Къэбэрдей-Балъкъэрым и Iэтащхьэ КIуэ­кIуэ Каз­бек дыгъуасэ щыгъуазэ зи­щIащ республикэм гъуэгу­хэр щызэгъэ­пэщыжыным хуэгъэзауэ щекIуэкI лэ­жьыгъэхэм ящыщ зыбжанэм.

Абыхэм я нэхъ инхэм ящыщщ «Кавказ» Р-217 къэрал гъуэгум и 494-нэ ­километрым деж хуэзэу Урыху псым телъ лъэмы­-жыр къызэрагъэщIэрэ­щIэ­жыр. Ар сыт и лъэныкъуэ-кIи къызыхуэтыншэу зы­-хуей хуэгъэзэн щIадза­кIэщ, абы и пIэкIэ пIа­лъэкIэ къа­гъэ­сэбэпыну гъуэгу ящIащ.
Гъуэгухэм якIэлъыплъ «Кавказ» управленэм и ­лэжьакIуэхэм лъэмыжым телъхэр къыт­рахыж, лъэ­мыжыщIэм и лъабжьэхэр щIым храгъэубыдэ. IэщIагъэлIхэр мыгувэу яужь ­ихьэнущ щIэгъэкъуэны­щIэ­хэр гъэу­выным. 
Республикэм и Iэтащхьэм къыхигъэщащ абдеж автомобиль куэд зэрыщы­зэ­блэкIыр -   зы жэщ-махуэм къриубыдэу ахэр мин 35-м щынэблагъэ щыIэщ. Абы къыхэкIыуи ар икъукIэ жьы хъуат икIи Iэмал имыIэу зэгъэпэщыжын хуейт.
Лъэмыжыр къагъэ­щIэ­рэ­щIэжа нэужь абы и бгъуа­гъыр метр 25-рэ хъунущ, и кIы­хьагъыр метри 165,5-м щIигъунущ, иджыпсту зэры­щыт метри 163-м и пIэкIэ. Проектым къызэрыщыгъэлъэгъуамкIэ, гъуэгур зэб­гъурыту автомобилиплI техуэным хуэ­щIауэ щытынущ, абы нэмыщI лъэс зекIуа­пIэхэр и бгъуитIымкIи иIэнущ, ар къагъэ­нэхунущ, мылым щызыхъумэ Iэмалхэри абдеж къыщагъэ­сэ­бэпынущ. Гъуэгу зэб­лэ­кIы­пIэхэри зэпыгъэщхьэхукIауэ щы­тынущ.
Къызыхуэтыншэу зыхуей хуагъэза нэужь къэрал ­гъуэгум и Iыхьэм автомобилу щы­зэблэкIри нэхъыбэ ­хъунущ икIи шынагъуэншагъэри къызэрагъэпэщынущ.
Къэбэрдей-Балъкъэрым     и Iэтащхьэ КIуэкIуэ Казбек  и нэIэм щIэтщ республикэм и автомобиль гъуэгухэм я щы­тыкIэр, абыхэм щекIуэкI зэгъэпэщыжыныгъэ лэ­жьыгъэми набдзэгубдза­плъэу кIэлъоплъ. Дыгъуасэ щыгъуазэ зыхуи­щIащ Ар­-уан щIыналъэм щыу­къуэ­дия гъуэгухэм я щы­тыкIэм. 
Республикэм и пашэм МАХ-м щиIэ напэкIуэцIым зэрыщитхымкIэ, Черная Речкэ - Благовещенкэ жы­лэхэр зэпызыщIэр мы зэ­маным зыхуей хуа­гъэзэж. Километр 12,7-рэ зи кIы­хьагъ а автомобиль гъуэ-гур яухуауэ щытащ илъэс 22-рэ ипэкIэ. Абы ­лъандэрэ блэ­кIа зэманым гъуэгум ­зэгъэпэщыжыныгъэ лэ­жьы­гъэ щекIуэкIакъым. ­Но­бэкIэ къапщтэмэ, гъуэгум щыщу километри 8-м ас­фальт тралъхьакIэщ. А лэ­жьы­гъэхэм щIыгъунущ лъэ­мы­житIымрэ псы зэры­кIуэ ухуэныгъэхэмрэ я зэ­гъэ­пэ­щыжыныгъэхэри. А лэжьыгъэхэр бжьыхьэм ирихьэ­лIэу зэфIэкIынущи, Аруан, Прохладнэ щIыналъэхэм ­хиубыдэ жылэхэм дэсхэр нэхъ тыншу зэ­лъэIэсы­нущ.
КъищынэмыщIауэ, КIуэ­кIуэ Казбек щыгъуазэ зыхуи­щIащ Нарткъалэ и уэрам­-хэу Лениным, Шэджы­хьэ­щIэм, Ахъмэтым я цIэхэр зезыхьэхэм щекIуэкI зэгъэ­пэщыжыныгъэ лэжьыгъэ­хэм. А гъуэгухэм ящыщу ­километри 2,4-рэ хуэдиз тэ­мэм ящIыжынущ. Ахъ­мэ­тым и цIэр зезыхьэ уэрамым тет псэупIэ унэхэм я IухьэпIэхэри зэрагъэпэ­щы­жынущ. А лэжьыгъэхэр псори фокIадэм зэфIахыну я мурадщ. ЩIыналъэм и пашэм къызэрыхигъэщамкIэ, а уэрамхэм тет социальнэ, щэнхабзэ, административнэ унэхэми нэхъ тыншу уе­кIуэлIэфынущ. 
Псори зэхэту къапщтэмэ, мы илъэсым къриубыдэу ди республикэм зыхуей щы­хуагъэзэжынущ автомо­-биль гъуэгуу километри  143-рэ зи кIыхьагъ. Гулъытэ нэхъыбэу зыхуащIыр районхэм, щIыпIэхэм щыIэ гъуэгу­хэращ.