Жигер уруннганлагъа - тийишли саугъала

КъМР-ни Къыраллыгъыны кюнюню аллында экономиканы, социальный сфераны айнытыуда, право низамны сакълауда жетишимле болдургъанланы бийик къырал саугъала бла белгилеу ариу тёреге айланнганды. Бу жол да Правительствону юйюнде Колонна залда бардырылгъан къууанчлы жыйылыуда 60-дан аслам адамны  сыйы чыгъарылгъанды. Аланы араларында устазла, врачла, журналистле, энергетикле, тренерле, артистле, эл мюлкде ишлегенле, белгили къырал къуллукъчула да бар эдиле.
 Аланы алгъышлай, КъМР-ни Башчысы Юрий Коков залда олтургъанланы хар бирини да жашауу республиканы жамауатыны къадары ючюн къайгъырыулукъну, иш кёллюлюкню юлгюсю болгъанын чертгенди. Саугъаланнганланы арасында экономиканы баш бёлюмлеринден биринде – эл мюлкде ишлегенле болгъанларын энчи белгилегенди. «Арт жыллада АПК-да уруннганла файдалы ишлей билгенлерин, бийик качестволу, экология жаны бла таза, россейли, ол угъай, тыш къыраллы рынокда конкуренциялы  продукция ёсдюргенлерин кёргюзтгендиле. Эл  мюлкде инвестиция проектле толтуруладыла, модернизация жумушла тамамланадыла, жангы технологияла сингдириледиле. Битеу бу затла уа барысы да бирге эл мюлкню айныуун жалчытхандыла»,-дегенди ол.
Ол кюн залда жыйылгъанланы арасында уа Амирхан Кушхов бар эди. Ол кёп жылланы республикада уллу эл мюлкледен бирине башчылыкъ этгенди. Къыралда къыйын 90-чы жыллада анга республикада эл мюлкню айнытыуну кеси боюнуна алыргъа тюшгенди,  Къырал агропромну башчысыны биринчи орунбасарыны, ызы бла уа эл мюлк эм продовольствие министрни къуллукъларында ишлегенди. Юрий Коков Амирхан Тутович «КъМР-ни аллында къыйыны ючюн» деген майдал бла саугъаланнганын белгилегенди. «Быллай сынамлы, билимли оноучуланы хайырындан республикагъа къыйын кезиуде агропромышленный комплекс битеу онгларын сакълап, айныуну жолуна чыкъгъанды»,-деп, чертгенди ол.
КъМР-ни баш къырал саугъасына Юрий Альтудов да тийишли болгъанды. Республиканы оноучусу ол Нальчикни жарым проводниклени заводуну тамата инженеринден премьер-министрни орунбасарына дери ёсгенин, финансла ючюн жууаплы болуп, экономиканы ышаннгылы айныуну жолуна чыгъаргъанын эсгертгенди. Бюгюнлюкде уа ол Къабарты-Малкъар къырал университетни ректоруду. «Ол вузгъа башчылыкъ этген кезиуде университет Россейни Юг жаныны бийик билим берген учрежденияларыны арасында айырмалы жерни алгъанды»,-деп къошханды ол.
Культурада ишлегенлени хазырлаугъа уа Искусствону Шимал-Кавказ къырал институту уллу къошумчулукъ этеди. Анга кёп жылланы  профессор Рахайланы Анатолий башчылыкъ этеди. Ол да «КъМР-ни аллында къыйыны ючюн» орден бла белгиленнгенлени арасындады. «Къайда ишлесе да, Анатолий Измайлович сайлагъан ишине кертиликни юлгюсю болгъанлай къалады»,-дегенди республиканы оноучусу.  
Не заманда да жамауатда устазлагъа хурмет уллу болгъанды. Юрий Коков ала ёсюп келген тёлюно юйретиуде профессионал сынамларын, билимлерин аямагъанларын чертгенди.
Ол кюн саугъаланнганланы арасында уа Татьяна Науянис да бар эди. «Ол «Кюн шахар» чыгъармачылыкъ академияны тинтиуле бардырыу эм конструктор бёлюмюн къурагъанладан бириди. Татьяна Владимировна «Россейде сабийлеге къошакъ билим бериуге кертичилиги ючюн» белги бла саугъаланнганды. Энди уа аны бийик къырал саугъаларына энтта «КъМР-ни аллында къыйыны ючюн» деген орден да къошулгъанды»,-дегенди ол.
Борис Мальбахов а устазлыкъгъа жашаууну 50 жылын бергенди. Ол Нальчикни 2-чи номерли лицейине башчылыкъ этген кезиуде  бу билим бериу учреждение тюрлю-тюрлю эришиуледе айырмалы болгъанды, ол санда «Къыралны бек иги школу» деген конкурсда хорлагъанды. Ол да «КъМР-ни аллында къыйыны ючюн» деген орденнге тийишли кёрюлгенди.
Ызы бла саугъалау башланнганды. РФ-ни Президентини буйругъу бла илмуда жетишимлери эм кёп жылланы бет жарыкълы ишлегени ючюн Бийик тау геофизика институтну баш илму къуллукъчусу Хажбана Каловха РФ-ни Президентини Ыразылыгъы берилгенди.
 Башында сагъынылгъанлагъа «КъМР-ни аллында къыйыны ючюн» деген орден берилгенди. Юрий Альтудов бла Рахайланы Анатолий а республиканы оноучуларына аланы ишлерине быллай бийик багъа берилгени ючюн ыразылыкъларын айтхандыла.
Кеслерини сфераларында жетишимле болдургъанланы эм кёп жылланы бет жарыкълы ишлегенлени Къабарты-Малкъарны Сыйлы грамотасы бла белгилегендиле. Анга тийишли болгъанланы арасында РФ-ни Художниклерини союзуну келечиси Акъкъызланы Сияра, Къырал статистиканы федерал службасыны Шимал-Кавказ федерал округда Управлениясыны халкъны санын жазыугъа хазырланыу эм бардырыу бёлюмюню башчысыны орунбасары Гузеланы Ариужан, КъМР-ни Айырыу комиссиясыны таматасыны орунбасары Жаппуланы Мусса, КъМР-ни Парламентини комитетини башчысы Мокъаланы Кемал, «Кабардино-Балкарская правда» газетни корреспонденти Моттайланы Светлана эм башхала да бар эдиле.
Тюрлю-тюрлю сфералада сыйлы атлагъа тийишли болгъанла да саугъаланнгандыла. Алай бла Къулийланы Къайсын атлы малкъар къырал драма театрны директору Жангоразланы Мажитге «КъМР-ни халкъ артисти»  деген ат берилгенди. «КъМР-Медиа» къырал казна учрежденияны радиода малкъар тилде бериулени бардыргъан Ахматланы Сафарият бла Битеуроссей къырал телерадиокампанияны республикада бёлюмюню радио бериулени бардыргъан Геляланы Сахадин а «КъМР-ни культурасыны сыйлы къуллукъчусу» деген атха тийишли кёрюлгендиле.
Медицинада ишлегенлени уллу къаууму да саугъаланнганды. Ол санда Перинатал араны баш врачы Гайыланы Алёна  «КъМР-ни сыйлы врачы» болгъанды. Нальчикни 18-чи номерли школуну химиядан бла биологиядан устазы Рахайланы Неллиге «КъМР-ни билим бериуюню сыйлы къуллукъчусу» деген ат аталгъанды. Ол республиканы оноучуларына билим бериуге этилген болушлукъ ючюн ыразылыгъын айта, бу саугъа къуру кесиники угъай, саулай коллетивники болгъанын чертгенди.  
РФ-ни Президентини ишлери жаны бла управленияны «Дубровая роща» санаторийини «Эдельвейс» энчи бёлюмюню башчысы Чеченланы Муратха уа «КъМР-ни социальный къоруулауну сыйлы ишчиси» деген ат берилгенди.  «КъМР-ни физический культурасыны бла спортуну сыйлы ишчилерини» тизмесине уа Анахаланы Мустафа да къошулгъанды. Ол  олимпиялы резервни Чегем районда сабий-жаш тёлю спорт школуну дзюдодан бла самбодан тренериди.
«Шимал Кавказны регионла аралы сетевой компаниясы» ачыкъ акционер обществону Элбрус районда ток ызланы Терс-Къолда участкасыны оператив бригадасыны электромонтёру Хаджиланы Шагъабан «КъМР-ни сыйлы энергетиги» деген ат бла белгиленнгенди.
Жыйылыуда саулукъ сакълауну сыйлы ишчилерини, республиканы сыйлы журналистлерини, архитекторларыны, къурулушчуларыны,  экономистлерини, юристлерини атлары да белгили болгъандыла.
КъМР-ни Башчысыны  Ыразылыгъына тийишли болгъанла да саугъаланнгандыла ол кюн. Анга уа КъМР-ни экономиканы айнытыу министрини орунбасары Ольга Белецкая, КъМР-ни Башчысыны секретариатыны кенгешчиси Нина Емузова, КъМР-ни Жамауат палатасында Старейшиналарыны советини келечиси Чеченланы Хасан тийишли кёрюлгендиле.
Ахырында Юрий Коков саугъаланнганланы энтта бир кере алгъышлагъанды. «Хар сферада да сизнича профессионалла ишлеген къадарда Къабарты-Малкъар мындан ары да айныгъанлай барлыгъына ишеклигим жокъду. Сизни ызыгъыздан коллективлеригиз турадыла, алада уа фахмулу, ишлерин сюйген адамла энтта кёпдюле»,-дегенди ол.
Жыйылыугъа КъМР-ни Парламентини спикери Татьяна Егорова, премьер-министр Мусукланы Алий да къатышхандыла.   
 

 

Тикаланы Фатима.

Поделиться:

ЧИТАТЬ ТАКЖЕ:

29.03.2024 - 09:05

БАХЧАЛАНЫ БУЗДАН КЪОРУУЛАРГЪА – 40 МИЛЛИОН СОМ

Быйыл эл мюлк жерлени буз уруудан къорууларча мадарлагъа Къабарты-Малкъарны бюджетинден 40 миллион сом бёлюнюрюкдю.

29.03.2024 - 09:04

КАРТОФДАН БАЙ ТИРЛИК КЪУУАНДЫРАДЫ

Шимал-Кавказстатны управлениясындан  билдиргенлерича, былтыр Къабарты-Малкъарны  мюлклерини барысында да картофдан  154,6 минг тонна  жыйылгъанды.  Ол былтырдан 1,8 процентге кёпдю.

29.03.2024 - 09:04

ТАНГ КЕСЕК КОНСЕРВА ЧЫГЪАРЫЛАДЫ

Къабарты-Малкъар тахта кёгетледен консервала жарашдырыу бла эки жылны ичинде алчы жерни алады. Ол санда былтыр, 363,8 миллион банка чыгъарылгъанды.

28.03.2024 - 10:01

НИЕТ ХАЗНАБЫЗНЫ АЙНЫТХАНЛА

Халкъыбызны ниет жетишимин кёргюзтген Къулийланы Къайсын атлы Малкъар театрны къуралыуу озгъан ёмюрню 1930-чу жылларында башланнганды. 1935 жылда А.

28.03.2024 - 09:03

ГИТЧЕ ЭМДА ОРТА БИЗНЕСНИ МАГЪАНАСЫ УЛЛУДУ

Къайсы къыралда неда аны ичинде субъектде экономиканы айнытыугъа уллу къошумчулукъ этгенле гитче эмда орта бизнес бла кюрешгенледиле эмда энчи предпринимательледиле.