1 июльда Россейде Аскер къаугъаланы ветеранларыны кюню белгиленеди. Бу байрам 2009 жылда жамауат организацияланы башламчылыкълары бла тохташдырылгъанды, аны къырал даражасы алыкъа жокъ эсе да, Россейни регионларында, анга аталып, тюрлю-тюрлю жыйылыула, тюбешиуле, концертле бардырыладыла.
Бюгюнлюкде къыралда аскер къаугъаланы ветераны деген атны эки миллионнга жууукъ адам жюрютеди – Афганистанда интернационал борчларын толтургъанла, Чеченде бла Сирияда террористлеге къажау тургъанла, бюгюнлюкде энчи аскер операцияда Россейни эркинлигин, жалынчакъсызлыгъын сакълагъанла. Бу байрам жигитлени тёлюлерине сый берилгенини белгисиди.
Гюлле салыу, кёрмюч
Къабарты-Малкъарда уа байрамны чеклеринде «Къарындаш къарындаш ючюн» деген биринчи форум къуралгъанды. Анга къатышханла Нальчикде Жаш тёлюню юйюнде жыйылгъандыла. Алай аны аллында уа солуу паркда «Ёмюрлюк от» мемориалда эмда Къоз тереклени бахчасында Афганистанда урушну ветеранларыны эсгертмесинде митингле бардыргъандыла эмда Ата журтну къоруулай жан бергенлени хурметлерине эсгертмелеге гюлле салгъандыла.
Жаш тёлюню юйюне кирген жерде уа афган къазауатны бла СВО-ну ветеранларыны, 2005 жылда Нальчикге чабыуул этилгенде эмда террористлеге къажау операцияланы кезиуюнде жан берген полициячыланы суратларындан кёрмюч къуралгъанды. Тюбешиу башланырдан алгъа къонакъла аны бла шагъырей болгъандыла.
Форумгъа келгенлени арасында КъМР-ни Правительствосуну башчысыны биринчи орунбасары Залим Кашироков, жаш тёлюню ишлери жаны бла министр Азамат Люев, Адамны эркинликлери жаны бла уполномоченный Зумакъулланы Борис, КъМР-ни Парламентини депутатлары Герман Шевчук бла Тимур Тхагалегов эм башхала бар эдиле. Тюбешиу Россейни гимни бла башланнганды.
Форумну ача, аны бардыргъан Атталаны Азнор байрам тюрлю-тюрлю къаугъалада бла операциялада Ата журтубузну сейирлерин сакълагъанлагъа хурмет этилгенин, ол Ата журтха сюймекликни, берген антларына кертиликни белгиси болгъанын, ёлюмню бетине къарагъан батырла, сынаулагъа къарамай, бюгюн да ал тизгинде тургъанларын, ала ёсюп келген тёлюню юйретиу жаны бла къыйын ишни кеслерине алгъанларын чертгенди. Ол Ата журтубузну эркинлиги ючюн жан бергенлени хурметине бир минут шумсуз турургъа чакъыргъанды.
Сыйлы борч
Залим Кашироков, форумгъа келгенлени алгъышлай, жыйылыу быйыл биринчи кере къуралгъанын, алай ол тёрелиге буруллугъуна ышаннганын билдиргенди. Ол КъМР-ни Башчысы Казбек Коков ветеранланы, республиканы жамауатын саулай алгъышлагъанын да айтханды. «Аны сёзлерине жаланда алгъышланы къошаргъа сюеме. Быллай тюбешиуле кенгерип, хар ветеран да къайгъырыулукъну, аны сынауу, билими керек болгъанын сезерча этерге керекбиз»,-дегенди ол.
Залим Карачаевич тюбешиуге ветеранланы тюрлю-тюрлю тёлюлери жыйылгъанларын айтханды. Эр кишиге уа Ата журтну къоруулау не заманда да эм сыйлы борч болгъанды.
- Бюгюн бизде ачыкъ атышыула жокъдула, алай душман жаш тёлюбюз ючюн къазауат бардырады. Сиз аланы юйретиуню къолгъа алсагъыз, ёсюп келген тёлюбюзню эм кючлю «сауутлары» кюч, къарыу, таукеллик, инсанлыкъ сезим боллукъдула. Форум «Къарындаш къарындаш ючюн» деп бошдан аталмагъанды. Фронтда миллетге, диннге, жыл саннга кёре юлешиниу жокъду, аскерчиле барысы да къарындашладыла. Бу сёзню магъанасы уа теренди – ышаныулукъ, билеклик, бир бирге къайгъырыу, - деп, Залим Кашироков ветеранланы байрам бла энтта бир кере алгъышлагъанды.
Тёрелени андан ары
бардыра
Зумакъулланы Борис ветеран деген сёзню магъанасын кеси сезгенди – ол Афганистанда къазауатха къатышханды, кёп жылланы ичинде Ата журтха къуллукъ этиуню юлгюсюн кёргюзтюп келеди. Борис Мустафаевич, аскерчи нёгерлерин алгъышлай, бу жыйылыугъа кёлю кётюрюлюп къатышханын айтханды. «Ата журтубузну къоруулаучуларыны кёп тёлюлерин туугъан журтубузгъа сюймеклик, анга кертичилик бирикдиргендиле. Жарсыугъа, кёпле сермеш аулакълада къалгъандыла, алай биз, саула, аланы эсибизде тутаргъа, батырлыкъларын жюреклерибизде жюрютюрге керекбиз», - дегенди.
Борис Мустафаевич бюгюнлюкде жаш адамла, тамата тёлюлени хорлам тёрелерин андан ары бардыра, кеслерини борчларын энчи аскер операцияда толтургъанларын айтханды: «Ала жууукъ заманда хорлам бла къайтырыкъларына ишеклик жокъду», - дегенди.
Аскер къарындашлыкъ
Форумда афган урушну ветеранларына энчи хурмет берилгенди. «Афганистанда къазауатны бла энчи аскер операцияланы ветеранларыны союзу» битеуроссей организацияны регион бёлюмюню башчысы, Парламентни депутаты Тимур Тхагалегов аскер нёгерлерине алгъышлаула кёп жерледен келгенлерин белгилегенди.
- Бюгюн тюрлю-тюрлю къазауатлада болгъанланы бирге жыйылгъанлары энчи магъаналыды. Шёндю къыралыбызгъа сынаулу кезиудю. Барыбыз да бир болуп, къыралыбызны сейирлерин сакъларгъа, жаш адамларыбызны тюз ниетлеге юйретирге борчлубуз, - дегенди.
Афган урушдан ётгенлеге бютюнда къыйын болгъанын белгилегенди ол – къазауат баргъан жылланы ичинде къырал чачылып, аскерчилеге кёз къарам тюрленип, аланы жигитликлери учуз этилген эди. «Алай биз сынмагъанбыз, ол сынауладан да ётгенбиз. Бюгюн аскер нёгерлерим республиканы жамауат жашаууна тири къатышадыла, ёсюп келген тёлю бла ишлейдиле. Афган урушну ветеранларыны жашлары уа энчи аскер операцияда инсанлыкъ борчларын толтурадыла. Ол а тёлюлени араларында байламлыкъны белгисиди», - деп, ол ветеран организацияланы бирликни сакъларгъа, ёсюп келген тёлюге мамырлыкъны къорууларгъа чакъыргъанды.
Жюрек кётюрюулюкде
Форум, кертиси бла да, Ата журтну къоруулаучуларыны кёп тёлюлерин бирикдиргенди: аскер кийимледе, кёкюреклеринде орденле бла майдалла жылтырай, афган урушну, Абхазияда къазауатны, 2005 жылда Нальчикге чабыуул этилгенде, Чеченде террористлеге къажау тургъан батырла бирге олтургъандыла, ушакъла бардыргъандыла, алгъышлагъа тынгылагъандыла.
Аланы батырлыкъларын залда болгъан жаш адамла терен сезер ючюн а, хар къазауатны юсюнден къысха роликле кёргюзтюлгендиле.
Байрамгъа къысха концерт да хазырланнганды. Жыйылгъанлагъа афган урушну ветераны, «Кишилиги ючюн» майдал бла саугъаланнган Артур Дышеков жырын саугъа этгенди. Диана Соблирова айтхан «Два чёрных дня» жыргъа уа жыйылгъанла ёрге туруп тынгылагъандыла. Бу жыр Нальчикге чабыууллукъну 20-жыллыгъына аталгъанды, ол ачыулу къара кюнлени, республиканы ара шахарын сакълагъан батырланы юслеринденди.
Жаш жырчы Артур Дышеков а «Тише» жырын Ата журтну батыр къоруулаучуларына, фронтда жашаугъа, аскер къарындашлыкъгъа жоралагъанды. Анга да ветеранла бла форумгъа къатышханла ёрге туруп тынгылагъандыла.
Тикаланы Фатима.
Суратланы автор алгъанды.
