Къабарты-Малкъарны Правительствосуну кенгешинде ырысхы бла байламлы халланы, саулукъ сакълауну, социал жаны бла себеплик этиуню, къоркъуусузлукъну жалчытыуну эмда талай башха жумушла бла байламлы  бегимлени бла буйрукъланы проектлери  сюзюлгендиле.
Аладан бири  Къабарты-Малкъар Республиканы 2040 жылгъа дери социал эмда экономика жаны бла айнытыуну  стратегиясын тамамлау  мадарланы планы бла байламлыды.    Анда  регионну айнытыуну  узакъ болжаллы жолларыны, ол санда экономиканы ёсюуюню, инфраструктура проектлени, адамланы жашауларын игилендириуню юслеринден да  айтылады.
Республиканы иелигинде болгъан бир мюлкню Басхан районда Баксанёнок элге хакъсыз берирге оноу этилгенди. Аны бла ол муниципалитетни ырысхы-техника онглары игиленирикди.
Регионну «Кёп фатарлы юйледе битеулю мюлкге ремонт этиуню юсюнден» законуна тюрлениуле кийирилгендиле. Ала жангыртыу ишлени ахча бла жалчытыу эмда аланы бардырыугъа контроль этиу бла байламлыдыла.
Диабет эмда онкология ауруулугъа къажау, сора медицина реабилитация бардырыу жаны бла регион программалагъа да талай тюрлениу кийирилгенди. Аны хайыры бла  медицина болушлукъ  эмда багъыуда болгъан саусузланы жашау болумлары игиленирикдиле,  деп ышаныу барды.
Бегимледен бири бла къыйын жашау болумгъа тюшген талай инсаннга болушлукъ берирге келишгендиле – быллай оноула Правительствону кёп къалмай хар кенгешинде да чыгъарыладыла. Дагъыда сауутланы, чачдырыучу затланы эмда аллай устройстволаны кеслери ыразылыкълары бла  къыралгъа бергенлени ахча бла онгдурургъа оноу этилгенди.
Андан сора да,  къурулуш бёлюмде проектлеге кёз-къулакъ болургъа онг берген информациялы амалны сингдириу бла кюрешген, дагъыда жерлешлерибизге тышындан бери кёчерге себеплик этген ведомствола аралы комиссияланы къауумларына тюрлениуле кийирилгендиле.

Улбашланы Мурат.