Мыгувэу щIидзэнущ 2026 гъэм Къэбэрдей-­Балъкъэр къэрал университетым абитуриентхэр къыщригъэблагъэ кампанием. А пIалъэм фыкъы­кIэрымыхун, фызыхуеину дэфтэрхэр и чэзум вгъэ­хьэзырын, къыхэфхыну унэтIыныгъэхэм щыхьэт фытехъуэжын, студент ­зэчиифIэхэм ират дэIэ­пыкъуныгъэр зыхуэдэр къы­вигъэщIэн папщIэ КъБКъУ-м Профориентацэ лэжьыгъэмкIэ и къу­дамэм и унафэщI Тхьэ­зэплъ ФатIимэ упщIэ зыбжанэм жэуап къаритащ. 

- КъБКъУ-м зэрыщIэ­тIыс­хьэ Iуэхухэм мэкъуа­уэгъуэм и 20-м щIидзэнущ. Мы гъэм дэфтэрхэр къеIыхыныр дауэ къызэ­рагъэпэщыну? 
- Дэфтэрхэр къеIыхыныр Урысей псом зэгъусэу мэкъуауэгъуэм и 20-м щы­щIа­дзэнущ икIи гъэмахуэ псом екIуэкIынущ. Мы гъэм абитуриентхэм Iэмал тыншу щы къыхузэрагъэпэщащ:  я щхьэкIэ приёмнэ комиссэм екIуэлIэну, «Госуслуги» порталымкIэ («Поступление вуз онлайн» сервисымкIэ) онлайну дэфтэрхэр ягъэхьыну е пощт зэ­пыщIэныгъэр къагъэсэ­бэпыну. 
- Университетым къы­щIэтIысхьэну зызыгъэ­хьэ­зырхэм сыт хуэдэ махуэ нэхъыщхьэхэр ящIэн хуей? 
- ЕГЭ-м кърикIуахэм япкъ иткIэ, бюджетым щIэхуа­хэм дэфтэрхэр къеIыхы­-ныр бадзэуэгъуэм и 25-м еух. Курыт IэщIагъэ щрат еджапIэхэм я дипломыр зыIыгъыу бюджетым къа­кIуэхэм, университетым ­экзамен щызытыж абитуриентхэм я дэфтэрхэр ба­дзэуэгъуэм и 15 пщIондэ ятын хуейщ. Контракт егъэ­джэныгъэ щIыкIэр къыхэ­зыхахэм я дэфтэрыр къе­Iыхыныр шыщхьэуIум и 29 пщIондэ екIуэкIынущ. ПщIэ щIату еджэну КъБКъУ-м ­экзамен щызытын хуейхэм шыщхьэуIум и 11 пщIондэ дэфтэрхэр ят хъунущ.
- Сыт хуэдиз унэтIыныгъэм щIэплъхьэ хъуну дэф­тэрхэр? 
- Федеральнэ хабзэхэм япкъ иткIэ, абитуриентым дэфтэрхэр иритыфынущ Урысей Федерацэм и еджапIэ нэхъыщхьитхум. Ап­хуэдэ дыдэуи еджапIэ нэхъыщхьэ къэс унэтIыныгъитхум нэс къыщыхэпх хъунущ.
- Сыт хуэдэ дэфтэрхэр бгъэхьэзырын хуей? 
- Iэмал зимыIэхэм хо­хьэ егъэджэныгъэм теухуа дэф­тэрыр (аттестатыр е ­дипломыр), СНИЛС-мрэ ­ИНН-мрэ, медицинэ справкэр, прививкэхэм ятеухуа сертификатыр, зи узыншагъэм сэкъат иIэхэм - ны­къуэдыкъуагъэм теухуа справкэр, и ехъулIэныгъэ­хэм щыхьэт техъуэ тхылъ­хэр. Абыхэм ятеухуа тхы­- гъэ университетым и офи­циаль­нэ сайтым къралъ­хьэ, «Абитуриентхэм папщIэ» гуэдзэным. 
- Сыт хуэдэ ехъулIэныгъэхэра балл нэхъыбэ ­къозытыр? ЩIэуэ зыгуэр къыхыхьа? 
- Абыхэм я список убгъуа КъБКъУ-м и сайтым итщ. Ауэ кIэщIу жыпIэмэ, дыщэ е дыжьын медаль, фIы ды­дэу аттестат зиIэм ЕГЭ-м кърикIуахэм балли 10 ху­халъхьэ. «Абилимпикс» зэпеуэм зэрыщытекIуам папщIэ балли 10 худыщIагъу. ГТО-м и дыщэ е дыжьын дамыгъэм папщIэ - балли 3. КМС-м и спорт разрядым балл лейуэ 6 хуагъэзащ. Мыхьэнэшхуэ зиIэ зэхъуэ­кIыныгъэ къыхалъхьащ ­волонтёр тхылъ цIыкIум ехьэлIауэ: иджы ар системэщIэкIэ къалъытэ. Волонтёр Iуэхум зэрыхэта илъэс къэс зы балл хуа­гъэув. Нэхъыбэ дыдэу балли 4 къыпIэрыхьэфынущ. Школхэр къэзыухахэм дыгъэгъазэм ятх кIэух тхыгъэм папщIэ - зы балл. Апхуэдэу балл гуэдзэхэр ­кърипхьыфынущ КъБКъУ-м и олимпиадэхэм текIуэныгъэ къыщыпхьамэ - балли 3-м къыщыщIэдзауэ 10-м нэс. УиIэ ехъулIэныгъэхэм папщIэ еджапIэ нэхъыщ­хьэм балли 10 пхухилъхьэ­фынущ. Абитуриентым и ехъулIэныгъэ щхьэхуэхэр псоми я зэхуэдэ системэм къыщыгъэлъэгъуащ, зэ­пеуэм балл бжыгъэ зэщхь къыщахьамэ, ехъулIэныгъэ нэхъыбэ зиIэр токIуэ. 
- 2026 гъэм унэтIыныгъэщIэхэр иIэ универси­тетым?
- НтIэ. Курыт IэщIагъэ щрагъэгъуэт мардэм тету ДизайнымкIэ колледжым къыщызэIуахащ «Рекламэ» IэщIагъэщIэм щыхуагъасэ. Мы гъэм мы унэтIыныгъэм пщIэ щIату щрагъэджэну аращ. 
- Нэгъабэ сыт хуэдэ унэ­тIыныгъэхэм нэхъ щIэ­тIыс­хьа щIалэгъуалэр? Мы гъэм сыт хуэдэрауэ пIэрэ япэ ищынур? 
- Хабзэ зэрыхъуауэ, щIэ­упщIэ нэхъ зиIэхэм ящыщщ классикэ унэтIыныгъэхэр: медицинэр, юриспруденцэр, экономикэр. Абы щыгъуэми инженер-техникэ ­Iэ­щIагъэхэм хуащI гулъы­тэм зэрыхэхъуэр къыжыIапхъэщ. Дыщогугъ ар мы гъэми апхуэдэу щытыну. 
- Университетым абитуриент зэчиифIэхэм дауэ защIигъакъуэрэ?
 - Дэ мылъку, академическэ дэIэпыкъуныгъэ диIэщ. Псалъэм папщIэ, ЕГЭ-мкIэ балли 100 къэзыхьа еджа­кIуэм зэ тыгъуэу сом 100000 ират. Балл куэд зиIэхэм (унэтIыныгъэ къэс бжыгъэ хэха яIэщ) папщIэ япэ семестрым къриубыдэу мазэ къэс сом мини 10 стипен­диеу ират. Къищынэмы­щIауэ, КъБКъУ-м жыджэру олим­пиадэхэр ирегъэ­кIуэкI. Профильнэ, Кавказ Ищхъэрэ предмет олимпиадэхэм ухэтмэ, Iэмал къуитынущ ущыщIэтIысхьэкIэ балли 3-м къыщыщIэдзауэ 10-м нэс къыпIэрыхьэну. 
- ЗэрыщIэтIысхьэ дэф­тэр­хэр зрат къэпщы­та­кIуэ­хэр дэнэ щылажьэрэ? 
- Приёмнэ комиссэр ­КъБКъУ-м и щIыхьэпIэ нэхъыщхьэм щыIэщ, мы хэ­щIапIэмкIэ къэвгъуэтынущ: Налшык къалэ, Черны­шевс­кэм и уэрам, 173.
Зыгъэхьэзырар
Дарий  Дахэнурщ.