Тюнене Нальчикде Къабарты-Малкъарны Башчысы Ю.А.Коков бла Россейни Монополиялагъа къажау службасыны башчысыны орунбасары А.В.Доценко федерал ведомствону бла КъМР-ни власть органларыны араларында бирге ишлеуню юсюнден келишимге къол салгъандыла. Документ Россей Федерацияны Президенти В.В.Путинни «Конкуренцияны айнытыу бла байламлы къырал политиканы баш жолларыны юсюнден» Указын толтурургъа, анга кёре Къабарты-Малкъарда конкуренцияны айнытыргъа, регионну инвестиция онгларын игилендирирге, иш кёллюлюкню кётюрюрге себеплик этер муратда жарашдырылгъанды.
- Федерал даражада сайланнган къыркъ бир социал магъаналы рынокдан бизни республика отуз ючюсюне къатышады. Ол ишни биз кючлендире барабыз. Бирге тамамланыллыкъ борчла алыкъа кёпдюле. Бу келишим республиканы экономикасын айнытыугъа жангы кюч берликди,- дегенди КъМР-ни Башчысы.
Алексей Доценко уа, республиканы оноучуларына бирге ишлерге хазырлыкълары ючюн жюрек ыразылыгъын билдирип, Къабарты-Малкъарда тюзлюк бла бардырылгъан конкуренцияны къураугъа власть органла, ФАС-ны регион бёлюмю да  уллу къыйын салгъанларын айырып айтханды.
   -Конкуренция – ол,бек алгъа, тюз ниетли, ачыкълыкъ халда ишлеудю. Аны айнытыу  уа  ассортиментни кёбейтирге, багъаланы тюшюрюрге, компанияланы санын, рынокда сурамланы да ёсдюрюрге, аны хайырындан а товарланы качестволарын игилендирирге онг береди, - деп чертгенди А.В.Доценко.