенглерине, сакълап турмай, жюрегинг бла сюйген ишни къолгъа алыргъа кереклисини юлгюсюн кёргюзтгенди, - дегендиле бизге Кёнделенни 1-чи номерли школунда.
Амина окъууун башха школда бардыргъанды, болсада анда да медиагъа сюймеклигин унутуп къоймагъанды. Аны итиниулюгю бла анда да медиа ара ачылып, Амина жаш журналистлеге муратларын жашауда бардырыргъа юйретип тургъанды.
Текуланы Мариям «Таулу» медиа ара къуралгъан кюнден аны бла бирге ёсгенлей, сынам, билим жыйгъанлай келеди. Биринчи атламын ол 7-чи классда «Халкъ эсде тутуу» проектни чеклеринде этгенди. Бир жол къызчыкъ тамата тёлюню халкъны тарыхында къыйын жылларыны юслеринден хапарларына тынгылай, кёлю толуп, кёз жашларын тыялмай къалгъан эди. Алай жилямукъла аны къарыусузлугъун угъай, адамлыгъын, анга айтханны эшите, жюреги бла сезе билгенин кёргюзтгендиле. Башхаланы хапарларына тынгылай, ол тенглерине, ёсюп келген тёлюлеге миллетни тарыхына юйретиучюсю болгъанды.
Амина бла Мариям «Таулуну» баш жорукъларын къурагъандыла – кертиликни сакъларгъа, хар сёз да адамны жашауу, къадары бла байламлы болгъанын унутмазгъа эмда жангылыргъа къоркъмазгъа! Ала медиа араны мурдорун салгъандыла: шёндюгю заманда журналист жамауатны аллында жууаплы болгъанын, аны бла бирге уа сакълыкъны тас этмезге, адамлагъа къайгъырыргъа кереклисин.
Кёнделенни 1-чи номерли школунда ёхтемленирча шартла кёпдюле, болсада «Таулу» аланы арасында энчи жерни алады. Бюгюнлюкде да ол ишин андан ары бардырады: хар айдан жангы бериуле чыгъадыла, жаш журналистле регион эм битеуроссей эришиулеге къатышадыла, кадрланы тюз алдырыргъа, ишлерге юйренедиле.
Аны биринчи келечилери Жолаланы Амина бла Текуланы Мариям а быйыл школну тауусхандыла, жашауларын, усталыкъларын сайлауну жолуна чыкъгъандыла. Алай ала «Таулуда» этген жумушла, «Халкъ эсде тутуу» проект архивде сакъланып, аланы ызларындан келген жашланы бла къызланы кёллендирликлери ишексизди.
- Медиа араны къаууму Аминаны бла Мариямны школну тауусханлары бла алгъышлайды. Ала жууаплылыкъны кесинге алыргъа къоркъмазгъа, неге да юйренирге жарагъанын кёргюзтгенлери, ишлерин ачыкъ жюрек бла бардыргъанлары ючюн ыразылыгъыбызны айтабыз. Мындан ары да жашауугъузда сейир, аламат, керти хапарла кёп болсунла, - деп алгъышлагъандыла къызланы «Заманны» юсю бла «Таулу» медиа араны келечилери.
Тикаланы Фатима
хазырлагъанды.
