КъБР-м узыншагъэр хъумэнымкIэ и министр Къалэбатэ Рустам Бахъсэн районым хыхьэ Къулъкъужын Ипщэ къуажэм и амбулаторэм и лэжьыгъэр зэрекIуэкIым зыщигъэгъуэзащ.
IуэхущIапIэр «ГъащIэ кIыхь икIи жыджэр» лъэпкъ проектым (пэхуэщIэм) хыхьэ «ЦIыхухэм япэ дэIэпыкъуныгъэхэр щрат медицинэ IэнатIэхэр къэгъэщIэрэщIэжын» щIыналъэ программэмкIэ сыт и лъэныкъуэкIи зыхуей хуэзэу зэрагъэпэщыжащ. IуэхущIапIэм и унащхьэр зэрахъуэкIащ, унэ щIыбыр къагъэщIэрэщIэжащ, инженер коммуникацэхэр, бжэ-щхьэгъубжэхэр щIэкIэ яхъуэжащ, и кIуэцIыр зэрахьащ. КъищынэмыщIауэ, медицинэ дэIэпыкъуныгъэхэр къызэгъэпэщынымкIэ иджырей мардэхэм тету унэм и кIуэцIыр щIэрыщIэу яубзыхужащ.
Иджыпсту амбулаторэр жыпхъэщIэм тету мэлажьэ. IэщIагъэлIхэм сымаджэхэм абыхэм диагностикэ щащI, щеIэзэ пэшхэр унэлъащIэхэмрэ IэмэпсымэхэмкIэ ирикъуу къызэгъэпэщащ. IуэхущIапIэм медицинэ дэIэпыкъуныгъэ щагъуэт цIыху 3000-м щIигъум, абыхэм ящыщу 663-р сабийщ.
Министрым жиIащ къуажэхэм япэ медико-санитар дэIэпыкъуныгъэхэр щегъэфIэкIуэнымкIэ IэнатIэхэм щрагъэкIуэкI зэхъуэкIыныгъэхэм мыхьэнэшхуэ зэраIэр икIи къыхигъэщащ 2028 гъэм и кIэух пщIондэ лъэпкъ проектым ипкъ иткIэ узыншагъэр хъумэнымкIэ объекту 3 зэрыщаухуэнур, 2 зэрыщызэрагъэпэщыжынур.
Апхуэдэу Къалэбатэ Рустам зригъэлъэгъуащ Прохладнэ къалэм дэт сабий поликлиникэм щрагъэкIуэкI зэгъэпэщыжыныгъэхэр. УхуакIуэхэмрэ медицинэ IэщIагъэлIхэмрэ епсэлъа нэужь, абы пщэрылъ ящищIащ лэжьыгъэр и чэзум зэраухыным хущIэкъуну, ар зэрагъэзащIэм и фIагъым ткIийуэ кIэлъыплъыну, IуэхущIапIэм къекIуэлIэну сабийхэмрэ адэ-анэхэмрэ я тыншыпIэм хуэщIауэ и кIуэцIыр яубзыхуну.
Мы зэманым поликлиникэм и унащхьэр зэрахъуэкI. АдэкIэ щхьэгъубжэхэр, инженер коммуникацэхэр хъуэжыныр, унэм и щIыбри, и кIуэцIри зыхуей хуэгъэзэжыныр къапэщылъщ.
Амбулаторэм и инагъыр метр зэбгъузэнатIэу минитIым ноблагъэ. Ар мыхьэнэшхуэ зиIэ социальнэ IэнатIэщ, сыт щхьэкIэ жыпIэмэ, илъэс къэс мыбы сабий мин 23-м нэблагъэм медицинэ дэIэпыкъуныгъэр щагъуэт.
Поликлиникэм зэгъэпэщыжыныгъэхэр щекIуэкIыхукIэ, абы егъэщIылIахэм зыхуэныкъуэ Iуэхутхьэбзэхэр щыхуащIэнущ Прохладнэ район сымаджэщым. Лэжьыгъэр 2028 гъэм и кIэм ирихьэлIэу нагъэсыну я мурадщ.
ЩХЬЭЩЭМЫЩI Изэ.
