Къабарты-Малкъарны Правительствосуну кенгешинде илму учреждениялагъа себеплик этиу, инсанланы онгдуруу, кадрла жаны бла онгланы айнытыу, билим бериу эмда социал жаны бла билеклик этиу бла байламлы талай бегимни эмда буйрукъну проектлерине къаралгъанды. Аны ишин Правительствону Председатели Мусукланы Алий бардыргъанды.
Бегимледен бири бла «Россейни илмула академиясыны Къабарты-Малкъарда илму арасы» федерал илму арагъа» республиканы иелигинде болгъан мюлкню хакъсыз хайырланыргъа берирге оноу этилгенди.
Палестинадан къачып келгенлеге болжаллы халда жашар жерле къураргъа эмда кереклерин жалчытыргъа Правительствону къыстырыкъ фондундан ахча берилликди.
Къабарты-Малкъарны жаш алимлерини эмда специалистлерини советини жангы къаууму тохташдырылгъанды. Бу органны борчу жаш тёлюню илму бла кюреширге тартыу ишни тирилтиу, тинтиучюлеге эмда аланы илму-техникалы проектлерине себеплик этиу боллукъду.
Битеулю эмда къошакъ инклюзив билим бериу жаны бла ведомствола аралы планнга тюрлениуле кийирилгендиле. Бу планны магъанасы 2022-2030 жыллада бизни республикада сакъатлагъа эмда саулукъларында чекленнген онглары болгъанлагъа окъурча энчи онгла къурау бла байламлыды. Тюрлениуле уа бардырыллыкъ жумушланы тийишдиредиле, бериллик билимни качествосун да игилендирирге керекдиле.
Кенгешде, дагъыда, КъМР-де архив иш бёлюмде законодательствону толтуруу бла байламлы тюрлениуле къабыл этилгендиле. Ала контрольну игилендириуге буруладыла. Сора къыйын жашау болумгъа тюшген инсанлагъа себеплик этерге келишгендиле.
Улбашланы Мурат.
