Къабарты-Малкъарда быйыл тёрт айгъа хайырланылгъан электрокюч ючюн «Россети Северный Кавказ» – «Каббалкэнерго» биригиуге 3,4 миллиард сомдан аслам тёленнгенди. Былтыр бу заман бла тенглешдиргенде,  ол 501,6 миллион сомгъа кёпдю эм 86,5 процентге мажалды, деп билдиргендиле ток бла жалчытхан биригиуню пресс-службасындан.

Чыгъарылгъан эсеплеге кёре, жер-жерли, республикалы эм федерал  бюджетледен жалчытылыннган учрежденияла тёлеулени 104, 101 эм 96,6 процентге жетдиргендиле. Токну хайырланыучулагъа сатхан электросетьлени юсюнден айтханда, ала да борчларын 103,8 процентге толтургъандыла.  Промышленность предприятияла- 96,3,  аллай болмагъанла – 98,7 эм энчи абонентле да 95,3 процентге иги тёлегендиле.

Аны бла бирге,  бирси жылладача, осал тёлегенлени бла уллу борчлары болгъанланы биринчи тизмесинде жашау журт-коммунал мюлк  предприятияла барадыла. Ала ток ючюн борчларын жабалмагъанлары иги кесек заманны  жарсытады. Анга да къарамай, борчларын жабаргъа излемегенлери, электрокюч сетьге уллу   заран салгъанларын  белгилеп айтырчады.

Эсге сала айтсакъ, эки айдан аслам тёлемеген абонент ток ыздан кесилирге боллукъду.  Аллай адам ток бла жалчытылыныр ючюн борчун толусунлай жабаргъа тюшерикди. Ол санда ток чыбыкъны кесгенлерине эм къошханларына да кеси тёлерикди. Аны ёлчеми объектни къыйынлыгъына кёре  болады. Сёз ючюн,  энчи арбазны иеси 3 минг, организацияны таматасы уа  10 минг сом берликди. Уголовный жууапха тартылгъанла уа РФ-ни Уголовный кодексини 165 -чи статьясына тийишлиликде эки жылгъа тутулургъа боллукъдула. 

Токдан чеклендирирге къоркъуу чыкъгъанын  хайырланыучула электрон почталарында,  компанияны сайтында «Коммунал жумушладан чеклендириу реестр»  бёлюмню «Клиентлеге» деген кесегинде неда СМС бла жиберилген билдириулеринде окъургъа боллукъдула.  Тёлеулени биригиуню офислеринде тамамларгъа онг барды. Юйлеринден чыгъалмагъанла неда заманларын къоратыргъа сюймегенле ол санда  башха жерледе тургъанла «Энчи кабинет», «Свет Онлайн» эм «СберОнлайн»  мобиль приложенияланы хайырланыргъа боллукъдула. Бир тюрлю сылтау бла толусунлай борчун жабалмагъан  реструктуризация этилирча  келишим къураргъа онгу барды. 

Бюгюнлюкде республикада «Свет онлайн» сервисни аслам адам хайырланады. Аны GooglePlay - https://play.google.com/ эм AppStore - https://apps.apple.com/ сайтладан алыргъа онг барды. Аны себеплиги бла комиссиясыз тёлерге, эсеплеген приборда  ненча ойнагъанын жиберирге, къайсы айда къаллай бир берилгенине квитанция бла шагъырейленирге болады. Быллай амал энергокюч компания бла  абонентни арасында байламлыкъны бютюн бек кючлегенин да белгилерчады.

«Россети Северный Кавказ»-«Каббалкэнерго» биригиуню келечилери токну къаллай бир ойнагъанын айны 23-26 кюнлеринден кеч къалмай жиберирге эм  тёлеулени уа  онбешисине дери этерге  кереклерин  эсге саладыла.

Хайырланылгъан ток ючюн заманында этилген тёлеулени хайыры бла республиканы электрокюч бёлюмю ишин тынгылы бардырады, ол санда ток бла сылтаусуз жалчытырча эм аны качествосун ёсдюрюрча мадар этиледи.

Курданланы Сулейман.