КъМР-ни Жарыкъландырыу эм илму министерствосунда бу кюнледе бардырылгъан пресс-конференцияда ведомствону башчысы Анзор Езаов ЕГЭ-лени эсеплерини юслеринден тынгылы билдириу этгенди. Ол айтханнга кёре, быйыл мектеплени бошап чыкъгъанланы араларында кёп балла алгъанланы саны иги да ёсгенди, борчлу халда берилген экзаменледен ёталмагъанланы саны да танг кесек азайгъанды.
Министр быллай шартланы туура этгенди: быйыл регионда борчлу халда ётерге керек болгъан сынау ишлеге къатышыргъа эркинлик 5260 окъуучугъа берилгенди. Аладан 4603-сю 11-чи классланы бошагъанладыла. Дагъыда белгилерча бир шарт: быйыл алгъадан окъуна кючлерин сынаргъа сюйген окъуучуланы саны да иги да кёп болгъанды. Аллайла битеу да 448 жаш бла къыз бар эдиле. Сынау ишлени бардырыр ючюн деп, республикада 23 пункт къуралгъанды.
Анзор Езаов эсепле къууандыргъанларын да чертгенди. «Ала былтырдан эсе игидиле. Биологиядан орта балл тогъуз пунктха кётюрюлгенди, ол а бек иги кёрюмдюдю. Физикадан сынаула бергенлени балларына да къошулгъанды – былтыр 54-ден 59-гъа дери. Математикадан бла орус тилден да бийик кёрюмдюле болдурулгъандыла», – деп билдиргенди министр.
– Былайда бютюн бек не затны айырып айтыргъа тийишлиди? Биринчиден, битеу предметледен орталыкъ балл ёсгенди. Ол а бизни къууандырмай къоймайды. Энчи айтханда, биологиядан балла бютюн кёп къошулгъандыла – битеу да 9 балл. Саулай алгъанда, ол аламат кёрюмдюдю, - деп къошханды ведомствону таматасы.
Пресс-конференцияда жюз балл алгъанлагъа энчи эс бурулмай къалмагъанды. Белгиленнгенича, быйыл республикада 22 адам ол бийикликге жетгенди. Ол а, былтыр бла тенглешдиргенде, къыркъ процентге асламды. Бийик балла сегиз предметден алыннгандыла. Аланы алгъанла уа жети муниципал райондан 14 мектепни окъуучуларыдыла.
Министр Басхан районда артыкъ уллу болмагъан мектепни юлгюге келтиргенди. Анда бир устаз химиядан жюз балл алгъан сабийлени хазырлайды. Мектепни бошап чыкъгъан экеулен а эки кере жюз балл къоллу болгъандыла.
Аламат кёрюмдюлеге да къарамай, Анзор Езаов «жюзге» артыкъ уллу эс бурур кереклиси жокъду, дегенди. «Жюз баллгъа бир атлам жеталмай къалгъанла да аз тюйюлдюле. Ала къошакъ кюнледе дагъыда кючлерин сынаргъа сюедиле»,- деп, министр, орус тилни бла математиканы санамай, алада алыкъа къошакъ кюнле болгъанларын билдиргенди.
Борчлу халда сынау ишле баргъан кюнледе аудиториядан къысталгъанла неда бир тюрлю сылтау бла алагъа къатышыргъа эркин этилмегенлени юслеринден айта, министр алллайла жаланда 14 болгъанларын билдиргенди. Алты жыл мындан алгъа уа аланы саны 90-нга жете эди, дегенди.
Саулай алгъанда, министр сынаула тийишлисича ётгендиле деп, алай санайды. Дагъыда техника жаны бла чырмаула иги кесекге азайгъанларын, ала бла байламлы бир тюрлю чырмаула чыкъмагъанларын да чертгенди.
Санларында къыяулары болгъан сабийлеге къаллай болумла къуралгъанларыны юсюнден сёз баргъанда, Анзор Езаов ала экзаменлени юйлеринден чыкъмай бергенлерин, алагъа белгиленнген заман а бир бла жарым сагъатха асламыракъ болгъанын, ауузланыргъа, дарманларын ичерге да заман бёлюннгенин да билдиргенди. Аллай сабийлени асламысы сынау ишлени тенглери бла бирге битеулю пунктлада берирге ыразылыкъларын да билдиргенлерин да айтханды.
Ахырында Анзор Езаов устазлагъа эмда сынау ишлени бардырыргъа къатышханлагъа жюрек ыразылыгъын билдиргенди эмда сабийлени жетишимлеринде аланы къыйынлары уллу болгъанын чертгенди. «Сынау ишле бла байламлы жорукъла къаты болгъанларына да къарамай, устазла ары келген жашла бла къызла артыкъ бек къайгъы этмезча болум къураргъа кюрешгендиле. Сынау ишлени баш толкъуну жетишимли болгъанды, ахыр эсепле уа къошакъ экзаменле бошалгъандан сора белгили боллукъдула»,- дегенди министр.
Холаланы Марзият.
