КъМР-ни Башчысыны Парламентге Посланиясында белгиленнген жумушланы жашауда бардырыуну планы къабыл кёрюлгенди. Ол законла чыгъарыучу органны президиумуну жай сессияда ахыргъы жыйылыуунда сюзюлгенди, деп билдиргендиле бизге Парламентни пресс-службасындан.
Контроль эм регламент жаны бла комитетни башчысы Кансаланы Елена план Посланияда салыннган борчладан къуралгъанын, анга жыйырмадан аслам соруу киргенин айтханды. Ол санда законла жарашдырыргъа, «правительстволу сагъатла», «комитетни сагъатларын», «тёгерек столла», комитетлени кенгертилген кенгешлерин эм башха  жумушла бардырыргъа белгиленеди. 
Комитетлеге кюз арты эм жай сессияладан сора Парламентни башчысына план къалай толтурулгъаныны юсюнден белгили этерге буйрукъла берилгендиле. 
Ызы бла депутатла «КъМР-де кёп къатлы юйледе жашагъанла бирге хайырланнган мюлкню тынгылы жангыртыуну юсюнден» законну 25-чи статьясына тюзетиулени сюзгендиле. Законну проектин КъМР-ни Правительствосу республикада коммунал системаны жангыртыугъа бурулгъан келишимни чеклеринде хазырлагъанды. Аны КъМР-ни Правительствосу бла РФ-ни Къурулуш, жашау журт-коммунал мюлк жаны бла министерствосу къабыл кёргендиле. Аны чеклеринде 2027 жылда 1 январьгъа дери жашау журт-коммунал жумушла ючюн тёлеулени жыйышдыргъан бирикдирилген ара къураллыкъды. 
Къурулуш, жашау журт-коммунал мюлк эм отлукъ-энергетика жаны бла комитетни башчысы Заурбек Кумалов ангылатханыча, жашау журтла эм башха мекямла ючюн тёлеулени жыйышдырыуну эмда коммунал жумушла ючюн тёлеулени ресурсла бла жалчытхан компанияланы араларында юлешиуню «КъМР-де кёп къатлы юйлени тынгылы жангыртыу жаны бла регион оператор» фондну жууаплылыгъына бериуню соруулары  сюзюледиле. 
- Законнга кийирилген тюзетиуле тёлеулени жыйышдырыуну игилендириуге бурулупду. Бу ахча уа республикада кёп къатлы юйлени жангыртыуну программасына бериледи,-дегенди комитетни башчысы. 
Законопроект сейирлери болгъан органлагъа эсгертиуле бла тюзетиуле хазырларгъа берилгенди. Ол тынгылы сюзюлгенден сора, Парламентни пленар жыйылыууна кёргюзтюллюкдю. 
Депутатла законла чыгъарыучу органны  2026 жылда жай сессиясыны ишини планына тюрлениулени тинтгендиле.  
Парламентарийле усталыкъгъа файдадан налогну, гитче эм орталыкъ бизнесни айнытыуну, билим бериу, физкультура эм спорт жаны бла федерал законопроектлени тинтип, алагъа тутхучлулукъ этгендиле.
 Жыйылыуда Удмурт Республиканы Россейни урунуу эм социал къоруулау министри А.Котяковха эм РФ-ни пенсия эм социал страхование фондуну  башчысы С.Чирковха тилеклери да сюзюлгенди. Анда сёз сют чыгъаргъан эл мюлклеге  къоркъуулу болумланы тизмесин кенгертиуню юсюнден барады. 
Президиумну келечилери тюрлю-тюрлю бёлюмледе жетишимли уруннган инсанланы КъМР-ни Парламентини Сыйлы грамотасы бла саугъалауну юсюнден оноуну да чыгъаргъандыла.