Яникойну Муслийман организациясы къурап, 17 жыллары толмагъан элли жаш тёлюню арасында «Эм иги бахча» деген конкурс быйыл бла экини кере бардырылады. Тёрелиге айланнган эришиуге яникойчула бла каменкачыла сюйюп къатышадыла. Жерчилик ишле уа апрельде  башланнган эдиле. Къызчыкъла бла жашчыкъла  бахчаларында бананла, финикле, инжир, дугъум, жилек эм дагъыда башха  затла ёсдюргендиле.
Бу кюнледе жюри быйылгъыны эсеплерин чыгъаргъанды. Аны келечилери конкурсха кёргюзтюлген бахчалада болуп, аланы байлыкъларына, айбатлыкъларына, тазалыкъларына эс бёлгендиле. Сабийле аланы иш кёллюлюклери, аны бла бирге  хорламгъа итиниулюклери бла да сейирсиндиргендиле. 
Башламчылыкъ организацияны таматасы Элеккуланы Хасан хажиникиди. Сёзсюз, быллай ахшы жумуш ёсюп келген тёлюлени жер бла байламлыкъларын кючлеуге себеп боллукъду. Алай бла 1-чи жерге Таймаскъулланы Исламны тийишли кёргендиле. Этезланы Алан экинчи жерге чыкъгъанды. Ючюнчю тизмеде уа Таймаскъулланы Эльдар орналгъанды. Ала  барысы да дипломла, майдалла эм ахча саугъала бла белгиленнгендиле. Аладан сора, башха сабийлени да белгилемей къоймагъандыла. 
Быллай эришиулени хайырларындан  кёп жылланы ичинде жер ишледен айырылгъан тёлюлеге жангыдан бахчачылыкъ, терек бахчачылыкъ дегенча жумушлагъа сюймеклик  артха къайтыр деп ийнанабыз. Яникойчуланы юлгюлери уа башхалагъа да дерс болуруна ышанабыз. Эсибизге тюшюрейик, аппаларыбызны бла аммаларыбызны бахчалары бир заманда къуру болмагъанларын, алада артыкъ ханс ёсмеучюсюн. Танг эрттен къобуп, ала чага, тёбе этип, тёгереклерин тазалыкъда тутаргъа итиннгендиле, бахчалары аланы ёхтемликлери болгъанды. Жарсыугъа, бюгюнлюкде кёп абаданла окъуна ол затдан кенгде къалгъандыла. Быллай конкурслагъа къатышхан сабийлени жюреклерин а жерге сюймеклик бийлесе, ол миллетибизге хайырлы боллугъу сёзсюздю.

Таппасханланы Аминат.