ХьэтIохъущокъуэм и жыг хадэм ит Розэхэм (Гуащэнаб­дзэ­хэм) я аллеем бадзэуэ­гъуэм и 12-м щагъэлъэ­гъуащ къалащхьэм и «Свой стиль» клубым и сурэттех, илъэс щэ ныкъуэм щIигъу­кIэ инженер IэнатIэм пэрыта Бекоев Геннадий и лэжьыгъэхэр.

Бекоевым, къикIуа гъащIэ гъуэгуанэм ириплъэж пэлъытэу, гъэлъэгъуэныгъэм хузэхуихьэсыжат сурэт нэхъыфIхэр. Абы хигъэхьащ Урысейм (Архангельскэ областым, Кольскэ хытIыгуныкъуэм, Карелием, Байкал, Камчаткэм), Кавказ Ищхъэ­рэм и щIыналъэхэм, хамэ къэралхэм (Испанием, Тыркум) щытрихахэм щыщ. 
Сурэттехым зэрыжиIэмкIэ, абыхэм еплъ цIыхухэм и лэ­жьыгъэхэр къазэрыщыхъум кIэ­лъыплъыну, ягу ирихьри иримыхьри я нэгум къы­зэрищыр илъагъуну фIэгъэщIэгъуэнщ. Абы къыдэ­кIуэу, мыпхуэдэ гъэлъэгъуэ­ныгъэр щхьэпэу къелъытэ и ехъулIэныгъэ­хэмрэ зэфIэкI­хэмрэ къипщы­тэжынымкIэ, щIэхэм тегушхуэнымкIэ. 
- Сурэт техыным иджыри сысабийуэ сыдихьэхащ. Япэ­щIыкIэ цIыхухэм сурэт ятесхыну сфIэгъэщIэгъуэнащ. Абы щыгъуэм я сурэтхэр тхылъымпIэм тету щеттыжкIэ ягу ирихьмэ, ар дамэ къыттезыгъа­кIэт. Нэхъ иужьыIуэкIэ щIыуэ­псым нэхъыбэу сурэт тесх ­хъуащ. Дзэ къулыкъум илъэсищкIэ сыщыщыIами, сурэттехыр IэщIыб сщIакъым. Штабым и унафэщIыр къызэры­зэджэр си «Шпион» сурэттехым и цIэрт. Абы щыгъуэм зэныбжьэгъухэм зым адрейм сурэтхэр тетхыжу щытащ, иужькIэ фэеплъу къытхуэнэн папщIэ, - жеIэ Геннадий. - Дзэ къулыкъу нэужьым институтым сыщIэтIысхьащ. А зэманым цIыхухэми щIыуэпсми сурэт куэду ятесхырт. Институт нэужьым, Иркутск алюмин-магний промышленностымкIэ и щIэныгъэ-къэхутакIуэ институтым сыщагъэкIуарщ нэхъыбэу сурэт техыным зыщестар. А лъэхъэнэм институтым щыIэт махуэ зыбжанэкIэ зекIуэ кIуэ туристхэм я гупжьей. Абыхэм я ­гъусэу сыкIуэурэ, ди зыгъэпсэхугъуэр зэрыдгъакIуэм (щIыуэпсым и дахагъэм, мафIэм дызэрыпэрысым) сурэт тесхыу щытащ. Налшык сыкъэкIуэжа нэужь, бжыгъэр зи лъабжьэ су­рэттехым хуэдэ къэсщэхуащ икIи сыдэзыхьэх Iуэхум гухэхъуэгъуэ нэхъыбэ къызит ­хъуащ. «Свой стиль» клубым абы щыгъуэ гу къыслъитащ икIи сыхыхьэну къы­щыс­хуагъэлъагъуэм, арэзы сы­техъуащ. Гъэ къэс ди лэ­жьы­гъэхэм я гъэлъэгъуэны­гъэ­хэр къызэрызэдгъэпэ­щыр, ди зэ­фIэкIым кIуэ пэтми зэрыхэдгъахъуэр си дежкIи щхьэпэщ. ЗыплъыхьакIуэ кIуэ­ныр, бгы­хэм зыщыгъэ­псэ­хуныр зыхэслъхьэ щымыIэу зэрысфIэ­фIым къыхэкIыу, Совет Союзым и щIыпIэ куэдым сыщыIащ. Сурэтте­хым и фIыгъэкIэ зыгъэ­псэ­хуакIуэ сыздэщыIа щIыпIэ куэд къэзгъэлъэгъуэну Iэмал сиIащ. 
ТЕКIУЖЬ  Заретэ. 
Сурэтхэр
Къарей  Элинэ  трихащ.