Къэбэрдей-Балъкъэрым и районхэмрэ къалэхэмрэ щыщу зи ныбжьыр илъэс 14 ирикъуа еджакIуэ 26-м дыгъуасэ Урысей Федерацэм и цIыхум и паспортыр КъБР-м и Парламентым щратащ.

ЗэIущIэм хэтащ республикэм и хабзэубзыху IуэхущIапIэм и УнафэщI Егоровэ Татьянэ, ЩэнхабзэмкIэ, жылагъуэм зегъэу­жьынымрэ хъыбарегъащIэ политикэмкIэ и комитетым и унафэщI Текуев Амырбий, ­КъБР-м и МВД-м Iэпхъуэшапхъуэхэм я Iуэху­хэмкIэ и управленэм и унафэщI полицэм и полковник Быгуэ Артур. 
НыбжьыщIэхэм щехъуэхъум, Егоровэ Татьянэ жиIащ сабийхэм я япэ дэфтэрыр къащыIэрыхьэ махуэр псоми я дежкIэ мыхьэ­нэшхуэ зиIэ икIи узыгъэпIейтей Iуэхуу зэ­ры­щытыр. «ЦIыхум и хуитыныгъэхэмрэ щхьэ­хуитыныгъэмрэ зыгъэлъапIэ къэралыр нобэ щыщIэдзауэ шэсыпIэ фхуохъу. Мы Iуэхур Урысейм и махуэшхуэ нэхъыщхьэхэм ящыщ зым - Урысейм и махуэм - ирихьэлIэу зэ­рекIуэкIыр узыгъэгушхуэщ. Махуэшхуэм ­къегъэлъагъуэ Хэкум, абы и тхыдэм, и къэ­кIуэнум къыгуэхыпIэ имыIэу дэ дызэ­ры­пыщIар. Хэкур лъагъуныгъэмрэ абы щып­сэухэм я зэкъуэтыныгъэмрэ я фIыгъэкIэ сыт хуэдэ зэманми, сыт хуэдэ гъэунэхуныгъэми ди цIыхубэр къыпхыкIащ, ехъулIэныгъэш­хуэхэр зыIэригъэхьащ. Ар нобэрей щIалэ­гъуалэм фщIэну, зыхэфщIыкIыну дыфщо­гугъ. Урысейр ар фэрэ дэрэщ, нэхъыжьхэмрэ щIэблэмрэщ. Аращи, фи япэ итхэм я зэ­фIэкIым пыфщэну, хэкупсэ нэс фыхъуну дынывохъуэхъу. Паспортыр балигъ гъащIэм ухэзышэ дэфтэрщ. Ди гуапэщ ар егъэджэ­ныгъэм, спортым, жылагъуэ Iуэхухэм жы­джэру хэт ныбжьыщIэхэм зэрывэттыр. Нобэ къыфхэтщ дзэ Iуэху хэхам щыIэ ди лIы­хъужьхэм я бынхэри. Дэ абыхэм я лIыгъэм псори дрогушхуэ. Ауэ зыщывмыгъэгъупщэ, нобэрей фи ехъулIэныгъэр ар щIэдзапIэ ­къудейуэ зэрыарар, куэд къызэрыф­пэ­щы­лъыр. Жэуаплыныгъэ фхэлъу фи хъуэпсапIэхэм фахуэкIуэну дыщогугъ. Сыт хуэдэ ехъулIэныгъэри епхащ гукъэкIым, тегуш­хуэ­ныгъэм. Мы махуэм щегъэжьауэ Iэмал зэмылIэужьыгъуэхэр фиIэнущи, фи зэфIэ­кIым зэрыхэвгъэхъуэным, фи щIэныгъэр къэвгъэсэбэпыным, нэхъыщхьэращи, Хэкум, фи лъахэм фазэрыхуэщхьэпэным иужь фит. Урысей Федерацэм и цIыхуу ущыты­-ныр пщIэшхуэщ икIи жэуаплыныгъэ зы­пылъщ. Сынывохъуэхъу узыншагъэ быдэ фиIэну, насыпыфIэ фыхъуну!»
Быгуэ Артур щIалэгъуалэм яжриIащ ­абыхэм я щIэныгъэмрэ ехъулIэныгъэхэмрэ елъы­тауэ зэрыщытынур Урысейм и къэкIуэнур. Ар абыхэм ехъуэхъуащ мурадышхуэ­хэм хуэкIуэну, я Хэкур, я цIэмрэ я пщIэмрэ сыт щыгъуи яхъумэну. «Лъэпкъ куэд щыпсэу ди къэрал лъэщыр фIыуэ флъагъу, фи лъахэм пщIэ хуэфщI, абы и хабзэхэр вгъэзащIэ», - жиIащ къэпсэлъам.
- Нобэрей махуэ дахэм дэфтэр нэхъыщ­хьэр къызэрыфIэрыхьэм, къызэрыхагъэщащи, мыхьэнэшхуэ иIэщ. Ди къэкIуэнур зыу­хуэну щIэблэр фэращ. Фэращ абы и зыу­жьыныгъэм елэжьынур. А Iуэху мытыншыр къывэхъулIэн щхьэкIэ, фи блэкIар, ди адэжь­хэм я лIыгъэ гъуэгуанэр фымыщIэу хъунукъым. Ар дызэрыпагэ ди тхыдэщ. Мы зэманым я гъащIэ емыблэжу ди Хэкур зыхъумэ щIалэхэми я лIыгъэм фрипагэу, дэтхэнэми ди къэралым и пащхьэ жэуаплыныгъэ зэ­рыщихьыр зыщывмыгъэгъупщэу фи гъуэгуа­нэм фытет. Нобэрей зэманыр зыхуэдэр флъагъуу, гъащIэм гъуэгуанэ дахэ фытехьэну сынывохъуэхъу, - жиIащ Текуев Амырбий.
Паспорт зрата Гугъуэт Каринэ (Дзэлы­къуэдэс къуажэм и курыт школым щоджэ) ящыщт зи адэр мы зэманым дзэ Iуэху хэхам лIыгъэ щызезыхьэхэм. Гугъуэт Беслъэн ныбжьыщIэхэм ехъуэхъуащ, адэ-анэхэм фIыщIэ яхуищIащ щIэблэ губзыгъэ къызэрагъэхъум папщIэ. Дзэ Iуэху хэхар иухыу, лIыхъужьхэм узыншэу къагъэзэжыныр зэраплъапIэр абы дыщIигъуащ. 
УнэтIыныгъэ куэду зэхэт республикэ гимназием и еджакIуэ Сенэ Даянэ ныбжьы­щIэхэм къабгъэдэкIыу КъБР-м и Парламентым и УнафэщIми депутатхэми фIыщIэ яхуи­щIащ, къэралыр ирагъэфIэкIуэным ахэр зэрыхущIэкъунур къыхигъэщащ. Зэрыхабзэти, зэIущIэр Урысейм и къэрал гимнымкIэ зэхуащIыжащ. 
БАГЪЭТЫР Луизэ.