Вэрокъуэ Владимир и цIэр зезыхьэ ЩэнхабзэмкIэ фондым зэхыхьэ гуапэ щрагъэкIуэкIащ, Славянхэм я зэныбжьэгъугъэмрэ зэкъуэтыныгъэмрэ я махуэм теухуауэ (мэкъуауэгъуэм и 25-м ягъэлъапIэ).
Мыпхуэдэ зэхыхьэхэм щызэрохьэлIэ республикэм лъэпкъ-щэнхабзэ зэгухьэныгъэу щыIэхэм я лIыкIуэхэр, къэрал къулыкъущIэхэм ящыщхэр, гъуазджэм телажьэ гупхэм хэтхэр, жылагъуэ зэгухьэныгъэхэм къабгъэдэкIахэр, щIалэгъуалэр, щэнхабзэм и лэжьакIуэхэр, жыпIэнурамэ, мамырыгъэр зэгурыIуэныгъэр, хабзэ дахэхэр хъума зэрыхъуным тезыгъащIэхэр. А Iуэхум ди щIыналъэм нэхъ щыхуэлажьэр «Вече» жылагъуэ зэгухьэныгъэу урысхэм я тхыдэмрэ щэнхабзэмрэ хъумэным зи гуащIэ хэзылъхьэрщ. Иужьрей илъэсхэм зыкъызэрагъэлъэгъуамкIи, мыбы хэтхэм ди республикэм щэнхабзэм зыщиужьынымкIэ жэрдэмыщIэхэр къыхалъхьэ къудейкъым, атIэ цIыху къызэрыгуэкIхэр зыхуей-зыхуэныкъуэхэмкIэ къызэгъэпэща зэрыхъуным теухуауэ къэрал IэнатIэхэм зыпащIэнымкIэ, Iуэху зэрыщыIэр кърагъэщIэнымкIэ сэбэп мэхъу.
Зэхуэсым хэтащ Дунейпсо Адыгэ Хасэм и тхьэмадэ, Урысейм и лъэпкъхэм я ассамблеем и къудамэу КъБР-м щыIэм и унафэщI, УФ-м и Президентым деж Лъэпкъ IуэхухэмкIэ щыIэ советым хэт Сэхъурокъуэ Хьэутий, КъБР-м щэнхабзэмкIэ и министр Къумахуэ Мухьэдин, КъБР-м щIалэгъуалэм я IуэхухэмкIэ и министр Лу Азэмэт, КъБР-м и Парламентым ЩэнхабзэмкIэ, граждэн жылагъуэм зегъэужьынымкIэ, хъыбарегъащIэ политикэмкIэ и комитетым и унафэщI Текуев Амырбий, «Вече» жылагъуэ зэгухьэныгъэм и унафэщI, Къэбэрдей-Балъкъэрым и Жылагъуэ палатэм хэт Литвинов Роман, «Сябры» зэгухьэныгъэм и унафэщI Ярмоленкэ Анатолий, «Днипро» щэнхабзэмкIэ центрым и унафэщI Ивановэ Светланэ, Вэрокъуэ Владимир и цIэр зезыхьэ ЩэнхабзэмкIэ фондым и унафэщI Мэкъуауэ Люазэ, хъыбарегъащIэ IэнатIэхэм, дин IуэхущIапIэхэм я лэжьакIуэхэр, щIалэгъуалэр.
Зи гугъу тщIы фондым и IуэхущIапIэм и пэIущIэ пэшым и зы плIанэпэм деж щыт стIолым телът лъэпкъхэм я шхыныгъуэхэр.
Лъэпкъ зэныбжьэгъугъэм теухуа зэIущIэр Урысей Федерацэмрэ Къэбэрдей-Балъкъэрымрэ я гимнхэмкIэ къызэIуахащ.
Япэу псалъэ зратар пшыхьыр зи жэрдэм «Вече» жылагъуэ зэгухьэныгъэм и унафэщI Литвинов Романти, абы и гугъу ищIащ екIуэкI Iуэхум и мыхьэнэм.
- Зэкъуэтыныгъэмрэ зэныбжьэгъуныгъэмрэ и махуэшхуэм псом хуэмыдэу дигу къыдогъэкIыж дзэ Iуэху хэхар щекIуэкI щIыпIэм щыIэ, ди Хэкум и уэгур мамыру щытыным псэемыблэжу щIэзэу ди лIыхъужьхэр. ФIыщIэ ин яхудощI апхуэдэ щIалэ къуданхэр зи унагъуэ къикIа адэ-анэхэм. Абыхэм я лIыгъэр и щапхъэ наIуэщ зэкъуэтыныгъэр сыт хуэдэ мыхъумыщIагъэми зэрытекIуэм. АтIэ, адыгэхэр, балъкъэрхэр, урысхэр, ди къэралым щыпсэу псори нэхъ быдэжу дызэкъуэвгъэувэ, ди зэхуэдэ унэр - Урысейр - мамырыгъэм, щэнхабзэм, ехъулIэныгъэхэм я быдапIэу щытын икIи къэкIуэну щIэблэм гъуазэ яхуэхъун папщIэ.
Ди Хэкум и тхыдэр гъэнщIащ лIыхъужьыгъэрэ зэдэIэпыкъуныгъэкIэ. Дэтхэнэ лъэпкъми и хабзэм пщIэ хуэпщIыным къикIыр уи щэнхабзэм и лъабжьэр бгъэбыдэнырщ. БлэкIам и дерсхэр зыщыдвмыгъэгъупщэ, зэкъуэтыныгъэмрэ зэгурыIуэныгъэмрэ я лъабжьэ быдэм тещIыхьа Урысейм и къэкIуэнур адэкIи екIуу щытын папщIэ, - жиIащ Литвиновым.
Сэхъурокъуэ Хьэутий къыщыпсалъэм къыхигъэщащ, лъэпкъ зэкъуэтыныгъэм нэхъ лъапIэ зэрыщымыIэр.
- 2026 гъэр Урысейм и лъэпкъхэм я зэкъуэтыныгъэм и илъэсу гъэувыным теухуауэ Урысей Федерацэм и Президент Путин Владимир къищта унафэр лъэпкъ куэду зэхэс ди къэралым и лъапIэныгъэ купщIафIэхэр дигу къэзыгъэкIыж Iуэхугъуэщ. Щэнхабзэ зэмылIэужьыгъуэ куэд щызэхэухуэна ди Къэбэрдей-Балъкъэрым щыдолъагъу лъэпкъ зэныбжьэгъугъэм къихь дахагъэмрэ беягъэмрэ. Дыхуейщ ди зэхущытыкIэфIым хэдгъахъуэ зэпыту дыпсэуну, щIэблэми дызэхахыну, - жиIащ Сэхъурокъуэм.
Текуев Амырбий къыпищащ:
- Лъэпкъхэр дызэныбжьэгъумэ, дызэрыIыгъмэ, ар насыпышхуэщ. Хэку зауэшхуэм и зэманым ди нэхъыжьыфIхэм къагъэлъэгъуащ ар, зэкъуэтыныгъэм къытхуихьащ ТекIуэныгъэр. Дызэкъуэтмэ, дылъэщщ. Щэнхабзэ зэмылIэужьыгъуэ куэдыр тхъумэну, Урысейм и лъэпкъхэр дызэгурыIуэрэ-дызэдэIуэжу дыпсэумэ, ди къэралым къыхуэдзэлашхэхэм дазэрытекIуэну Iэщэр аращ. ЩIалэгъуалэм едгъэлъагъу щапхъэм дерс къызэрыхахынуми шэч хэлъкъым.
Къызэхуэсахэм къыхагъэщащ зэкъуэтыныгъэр псом ящхьэу зэрыщытыр, зэгурымыIуэныгъэм хьэлэбэлыкъыу къишэр зыхуэдизыр.
Зэхыхьэм хэтахэм фIыщIэ псалъэкIэ захуигъэзащ Мэкъуауэ Люазэ:
- Мы зэхуэсым къекIуэлIа дэтхэнэми фIыщIэ фхузощI, фи Iуэху къэвгъанэу зыкъызэревгъэхьэлIам папщIэ. Хэкум ис лъэпкъхэм я зэныбжьэгъугъэр гъэбыдэнымкIэ мыпхуэдэ зэхыхьэхэр щхьэпэщ нэхъри зэкъуэувэнымкIэ, зэрыIыгъынымкIэ, - жиIащ абы.
Зэхыхьэм щыIуащ уэрэдхэмрэ, усэхэмрэ, ягъэзэщIащ урыс къафэхэр. Зэраусрэ куэд мыщIами, цIыху куэдым ягу дыхьа «Матушка-Земля» урыс уэрэдыр жиIащ Прохладнэ куейм къикIа «Мечта» ансамблым хэт Клименкэ Юлие, къэфакIуэ гуп «Новое дыхание» зи фIэщыгъэр и гъусэу.
ЗэIущIэм хэтахэм фэеплъ сурэтхэр зытрагъэхащ.
Тхыгъэри сурэтри
КЪАНКЪУЛ Раисэ ейщ.
