Къабарты-Малкъарда профессионал усталыкъгъа жораланнган «Профессионалла» битеуроссей чемпионатны ахыр кесеги бардырыла турады. Бу айны биринчисинде аны Б. Г. Хамдохов атлы Агропромышленность колледжде къууанчлы халда ачхандыла.
Алай бла алты кюнню ичинде республика къыралны ма бу регионларындан эм терек бахчачылыкъ бла кюрешген жаш къауумну къонакъгъа алгъанды. Москва, Белгород, Воронеж, Курск, Саратов, Томск областьладан, Татарстан Республикадан да кёпле келгендиле. Аланы санында Къабарты-Малкъарны келечилери да бардыла.
Эришиуле «Жаш тёлю эм сабийле» миллет проектни эм «Профессионалитет» федерал проектни чеклеринде, кеслери да «Промышленность бахчачылыкъ» усталыкъгъа кёре бардырыладыла. Анга къатышханланы билимлерине эксперт комиссия багъа берликди, аны къауумуна уа сагъынылгъан регионланы барындан да насийхатчыла киргендиле.
Чемпионатны биринчи кюнюнде жаш адамла урунууну къоруулау жаны бла тинтиуледен ётюп, документлени сюзгендиле эмда, чёп атып, къалайда хунерликлерин кёргюзтюрюклерин билгендиле. Къоркъуусузлукъну излемлерине да энчи эс бурулгъанды: студент къауум, къайсы оборудованияда ишлерик эселе да, аланы сынагъан халда хайырланып кёргендиле.
Эришиуле башланнган кезиуде колледжни эм «ДЕМЕТРА» агрофирманы жерлеринде Лескен бла Урван районланы «Келир заманнга билет» проектге къатышхан школчуларына мастер-классла къуралгъандыла. Алада уа сабийлени транспортну жумушларына къараргъа юйретгендиле, терек бахчачылыкъда жангы амалла бла шагъырейлендиргендиле – МТЗ тракторну жюрютюуден башлап терекле орнатыугъа эмда аны бутакъларын тийишлисича кесип къысхартыугъа дери.
Дагъыда инновациялы агрофирмагъа жолоучулукъ къурап, окъуучулагъа анда терк айныгъан терек бахчачылыкъны юсюнден хапарлагъандыла.
Эришиуле башланнган кюн анга къатышханла инновацияланы дуниясына тюшюннгендиле: кёгет эм жилек битимлени ёсдюрюу амалланы кёргендиле эмда битимлени къоруулау жаны бла мастер-классланы ётгендиле. Усталыкъ сайлау программагъа къатышхан школчула уа тереклеге къарау эмда энчи техника бла ишлеу усталыкъла бла шагъырейленнгендиле.
Къонакълагъа ызы бла «ДЕМЕТРА» инновациялы агрофирмагъа экскурсия бардырылгъанды. Ала аны гитче терекчикле ёсдюрген мюлкюнде болгъандыла, анда алчы амалланы ишни юсюнде кёргендиле.
Къабарты-Малкъарда промышленность терек бахчачылыкъ экономиканы эм магъаналы бёлюмлеринден бириди. «Профессионалла» чемпионат студентлени эмда агропромышленность комплексде иш бергенлени араларында байламлыкъ жюрютюрге онг берген майданды дерге тийишлиди.
Омарланы Мурат.
