«ГъащIэм папщIэ инфраструктурэ» лъэпкъ проектым хыхьэ «ТыншыпIэм хуэщIа къалэ къызэгъэпэщын» къэрал программэм ипкъ иткIэ, Бахъсэн районым ­хыхьэ ПсыкIэху къуажэм и цIыху зэхуэ­сыпIэ­хэр сыт и лъэныкъуэкIи зыхуей хуэзэу зэрагъэпэщыжащ.

Бахъсэн район администрацэм и пресс-IуэхущIапIэм къызэритамкIэ, фэтэр куэду зэ­хэт унэхэм къегъэщIылIа, метр зэбгъузэнатIэу 800 хъу щIыналъэр къагъэщIэрэщIэжащ. ­Хуиту къыщыпкIухьын лъэс лъагъуэхэр ящIащ, тетIысхьэпIэхэр ягъэуващ, уэздыгъэхэр щыфIадзащ, кIэрыхубжьэ­рыху­хэм ­папщIэ кумбыгъэхэр ягъэуващ. ПщIантIэм къы­дыхьэ сабийхэри ягъэгушхуащ. Абыхэм къы­хузэрагъэпэщащ джэгупIэ шына­гъуэн­шэхэр. 
Мы зэманым щIыпIэр щхъуантIагъэхэмкIэ ягъэдахэ: жыг лъахъшэ цIыкIухэр хасащ, мыгувэу удз гъагъэхэр ягъэтIысынущ. 
Бахъсэн районым и жылагъуэхэр зэIузэпэщ щIыным хуэунэтIа лэжьыгъэр жыджэру ирагъэкIуэкI. Къэрал программэхэм зэрыхэтым и фIыгъэкIэ щIыналъэхэм къыщоунэху къуа­жэхэм ущыпсэуныр тынш къыпщызыщI иджырей жылагъуэ щIыпIэ дахэхэр. 

Тхьэхущынэ  Лянэ.