Къабарты-Малкъарны Жамауат палатасыны Ата журтха сюймекликде юйретиу, добровольчество, жаш тёлю политика эмда ветеранлагъа болушлукъ этиу жаны бла комиссиясыны жыйылыуунда сабийлени бла акъылбалыкъ болмагъанланы тин-ниет жаны бла юйретиуде муниципал жаш тёлю арала къаллай иш тамамлагъанларын тинтгендиле.

Бюгюнлюкде къыралыбызда жаш тёлю политикагъа аслам эс бурулгъанын, власть органланы ишлеринде ол энчи жерни алгъанын белгилей, республиканы жаш тёлюню ишлери жаны бла министрини орунбасары Ахметланы Артур Западны жанындан къажаулукъ ёсген кезиуде аны магъанасы бютюн уллу болгъанын чертгенди. «Бу жаны бла уллу ишни районлада жаш тёлю арала тамамлайдыла, бюгюнлюкде республикада ала тогъуз боладыла, жылны ахырына дери уа ол тарихни онбирге жетдирирге мурат барды. Аны хайыры бла битеу федерал эм регион башламчылыкъла эллени  бла шахарланы  барысында да бардырыладыла. Алай бла бир юйретиу майдан, башха-башха жерледеги жаш адамлагъа жамауат жашаугъа къатышыргъа бирча онгла къураладыла», - деп къошханды ол.
Палатаны башчысыны орунбасары Тюменланы Мурадин жаш тёлю арала ветеран биригиуле бла да байламлыкъла жюрютгенлерине, аланы юслери бла жаш адамлагъа кеслерини башламчылыкъларын толтурургъа амалла чыкъгъанларына эс бургъанды.
«Сабийлени патриот ниетде юйретиу, тарых кертиликни къоруулау, энчи аскер операциягъа къатышханлагъа болушуу, тёлюлени араларында байламлыкъланы кючлеу къырал политиканы эм магъаналы борчларыдыла. Бу иш къалай толтурулгъанына кёре боллукъду тёрели тин хазнаны сакъланыуу, республикабызны айныуу да», - дегенди палатаны комиссиясыны башчысы Владимир Абаноков. 
Жетишимлени юслеринден айта, жыйылгъанла жаш тёлю политиканы бардыргъанда, жаш адамланы сейирлерин да эсге алыргъа кереклисин чертгендиле. Ала бу жаны бла иш  жетишимли болур ючюн, жаш адамла туугъан жерлерин айнытыргъа, усталыкъ, инсанлыкъ жаны бла да гитче Ата журтларын ёсдюрюрге, тыш жерледе усталыкъ билим алгъанла ишлерге туугъан эллерине бла шахарларына къайтыргъа излерча мадарла этерге керекди, деген оюмгъа келгендиле. Ахырында, жыйылыуну эсеплерине кёре, сейирлери болгъан органлагъа эсгертиуле жарашдырылгъандыла.

Кульчаланы Зульфия.