Бу кюнледе Нальчикде Мечиланы Кязим атлы жаш тёлю китапханада запасда полковникни, поэтни, Россейни Жазыучула союзуну члени Атайланы Далхатны жашы Жашарбекни жангы назму жыйымдыгъыны халкъгъа туура этиую болгъанды. Автор бу китабына «Гитараны къыллары жырлайдыла» деп атагъанды.
Жашарбекни республикада, андан тышында да кёпле таныйдыла. Алдан айтып къояйым, аллай жарыкъ кёллю, кимге да болушургъа хазыр адамны тапхан тынч тюйюлдю бу дунияда. Аны юсюнден айтханда, ол запасдагъы полковникди. Москвада Ленин атлы аскер-политика академияны бошап, Шимал флотда, Бакуда Каспий аскер-тенгиз флотда къуллукъ этгенди. Киров атлы баш аскер-тенгиз училищеде, КъМКъУ-да да аскер кафедрада ишлегенди. Солуугъа кетгенли уа, Сауутланнган кючлени запасда офицерлерини «Мегапир» атлы миллет ассоциациясыны КъМР-де бёлюмюне таматалыкъ этеди, ёсюп келген тёлюню патриот ниетледе юйретеди. Дагъыда ол Нальчикде 2013 жылдан бери «Фахмулула олимпиадасы» деген ат бла тёреге айланнган регионла аралы сабий эм жаш тёлю патриот фестивальны бардырады, «Солдат ананы жюреги» деген акцияны къурап тургъаны бла да белгилиди.
Поэзияны алгъанда уа, аны бла Жашарбек эрттеден шуёхду – сабийликден назмула жазады. Бир къауум энчи китапны авторуду. Биринчи назмулары «Адабиятлы Азербайджан» бла «Адабиятлы Кисловодск» журналлада басмаланнгандыла. Энчи китабы уа «Я к тебе подойду» деген лирикалы аты бла 1991 жылда Бакуда чыкъгъанды. Андан бери да аны Нальчикде «Тебе одной пишу слова признания», «О героях нашего времени», «Истоки вдохновения» деген назму жыйымдыкълары чыкъгъандыла. Жашарбек «Поэт года-2017», «Поэт года-2019» деген адабият саугъалагъа, «Анна Ахматовагъа – 130 жыл» деген майдалгъа да тийишли болгъанды, Пятигорскда «Слово», Серпуховда «Серпейка» атлы адабият биригиулени да келечисиди.
Нальчикде жангы китапны къууанчына аталгъан тюбешиуню китапхананы директоруну орунбасары Лариса Садыкова ачханды. Жашарбекни юсюнден къысха хапар айтып, ары келгенлени сыйлы къонакъла бла шагъырей этгенди. Ол: «Бу къабыргъалада Атайланы Жашарбекни экинчи китабыны халкъгъа туура этиую барады бюгюн. Ол, запасдагъы офицер, бюгюн да къыралына къуллукъ этгенин къоймайды. Аны бла бирге кесини чыгъармачылыкъ ишине да заман табады. Нени юсюнден жазады ол? Ата журтха сюймекликни, кертичиликни, аны аллында хар бир инсанны борчуну, дагъыда жашауну башха бетлерини юсюнден да. Сёзню кючю уллуду. Бютюнда аны сыйгъа, намысха тийишли адам айтса», – дегенди.
Лариса Давидовна андан ары сёзню авторну кесине бергенди. Атайланы Жашарбек ары келгенлеге – анда уа аны аскерчи тенглери, шуёхлары, ветеран биригиулени келечилери, СВО-чула, альпинистле, аны чыгъармачылыгъын сюйгенле, поэзияны солуууна тынгыларгъа тансыкъла, эллилери-жерлилери (кенжечиле) келгендиле – Ата журтну, аны айтхылыкъ адамларыны, табийгъатны, сюймекликни юсюнден кесини назмуларындан къауумун окъугъанды. Бек сейири уа, хар окъугъан назмусу къалай бла, къайдан келген илхам бла жазылгъанын айтханды. Назму окъууланы араларында ары келгенле Жашарбекни жырларына жарашдырылгъан роликлеге къарагъандыла. Жырла, назмула араларында да Халкъланы бирлигини жылында «Россей – бизни юйюбюз» деген фестивальгъа аталгъанла да бардыла.
Аны «Санкт-Петербургну акъ кечелери» деген, кенг жайылгъан жырларындан бирине халкъ сюйюп тынгылагъаны белгилиди. Анга артда да иги кесек жыр къошулгъанды. Атай улу аны чыгъармачылыгъын сюйгенлени алгъаракъда «Малкъарны жыры» бла къууандыргъанды («О моя Балкария, средь кавкаказских гор, твою воду талую с ледников я пью…») Аны Надежда Аксёнова жырлайды. Бу къысха жырда малкъар халкъны тарыхыны энчи бетлери сакъланадыла. Жер атла да бардыла. Аны «Къабарты-Малкъар» деген жыры уа шуёхлукъгъа аталады.
Андан сора да, тюбешиуде автор Ата журт урушда хорлам ючюн республиканы халкълары къаллай къыйын салгъанларыны, ёсе келген жаш тёлюню Ата журтха сюймекликде юйретиуню юсюнден да тынгылы хапар айтханды. Ол шартлагъа назмула да окъугъанды эмда аскерчи тенглерине – Ата журтну къоруулаучулагъа ыспас этгенди.
Поэтни къонакълары «Ветеран» деген видеороликге сюйюп къарагъандыла. Жашарбекни бюгюнлюкде къыралыбызны сейирлерин къоруулай тургъан жаш адамлагъа, ала этген жигитликлеге аталгъан назмуларына да ары келгенлени жюреклерине жетгендиле.
Автор лирика назмуланы сюйгенлени да ыразы этерге кюрешгенди, сюймекликни жол нёгерлерини – тюбешиуню, айырылыуну, тансыкълыкъны – юслеринден да тасха оюмларын билдиргенди. Ол кюн анда, гитарада да согъа, Жашарбек бла аны къайыны, шуёху, художник, поэт Сарбашланы Азнор айтхан жырла ары келгенлени кёллерин кётюргендиле. «Муратдагъы тиширыу» деген видеоролиг а, сёзсюз, кёплени эслеринде къаллыкъды.
Жюрек жылыулу тюбешиуде жашауну терен магъанасыны, хар инсаннга да багъалы затланы юслеринден да эсгертилгенди. Тенглери, шуёхлары да, Жашарбекни иги таныгъанла, аны адамлыгъыны, кертичилигини, ачыкълыгъыны, аны ким да базынырча адам болгъаныны юсюнден уллу ыспас бла айтхандыла. Ол себепден аскер къуллугъу къатдыргъан, сезимли жюреги айтдыргъан назмулары да керти сёзлю, сезимлидиле аны.
Ма аллай сейирлик оюмлары, итиниую, умутлары да болгъан, поэзияны бла музыканы жол нёгерге алгъан фахмулу адамды Атайланы Жашарбек.
Холаланы Марзият.
