Налшыкрэ Пятигорскрэ я тхылъ тедзапIэхэр хагъэхьащ «Илъэсым и тхылъ нэхъыфI» зэпеуэм къыщыхэжаныкIауэ къалъыта IуэхущIапIэ 50-м. 

Урысейм и тхылъ тедзапIэхэм я зэгухьэныгъэм къызэрилъытамкIэ, Къэбэрдей-Балъкъэрымрэ Ставрополь краймрэ я тхылъ те­дзапIэхэр - Налшык дэт Котляровхэ Викторрэ Мариерэ я тхылъ тедзапIэмрэ Пятигорск и «Снег» тхылъ тедзапIэмрэ - къэралым и IуэхущIапIэ нэхъыфIхэм ящыщ хъуащ. 
IуэхущIапIэ нэхъыфI 50-м хиубыдащ Урысейм и къалэ 29-м щыщхэр: Архангельск къыщыщIэдзауэ Якутск нэсыху. Зэпеуэм я зэфIэкI щеплъыжащ Урысейм и щIыналъэ 57-м щылажьэ тхылъ тедзапIэу 120-м ­щIи­гъу. Зэхьэзэхуэм щагъэ­лъэгъуащ 2025 гъэм къы­дэкIа тхылъ 700. 
Котляровхэ Викторрэ Мариерэ я тхылъ тедзапIэм и къыдэкIыгъуитI зэпеуэм нэхъыфIу къыщалъытащ. Ахэр - томитI хъу «Поедем вместе по уникальным местам Кабардино-Балкарии» республикэм и тхыдэ-лъахэхутэ гъуэгугъэлъагъуэмрэ лъэпкъитIым я зэхущы­тыкIэхэр къыщыгъэлъэгъуэжа, дэфтэрхэмрэ тхыгъэ­хэмрэ щызэхуэхьэсыжа «Россия и адыги» (V-XIX вв.) щIэнгъуазэмрэщ. КъыжыIапхъэщ, «Поедем вместе по уникальным местам Кабардино-Балкарии» лэжьыгъэр нэхъапэIуэкIэ Урысейм и ­лъахэхутэ къыдэкIыгъуэ нэхъыфI 20-м ящыщ зэры­хъуар, «Малая Родина» урысейпсо зэпеуэм хыхьэу. 
Илъэс 25-м къриубыдэу IуэхущIапIэм зэфIигъэкIа лэжьыгъэхэм дамыгъэ, саугъэт куэд къыхуагъэфэщащ. Абыхэм ящыщу жыпIэ ­хъунущ 2025 гъэм накъыгъэм Ижевск щекIуэкIа «Илъэсым и тхылъ нэхъыфI - 2025» фестивалым «Лъахэхутэ къыдэкIыгъуэ нэхъыфI» унэтIыныгъэм и щIыхь тхылъым и япэ нагъыщэр тхылъ тедзапIэм и «Занимательная Кабардино-Балкария», «Познава­тель­ная Кабардино-Балкария», «Захватывающая Кабардино-Балкария» лэжьыгъэхэм папщIэ къызэры­хуа-­гъэфэщар. КъинэмыщIауэ, Уфа нэгъабэ мэкъуауэгъуэм щекIуэкIа «Китап Байрам» лъэпкъыбэ жармыкIэм «Время героев» унэтIыныгъэм Котляровхэ я тхылъ тедзапIэм диплом щхьэхуэ къыщихьащ, дзэ Iуэху хэхам щыIэ зауэлIхэм теухуауэ Урысейм исхэм ятха усэхэр щызэхуэхьэса томищ хъу «Мы вернёмся, мы будем рядом...» къыдэкIыгъуэм пап­щIэ. УмыгъэщIэгъуэн плъэ­кIыркъым абы щыгъуэ дзэ Iуэху хэхам щыIэхэм я волонтёрхэм я зэгухьэныгъэм къыхилъхьауэ щыта Iуэхум цIыху мин 15-м ­щIигъу къызэрыпэджэжар. 
Пятигорск и «Снег» тхылъ тедзапIэм и къыдэкIыгъуищ зэпеуэм нэхъыфIу къыщалъытащ. Абыхэм ящыщщ томитху хъу, Кавказ Ищхъэрэм и республикиблым щыщ тха­кIуэхэм, усакIуэхэм, драматургхэм я Iэдакъэ­щIэкIхэр зыхагъэхьа, Кавказ Ищхъэрэм ис лъэпкъхэм я литературэм и антологиер. КъыдэкIыгъуэм гулъытэ щы­хуащIащ сабий литера­ту­рэми урысыбзэкIэ тхэ лъэпкъ тхакIуэхэмрэ уса­кIуэ­хэмрэ я къалэмыпэ къы­щIэкIахэми. КъыдэкIыгъуэ нэхъыфIхэм хабжащ Суворин А. А. и гъуэгуанэ тхыгъэхэр щызэхуэхьэсыжа «Палестина», тхылъитху ­хъууэ Гатцук В. А. и цIэ щIэлъу къыдэкIа «Сказки русского народа» лэжьыгъэхэр. 
«Снег» тхылъ тедзапIэр нэхъапэIуэкIи, 2013, 2015, 2016 гъэхэм, мы зэпеуэм щытекIуауэ щытащ. 
«Илъэсым и тхылъ нэхъыфI» урысейпсо зэпеуэм и 36-нэ зэхыхьэр, зэрыхабзэу, Москва «Красная площадь» тхылъ фестивалым, щекIуэкIащ. Ар къызэригъэпэщащ Урысейм и тхылъ тедзапIэхэм я зэгухьэныгъэм. Абы хэтащ къэралым и «Эксмо-АСТ», «Наука», «Просвещение», «Молодая гвардия» тхылъ тедзапIэ цIэрыIуэхэр, республикэ ­16-м, къалэ зэмылIэужьы­гъуэ­хэм щыщхэр. 

БЖЬЫХЬЭЛI  Розэ.