Алгъаракъда билдиргенибизча, «Антарес» билим бериу арада жюзден артыкъ школчу, жай профильли сменде солуп, Москваны физика-техника институтунда ишлеген преподавательледен билим да алгъандыла. Физтех школланы айнытыу жаны бла фонд къурагъан бу проект республикада фахмулу жашланы бла къызланы жылны ичинде юйретиуге бурулупду.

Озгъан байрым кюн а ингирликде «Антаресде» билим бериу сменни жабылыууна жораланнган къууанчлы жыйылыу болгъанды. Ол, тёредеча, РФ-ни эмда КъМР-ни гимнлерин согъуу бла башланнганды.
Физикадан, химиядан, математикадан эмда биологиядан къысха заманны ичинде бардырылгъан билим бериу программагъа битеу региондан абадан класслада окъугъан фахмулу жашла бла къызла къатышхандыла. Ол иш Москваны физика-техника институтуну (МФТИ), Физтех школланы айнытыуну фондуну эмда Къабарты-Малкъар Республиканы Правительствосуну юч жанлы келишимлерине кёре къуралгъанды эмда бу жол беш кюнню ичинде бардырылгъанды.
Заман аз болгъанына да къарамай, Физтехден алчы преподавательле сабийлеге физика-математика эмда химия-биология жаны бла практикалы билим бергендиле. Мектепчилени лагерьде тургъан беш кюнлери беш сагъат кибик кёрюннгенди дерге боллукъду, нек дегенде ол чакъ билим алыу, солуу жаны бла да аламат, эригиусюз эди. Аллай бир кюнню ичинде «Антаресде» алагъа тюрлю-тюрлю оюнла, спорт эришиуле, викторинала, конкурсла да къуралгъандыла. Бир кюн а жаш адамланы Чирик кёлню жагъасына да элтгендиле. Бардырылгъан дерслери уа бютюнда сейирлик болгъандыла.
Лагерьде солуп, билим да алгъанлагъа айланып, КъМР-ни жарыкъландырыу эмда илму министри Анзор Езаов былай дегенди: «Бу смен фахмулу жаш тёлюню хазырлауда магъаналы атлам болгъанды. Мен оюм этгенден, сизни хар биригиз да, заман аз болгъанына да къарамай, тийишли билим алгъансыз, кёп затны билгенсиз. Бюгюн былайда мектепчилени араларында бардырылгъан регион, Битеуроссей конкурслада, олимпиадалада хорлагъан, алгъа итиннген, келир заманнга магъаналы борчланы салгъан жашла бла къызла сюелесиз. Бу смен сизге хайырлы болгъанына бир тюрлю ишеклигим жокъду».  Андан сора да, ол жаш адамлагъа ала алларына бийик борчла салып, алагъа жетерлерин да тежегенди.
Москвадан келген алимледен алгъан билимлерини юсюнден кеслерини оюмларын сабийле да айтхандыла. Сёз ючюн, Къудайланы Махти билдиргеннге кёре, мектепчилеге лагерьде окъуу, солуу да бек хычыуун да, сейирлик да, хайырлы да эди. «Биз барыбыз да жаратханбыз бу ишни, бир бирибиз, устазларыбыз бла да шуёхла болгъанбыз, мында тургъан заманым бек хайырлы эди.  Бу огъурлу иш тёреге айланыр деп да ышанама», - дегенди Махти ушагъыбызда.
Анга «Кюн шахар» сабий академияда билим алгъан онунчу классны окъуучусу Лина Жекамухова да къошулуп, былай дегенди: «Хар затны да жаратханма. Преподавательле бек игиле эдиле, ала хар затны бизге терк ангылатхандыла, биз да ала бла бир толкъунда болгъанча эдик. Ала не къыйын материалны да окъуучула терк, къыйналмай ангыларча женгил бергендиле, бютюнда бег а Кирхгофну жорукълары эсимде къалгъандыла, аланы жик жиги бла тынгылы сюзгенбиз».
МФТИ-ни преподавательлери да, Къабарты-Малкъарны школчуларына ала къыйын илму темаланы ангыларгъа итиннгенлери эмда жарыкълыкълары ючюн ыразылыкъларын билдирип, мында кёп фахмулу къызла бла жашла болгъанларын чертгендиле, дагъыда бизни сабийле мындан ары да билим алыуда жетишимли болурларын, уллу илмуда кеслерини жолларын табарларын сюйгенлерин айтхандыла. 
Проект бир кере бла чекленип къаллыкъ тюйюлдю. КъМР-ден фахмулу сабийле бла ишни андан ары да тап къурап бардырыр ючюн этилген келишимге тийишлиликде, онлайн дерсле, тюрлю-тюрлю кружокла эмда устазланы билимлерин кётюрюу жаны бла кёп жылланы ишлерик программа дайым бардырыллыгъы да айтылгъанды.
Окъуу-солуу сменнге къатышхан жашланы бла къызланы барына да сертификатла берилгендиле. Байрамны бютюн жарыкъ, эсде къалырча этиуге кеслерини юлюшлерин «Насып» тепсеу ансамбльни солисти Улбашланы Тамерлан, жаш жырчы Дарина Евтухович да къошхандыла.

Холаланы Марзият.