Адыгэ Республикэм и Сурэт галерее Мейкъуапэ дэтым къыщызэIуахащ сурэтыщI-модельер цIэрыIуэхэу Сэралъп Мадинэрэ ХьэцIыкIу Милэрэ я IэдакъэщIэкIхэм я гъэлъэгъуэныгъэ. Пэшым щегъэувэкIа хьэпшыпхэр апхуэдизкIэ дахэщи, нэр пIэпех, тхыпхъэщIыпхъэу а фэилъхьэгъуэхэр зэрыгъэщIэрэщIар зэпэпплъыхь пэтми, гум зигъэнщIыркъым.
Мы гъэлъэгъуэныгъэм IуэхугъуитI щызэхэухуэнащ - Сэралъп Мадинэ и «Нанэ и пщIыхьэпIэмрэ» ХьэцIыкIу Милэ и «Сэ сытхыпхъэщ» жыхуиIэмрэ. Бзылъхугъэ зэчиифIэхэм зы утыкум фащэмрэ тхыпхъэщIыпхъэмрэ щызэпащIэжащ, блэкIамрэ нобэмрэ зэрызэгъунэгъур къагъэлъагъуэу дамыгъэ IупщIхэмрэ уэгум щес щэкI псынщIэм и толъкъунхэм ягъэщIэращIэ фащэхэмрэ зэрызэкIур наIуэ къащIу. Пэшым щалъагъу хьэпшыпхэм яIэ теплъэр цIыхухэр зэсахэракъым, ауэ абы къыщызэхуэсахэм къызэрыхагъэщамкIэ, зэ IуплъэгъуэкIэ тыншу «укъоджэ» псоми зэдащIэ адыгэ кодым. Аращ Сэралъп Мадинэрэ ХьэцIыкIу Милэрэ я зэдэлэжьэныгъэм лъабжьэ хуэхъури.
Сэралъп Мадинэ дежкIэ мыр Мейкъуапэ къалэм къыщызэригъэпэщ етхуанэ гъэлъэгъуэныгъэщ. ИкIи Кавказ Ищхъэрэм щыцIэрыIуэ сурэтыщIым, дизайнерым и дэтхэнэ гъэлъэгъуэныгъэщIэри япэрейхэм зыгуэркIэ къащхьэщокI, щIэ куэд къегупсыс.
- Мыбы щыфлъагъу хьэпшып псори япэу утыку къитхьэу аращ. Манекенхэри дизайнер Сэралъп Мадинэ и IэдакъэщIэкIхэракъым зытегъэпсыхьар, ар джэгукIэм и теплъэм нэхъ теухуащ. Фащэхэм я театру жыпIэ хъу-нущ, тхыпхъэщIыпхъэхэр фэилъхьэгъуэхэм къатекIри, езыхэм я плIанэпэ зэрагъэпэщащ. А псоми гупсысэр еузэщI, зрегъэубгъу, зыужьыныгъэм толажьэ, - жиIащ Мадинэ.
Апхуэдэу сурэтыщIым къыхигъэщащ зэкъуэш республикэхэм я адыгэ щэнхабзэр тхыдэ и лъэныкъуэкIэ Щхьэгуащэ псым быдэу зэрепхар. Аращ «Щхьэгуащэ деж щыслъэгъуа пщIыхь» фIэщыгъэр дамыгъэу щIыщытыр. Пэ-шым щегъэувэкIа фэилъхьэгъуэхэр псори хужьыфэщ, графикэ тхыпхъэщIыпхъэхэр къытощ. УмыгъэщIэгъуэн плъэкIыркъым, а хужьыфэ-хэм я гъусэу къигъэсэбэпа щэкI гъуабжафэхэм фащэм ныбжь тридзэ щIыкIэу узэрыIуигъаплъэр.
Сэралъп Мадинэ и IэдакъэщIэкIхэм тетхыхьыну фIэфIщ, а дамыгъэхэмрэ Iэрытххэмрэ я нэщэнэу жыпIэ хъунущ «Нанэ и пщIыхьэпIэ» зыфIища проектым.
- Мы гъэлъэгъуэныгъэр къызэрымыкIуэщ, гурыщIэ хьэлэмэтхэр къызет, сщыгъупщэжа пэлъытэ, аддэ гурыщIэм щыгъэпщкIуа гукъэкIыжхэр къегъэушыж. Экспонату мыбы щытлъагъум псэ яIут хуэдэщ. Мыбыхэм таурыхъым и дунейм ухашэ икIи, пэж дыдэу, пщIыхьэпIэм ухэт хуэдэу къыпщохъу. Иджыри зэ хьэкъ пщещI ди фащэм и дахагъыр! Сыт хуэдиз пкъыгъуэ, сыт хуэдиз къулеигъэ хэлъ мы ди лъапIэныгъэм! - жеIэ Адыгэ Республикэм щIыхь зиIэ и артисткэ Даур Жаннэ.
Пэшым щегъэувэкIахэм уащыхэплъэкIэ, нэрылъагъущ, анэшхуэхэм зэрахабзэу, бзыхьэхуэхэр, бостеяпхъэхэр хъумэныр, ахэр щIэрыщIэу утыку къихьэжыныр гъэлъэгъуэныгъэм и купщIэу зэрыщытыр. Гъэлъэгъуэныгъэм гуащэ- хэр къызэрыщагъэсэбэпари IуэхущIэкъым, абыхэм езыхэм я къалэн ягъэзащIэ. Ауэ мы проектым гуащэм и фIыгъэкIэ творческэ Iуэхум щIэщыгъуэу хэт IэмалыщIэхэр къэгъэлъэгъуа щыхъуащ.
- Пасэм адыгэ хъыджэбз цIыкIухэр зэрыджэгун хьэпшып яIакъым. Езыхэм къагупсысу арат. Абы къыхэкIыу, гуащэ къэс езым и хъыбар иIэжт. Си дежкIэ мы гъэлъэгъуэныгъэр цIыхубз хъуэпсапIэр нахуапIэ зыщI дахагъэ гуэрщ, - къыхигъэщащ Адыгейм и цIыхубэ сурэтыщI Еутых Iэсият.
ТхыпхъэщIыпхъэмрэ абы и къэгъэсэбэпыкIэхэмрэ и лэжьыгъэхэм щиджу жыпIэ хъунущ ХьэцIыкIу Мили. Мы гъэлъэгъуэныгъэми абы япэу утыку къыщрихьащ трафарет техникэм тету щIа графикэ сурэт 12-р.
Езы Милэ зэрыжиIамкIэ, абы и проектыр зытеухуар адыгэ тхыпхъэщIыпхъэхэр къэхутэнырщ, ахэр художественнэ гъэпсыкIэм тету тедзэнырщ.
Къэбэрдей-Балъкъэрым щыщ бзылъхугъитIым я «творческэ зэпсэлъэныгъэм» тыншу ухыхьэну Iэмал къует ахэр илъэс бжыгъэ куэд хъуауэ зэрызэдэлажьэм. Абыхэм къыхагъэщащ Адыгейм къыщызэIуаха гъэлъэгъуэныгъэр адыгэ псори зэзыпх къежьапIэм хуеплъэкIыжынымкIэ Iэмал хъарзынэу зэрыщытыр.
«Щхьэгуащэ деж щыслъэгъуа пщIыхь» гъэлъэгъуэныгъэр бадзэуэгъуэм и 26 пщIондэ екIуэкIынущ.
Тхыгъэри сурэтхэри
Дарий Дахэнур ейщ.
