КъБР-м и Iэтащхьэ КIуэкIуэ Казбек лэжьыгъэ IуэхукIэ яIущIащ къэрал кIуэцI IуэхухэмкIэ министру КъБР-м щыIэ Крючков Вячеслав, КъБР-м транспортымрэ гъуэгу хозяйствэмкIэ и министр ДыщэкI Аслъэн, бжыгъэхэр зи лъабжьэ зыу­жьы­ныгъэмкIэ, связымрэ цIыхубэ зэпыщIэ­ныгъэхэмкIэ и министр Бозий Аскэр, Налшык къалэ администрацэм и унафэщIым и къалэныр пIалъэкIэ зыгъэзащIэ Ащ­хъуэт Азэмэтджэрий сымэ икIи транспортым и шынагъуэншагъэмрэ къалэ ухуэ­кIэмрэ ефIэкIуэным хуэгъэпса, бжыгъэр зи тегъэщIапIэ презентацэм щыгъуазэ зищIащ. 

ЗэIущIэр щекIуэкIащ КъБР-м Транспортымрэ гъуэгу хозяйствэмкIэ и министерствэм къедза «Республикэ шынагъуэншэ» центрым. 
Зытепсэлъыхьа щынэхъыщхьэр - транспортым и лэжьэкIэр зыубзыху къэухь IэрыщI щхьэхуэ къыхэхауэ, лэжьыгъэ псори абы къызэщIегъэубыдэн, видеокъэпщы­тэныгъэхэм зегъэубгъун зэрыхуейрщ. 
Республикэм камерэ 1700-м нэс трагъэувауэ, хъарзынэу мэлажьэ. ЗэIущIэм къы­щыхалъхьа жэрдэмхэм ахэр нэхъ быдэжу ирипхынущ къэухь IэрыщIым и зэфIэкIхэм. 
Нэхъ пасэу ягъэунэхуа IэмалыщIэхэмкIэ гъуэгум и щытыкIэр убзыхуа зэрыхъур наIуэ хъуащ, машинэхэр щызэтрихьэр, гъэувыкIэ хабзэм щебакъуэм, кIэрыхубжьэрыху бы­дэхэр щыхыфIадзэм кIэлъыплъыныр тынш ищIу. 
Есэпыр зи лъабжьэ проектхэм я фIыгъэ­кIэ, гъуэгум къыщыхъункIи хъунум щы­ты­кIэр къэмыс щIыкIэ зыхуэбгъэхьэзырыфынущ, машинэхэр зэтримыхьэу пхуэзэблэгъэкIынущ, щхъуантIагъэр пхъумэфынущ.
Гулъытэ щхьэхуэ хуащIащ цIыхубэм я шынагъуэншагъэм хэхъуэн папщIэ, къэбгъэщхьэпэ хъуну Iэмалхэм. Камерэхэр зэгъэуIун хуейщ, коммунальнэ хозяйствэхэми къэхъукъащIэхэм кIэлъыплъыныр зи къалэн къулыкъущIапIэхэми ГЛОНАСС, «Система-112» программэхэр къагъэсэбэпынущ. 
А псом я фIыгъэкIэ, гъуэгухэр нэхъ шынагъуэншэ, къалэм ущыпсэуну нэхъ тынш хъунущ. 
КIуэкIуэ Казбек зэIущIэм къеблэгъа IэщIагъэлIхэм фIыщIэ яхуищIащ, республикэм дежкIэ мыхьэнэшхуэ зиIэ проектхэм набдзэгубдзаплъэу зэрелэжьам щхьэкIэ. Къэралым щызекIуэ Iэмал нэхъыфIхэр дяпэкIэ республикэм къыщагъэсэбэпыну я мурадщ.