Сегизинчи июльда КъМР- ни Журналистлерини биригиуюнде халкъла аралы журналист Тимур Шафир бла видеоконференция бардырылгъанды. Ол медиасферада неофашизмге аталгъан эди. Тимур Шафир кёп къыраллада ишлегенди, ол санда Иракда, Палестинада, Сирияда, Суданда эм башхалада. Халкъланы эм башха динле тутханланы араларында болгъан къаугъаланы юсюнден кёп жазгъанды. Видеоконференцияда уа дунияда шёндюгю болумну сюзгенди.
Тимур Шафир бусагъатда неофашистле Интернетни хайырланып, кеслерини идеологияларын жайгъанларын чертгенди. Бютюнда кёп ала социал сетьледе ишлейдиле. Баш муратлары: жамауатны бирлигин бузаргъа, къаугъала башларгъа, къыраллыкъны мурдорларын чайкъалтыргъа. Журналистле аланы жууапха тарталлыкъ тюйюлдюле, ол жумушну следовательле, прокурорла, судьяла этедиле. Алай тинтиу статьялары бла жамауатны эсин алагъа бураллыкъдыла. Тимур Шариф белгилегенди: «Кёбюсюнде неофашистле алимлени оюмларын шагъатха келтиредиле. Къарасанг а – ол «алимни» илмуда хазна адам танымайды неда аллай адам жокъду! Окъуучуланы уа эслерине окъуна келмейди статьяны неда постну жазгъан ётюрюк айтыр, деп. Журналист жик жиги бла неофашистни хар айтханында ётюрюк затланы ачыкъласа, халкъ хар окъугъан затына ийнанып барлыкъ тюйюлдю».
Видеоконференцияда халкъланы араларында бир бирге ышаныу, ийнаныу къалай терк къуруп къалыргъа боллугъуну юсюнден да айтылгъанды. Неофашистле жамауатны «кесибизникилеге» эм «тыш адамлагъа» бёледиле. Сора ол «тыш адамла» бизни жашауубузну бузадыла, эркинликлерибизни сыйырадыла, аланы жокъ этерге керекди, дейдиле. «Башхала», «тыш адамла» кетселе, биз башха тюрлю жашарыкъбыз деген оюм бийлесе бир къауум адамны, ала мурдарлыкъдан артха турмайдыла. Ол заманда «сатхычла» да изленип башлайдыла, репрессияла кюч аладыла. Быллай кезиуде неофашистле кёп материалла басмалайдыла. Алай эсде тутаргъа керекди: жаланда сюдню барды экстремист материалгъа экстремист материалды дерге эркинлиги. Журналистни аллай эркинлиги жокъду. Болсада, журналист ётюрюк затланы ачыкълаяллыкъды, аланы юслеринден жазаргъа да борчлуду. Шёндюгю дунияда хар журналистни ишине кёз къарамы тюрленирге керекди, сёзню кючю чексиз болгъанын сезип, аманлыкъчыланы жолларын кесерге борчлуду. Сёз ючюн, бир халкъны неда адамны даражаларын сындыргъан сёзле бар эселе материалда, журналист аны юсюнден жазып, оюмун жамауатха жетдирсе, къаугъа башланмай къалыргъа болады. Гурушхалыкъны къозгъагъан тынчды, келишиулюкге, мамыр жашаугъа жол тапхан а къыйынды. Гурушхалыкъ бир-бирде урушха бурулуп кетеди, жилтин уллу от болуп къалады.
Тимур Шафир экстремист материаллада керти затла беш процентден кёп болмагъанларын айтханды. Кимни кимге юсгюредиле неофашистле? Халкъланы бир бирлерине. Аны ючюн тарыхны тюрлендиредиле, ётюрюк затланы тохтаусуз басмалайдыла. Дагъыда башха динлени тутханланы араларында да от къабындырадыла. Андан сора да, бир партия башха партияланы юслеринден кёп болмачы хапарла жайгъанларына шагъатлабыз. «Радикалла шартла келтирип къыйнамайдыла кеслерин, адамланы жюреклерине жетер жолла излейдиле, «сизни ыркъыфлайдыла», «сизни сындырадыла», деп, адамланы тюйюшюрге чакъырадыла, – дегенди Тимур Шафир. – Журналист а радикал алай нек айтханын, аны не мураты болгъанын тинтирге керекди, аны оюмуна тынгыларыкъдыла. Журналист тинтиуледен сора кёбюсюнде жамауат шошаяды».
Видеоконференцияда РФ-ни Журналистлерини биригиулерини КъМР-де бёлюмюню башчысы Заур Жилясов: «Шёндюгю дунияда быллай видеоконференцияла бек керекдиле. Битеу Россейден журналистлени келечилери жылгъа бир кере Сочиде жыйылабыз, анда спикерле жангы проблемаланы юсюнден толу хапар айтыучудула. Болсада кезиуден-кезиуге видеоконференция амалны да хайырланабыз», – дегенди.
Байсыланы Марзият.
Сурат авторнуду.
