Кишпек элден узакъ бармай хауа шарланы «Кёк-5642» деген кезиулю фестивалы ётгенди.
Аны къураугъа эмда бардырыугъа Къабарты-Малкъарны Жаш тёлюню ишлери жаны бла, Курортла эм туризм министерстволары тири къатышхандыла.
КъМР-ни Жаш тёлюню ишлери жаны бла министерствосуну келечиси Заур Тлехураев билдиргеннге кёре, юч кюнню ичинде хауа шарлада учаргъа, ол тийреде бардырылгъан сейир оюнлагъа, эришиулеге эм тюрлю-тюрлю мастер-класслагъа къатышыргъа 10 мингден артыкъ адам келгенди.
Бизде да адамла хауа шарлада учуудан зауукълукъ табар ючюн, Пятигорскдан специалистле чакъырыладыла. Фестивальгъа къатышханла танг жарыгъан эм кюн атхан кезиуледе аслам жыйыладыла.
Фестивальны ахыр кюню Юйюрню, сюймекликни эм кертичиликни кюнюне тюшгени себепли, концерт программа да къуралгъанды. Ол башланырны аллында уа сахнагъа КъМР-ни жаш тёлюню ишлери жаны бла министри Азамат Люев, курортла эм туризм министри Аскер Бифов, Басхан, Элбрус, Прохладна районланы администрацияларыны таматалары Адиб Абрегов, Отарланы Мухтар, Максим Ломов эм башхала чакъырылгъан эдиле.
Къонакъбайлыкъ этген Адиб Абрегов, жыйылгъанланы бу жарыкъ эм магъаналы да байрам бла алгъышлап, бюгюнлюкде тёрели адетлерибизни, бир бирге сый бере билиуню да къаты сакъларгъа чакъыргъанды.
– Фестивальны жыл сайын бардырыр муратлыбыз. Бери кёп туристле келгенлерин кесигиз кёресиз. Бизни борчубуз ала мындан жаланда ахшы сезимле бла кетерча этиудю. Ол а, бек биринчиден, абаданлагъа, сабийлеге намыс эте билиудю. Келигиз, кесибизни иги жанындан танытдырайыкъ. Быллай акъыл бла бир ненча айны ичинде «Юлгюлю жаш юйюр» деген республикалы эришиу бардырылгъан эди. Ары дери аны муниципал кезиулери да ётгендиле. Ма шёндю биз, ол эришиуде хорлагъан юйюрлеге къызыу къарсла бла тюбеп, саугъалауну башларыкъбыз, – дегенди ол.
Алай бла бек алгъа конкурсну районладан бардырылгъан кезиуюнде хорлагъанла саугъаланнгандыла. Алай бла Элбрус райондан Ёзденланы Хусейни бла Танзиляны, Черек райондан а Занкишиланы Алийни бла Жамиляны юйюрлери айырмалылагъа саналгъандыла.
Огъары Жемталадан Занкишилары уа конкурсну регион кезиуюнде да 2-чи жерге тийишли болгъандыла. Биринчи эм ючюнчю жерлени уа Прохладна райондан Алексей эм Анастасия Скибону, Терк райондан Виталий эм Марьяна Жантиголовланы юйюрлери алгъандыла.
Белгилисича, конкурсха къатышхан юйюрлени аталарына картингде, къол усталыкъда, спортда да кеслерин кёргюзтюрге тюшгенди. Анала уа аш-суу хазырлауда, чыгъармачылыкъ жаны бла да хунерлерин ачыкълагъан эдиле. Ахырында уа жюри хар муниципал къуралыудан бирерин республикалы кезиуге сайлагъанды. Анда уа алчы жерлеге юч юйюрню тийишли кёргендиле.
Биринчи жерге чыкъгъан Алексей эм Анастасия Скиболаны юйюрлери Солдатская станицада жашайдыла. Юйюрню башчысы бюгюнлюкде энчи аскер операциягъа къатышады. Ол себепден саугъалаугъа ана сабийлери бла кеси келген эди.
Саугъалаудан сора уа сахнада концерт кёргюзтюлгенди. Тебердиланы Зухура, Магомет Дзыбов, Альберт Альборов эм башхала фестивальгъа келгенлени кёллерин кётюргендиле.
Таппасханланы Аминат.
