КъМР-ни Башчысы Казбек Коков быйыл, бир къырал экзаменде 100 балл алып, билимлери аламат болгъанларын кёргюзтген жашла эмда къызла бла, дагъыда битеуроссей олимпиадалада хорлам болдургъанла эмда алчы жерлеге чыкъгъанла бла тюбешгенди.
«Хар бири бла да энчи ушакъ этерге онг чыкъгъанына бек къууаннганма. Бизни деменгили къыралыбызда айырмалыланы санында болуу бек уллу жетишимди! Аны бла бирге уа школну, саулай Къабарты-Малкъарны да къыйынларына бийик багъа бериудю.  Устазлагъа, насийхатчылагъа, ата-аналагъа да баш урууду. Сизсиз аллай жетишимге жетер амал боллукъ тюйюл эди. 
Ёсюп келген тёлюге окъургъа шёндюгю заманны бек иги онгларын къурауну къайгъысын биз кюн сайын да этебиз. Билим бериу бек тынгылы болургъа, ол ким да окъуялырча къуралыргъа тийишлиди. Ол борч къалай толтурулгъанына Президентибиз Владимир Путин дайым да кёз-къулакъ болгъанлай турады. 
Къабарты-Малкъарда бюгюнлюкде окъуна ахшы кёрюмдюле бардыла, алай бизни ала бла тохтап къалыр умутубуз жокъду. Школда окъутуу амалланы игилендире, устазны даражасын кётюре барлыкъбыз.
Ушакъны кезиуюнде сёз бийик билим алыуну, медицинаны, архитектураны, шахарда къурулушну эмда кёп башха затланы юслеринден баргъанды. Ата журтха кертичиликни, шёндюгю дунияда къаллай къоркъуула чыкъгъанларыны юслеринден да сёлешгенбиз – жаш адамланы неге да сейирлери уллуду! 
Мектепледе окъууларын бошагъан жашлагъа бла къызлагъа не уллу муратларына да жетерлерин тежейме!  Хар биригиз да, тынгылы усталыкъ алып, Къабарты-Малкъарны жашнаууна бла айныууна тийишли юлюш къошарыгъыгъызгъа толусунлай ийнанама.
Ол жолугъуз тынч да, жетишимли да болсун!» - деп жазгъанды КъМР-ни Башчысы Казбек Коков МАХ-да энчи каналында.