Бу кюнледе КъМР-ни Жазыучуларыны союзунда жаш адабиятчыланы советини жыйылыуу болгъанды. Анда чыгъармачылыкъ иш бла энди кюрешип башлагъан авторла бла союзну таматалары ушакълашхандыла эмда республиканы жангы фахмуларыны атлары да белгиленнгендиле.
Тюбешиуге КъМР-ни Жазыучуларыны союзуну таматасы Байтуугъанланы Исмайыл, аны орунбасары Лариса Маремкулова, Жазыучула союзну правленини келечиси Пётр Хатуев да къошулгъандыла.
Жаш адабиятчыланы советини таматасы Марина Мазуренко жыйылгъанланы жаш авторла бла шагъырей этгенди, аланы чыгъармачылыкъ ызларын, чыгъармаларыны жанр эм тематика энчиликлерин да белгилеп. Аны хайырындан союзну правленини келечилерине, хар авторну жазыу къолайлыгъын ангылап, аланы айнытыу эмда алагъа себеплик этиу онгланы белгилерча амал чыкъгъанды.
Жыйылыуну чеклеринде Къабарты-Малкъарда адабият бла байламлы бюгюннгю соруула, басманы онглары, эришиулеге бла фестивальлагъа къатышыу, сора жаш фахмуланы айнытыу сюзюлгендиле. Тюбешиу адабиятда тёлюлени байламлыкъларыны магъаналылыкъларын эмда КъМР-ни Жазыучуларыны союзуну жаш тёлюню республиканы жашаууна тири къошаргъа излегенин кёргюзтгенди.
