Арт жыллада халкъыбызны буруннгулу адет-тёрелерин сакълаугъа уллу эс бурулады. Аланы жангыртыу, аланы юслеринден ёсюп келген тёлюлеге билдириу да бек магъаналыды. Нек дегенде адам туугъан жерини тарыхын, эрттеден келген тёрелени, маданиятын да билсе, аланы багъалы кёрюп, сюйюп башлайды. Аны къой, башха миллетлеге да сейири къозгъалады. Ма аны эсге алып, Кёнделенни китапханасында ишлегенле туугъан журтубузну тарыхын, адет-тёрелерин, маданиятын бла  адабиятын окъуучулагъа жетдириуню, жаш тёлюню алагъа сейирлерин къозгъауну кеслерини баш борчларындан бирине санайдыла.

- Алагъа атап, мында тюрлю-тюрлю ишле бардырабыз. Алай бла сабийле билимлерин ёсдюрюрлерине къайгъырабыз. Къалай-алай десек да, маданият аралада, бютюнда бег а китапханалада, сакъланадыла жерлени, сууланы юслеринден материалла, окъуучула аланы сюйгенлерича хайырланыргъа боллукъдула. Ол жаны бла «Ата-бабаларыбызны от жагъалары» деген адабият  биригиулени ишин дайым  бардырабыз. 

Патриот ниетде юйретиуге да энчи эс бурабыз. Сёз ючюн, элибизден энчи аскер операциягъа къатышханланы юслеринден билдириуле этебиз, андан къайтханла бла тюбешиуле къурайбыз. Кёпдю китапхананы жумушу, жаланда кёл салып ишлерге керекди, - дейди китапхананы башчысы Улакъланы  Зульфия ушагъыбызны кезиуюнде.

Ол айтханыча, жаланда озгъан окъуу жылда, быйылны юч айында да китапхана онтёрт чакълы тюбешиу, ингир, дагъыда алагъа ушаш затла къурагъанды. Аланы бир къауумун сагъынсакъ да, тамам сунама: «Хапарла къонакъгъа ёз элинги юсюнден», «Жыйылгъан жерледе кесинги жюрюте бил», «Миллет фольклор», «Малкъарым: сюймеклигим эмда ёхтемлигим», «Сау жашауну алгъан жол» деген эмда башха  ингирле да алагъа къатышханланы эслеринде къалмай амаллары жокъду. Аланы китапханачыла жаш тёлю жангы билимге тартылырча къураргъа кюрешедиле. 

Китапханада, тюрлю-тюрлю байрамлагъа жораланып, конференцияла да бардырыладыла. Окъуучула, жазыучуланы, поэтлени чыгъармаларын тинтип, аланы юслеринден оюмларын билдиредиле. Ана тилни айнытыугъа аталгъан ишлеге уа, школчуладан сора да, устазла, краеведение музейни ишчилери, тамата тёлю да къатышадыла. Мында къуралгъан тюрлю-тюрлю кёрмючле бла уа ары келгенлени Зульфия кеси шагъырейлендиреди. Сёз ючюн, «Эсингде болсун: дуниядан хапарынг болур ючюн, кесинги туугъан жеринги дурус бил» деген китап кёрмюч сабийлени билимлерин ёсдюрюрге, кеслери алларына ишлерге кёллерин ачаргъа да себеплик этер мурат бла къуралгъанды. 

Китапханагъа къонакъгъа республикада белгили адамла келедиле. Элдеги Маданият юй бла бирге бардырыучу тюбешиуле, чыгъармачылыкъ ингирлеге  кёнделенчиле да сюйюп къатышадыла. 

Хар жылдан Мечиланы Кязимни, Къулийланы Къайсынны, Отарланы Керимни, дагъыда башха поэтлени туугъан кюнлерин белгилеу мында ахшы тёреге айланнганды. Былтыр китапханада, поэтлеге аталып, кёп поэзия ингирле къуралгъандыла. Алада алтынчы-жетинчи классланы окъуучулары поэтлени жашау, чыгъармачылыкъ жолларыны юслеринден билдириуле этгендиле, аланы сёзлерине кёре жазылгъан жырлагъа тынгылагъандыла, кёрмючге да къарагъандыла.  Къулийланы Къайсынны ауазын да эшитгендиле. 

Элбрус районну китапханаларында ишлегенле  бир бирлери бла терк-терк тюбешедиле эмда ишни игилендириуню амалларын сюзедиле, сынауларындан бир бирлерине юлюш этедиле. Алагъа Улакъланы Зульфия да тири къатышады. Анга тынгыласанг, ишин иги билгенин, аны сюйгенин да кёресе. Ол китапхананы окъуучулары не къадар кёп болурларына къайгъырады, аны ючюн тюрлю амалланы, технологияланы да хайырланады. Окъуучулагъа маданиятны, адет-тёрелени юслеринден китапланы, шартланы тапдыра, аланы ич дуниялары байыкъланыр деп ышанады. «Кесини ёз халкъыны тарыхын билген а башха миллетлеге да тёзюмлю болады, арада жууукълукъ къуралады, бюгюнлюкде аны магъанасы бек уллуду», - дейди Зульфия. 

Холаланы Марзият.