Спортну сюйгенлеге быйылгъы жай Профессионал тутушуу лиганы – PWL – эришиую бла башланнганды, ол «Вымпел» спорт-кёрмюч арада ётдюрюлгенди. Анда 74 килограммгъа дери ауурлукъ къауумдагъы гёжефле сынашхандыла, хорлагъаннга уа чемпион бел бау ючюн Олимпиаданы чемпиону Заурбек Сидаков бла сермеширге эркинлик берилгенди.
Сермешлеге Россейден, Къыргъызстандан, Американы Бирлешген Штатларындан, Таджикистандан, Азербайджандан, Румыниядан, Тюркден, Венгриядан, Къазахстандан, Узбекистандан бла Египетден гёжефле къатышхандыла. Андан сора да, эришиуню чегинде грек-рим тутушууда эм кючлю спортчула тюбешгендиле, ол санда бизни республикадан дунияны чемпионатыны призёру Ауэс Гонибов, Европаны чемпиону Локияланы Жамболат бла Россейни чемпиону Марат Кампаров да болгъандыла.
Эришиуню аллында кюн спортчуланы, сыйлы къонакъланы, журналистлени, къараучуланы, тренерлени да къатышыулары бла пресс-конференция болгъанды. Анда турнирни бардырыуну жорукълары ангылатылгъандыла, гёжефлени ауурлукъларын энтта бир кере ёнчелегендиле.
Россейни спорт тутушуудан федерациясыны баш менеджери, лиганы толтуруучу директору Юрий Фёдоров PWL-ны кезиулю турнири Къабарты-Малкъарда бардырылгъанына къууаннганын билдиргенди. «Нальчикде лиганы ётдюрюуню жангы амалын да сынарыкъбыз: бир ауурлукъ къауумдагъы эм къарыулу спортчула чемпион бел бауну алыр ючюн, сермешге къатышыргъа ким тийишли болгъанын ачыкъларыкъдыла. Бусагъатда аны иеси Заурбек Сидаковду. Андан тышында, муратыбыз жер-жерли къараучулагъа грек-рим тутушууну ариулугъун кёргюзтюрге эди да, турнирде республиканы эм айтхылыкъ гёжефлерини юч тюбешиулери боллукъдула», - дегенди ол.
Турнирни магъанасын Олимпиаданы грек-рим тутушуудан чемпиону Парламентни башчысыны орунбасары Мурат Карданов да чертгенди. Спортчулагъа бла къонакълагъа, бютюнда узакъ къыралладан келгенлеге, ыразылыгъын билдире, Мурат Наусбиевич алгъадагъы эришиуле Дагъыстанда, Шимал Осетияда ётдюрюлгенлерин, бюгюн а уллу спорт байрам бизге жетгенин белгилегенди. Къабарты-Малкъарны Спорт тутушуудан федерациясыны башчысы Арсен Маиров а лиганы турнирин къурау уллу жууаплылыкъ салгъанын, жаш спортчуларыбызгъа дуния даражалы сермешлени кёрюрге онг бергенин, ол алагъа, керти да, саугъа болгъанын айтханды.
Россейни сыйлы тренери Анзор Карданов грек-рим тутушуудан гёжефлерибизге эс бургъанды. «Классиклерибизге туугъан жерлеринде тутушургъа ахшы онг чыкъгъанды, аны къыйматы энчиди. Ауэс Гонибов, Локияланы Жамболат бла Марат Кампаров бийик усталыкъларын къыралны ичинде, андан тышында да дайым кёргюзтгенлей турадыла», - дегенди ол. Насийхат сёзюн спортчулагъа эркин тутушуудан Россейни сыйлы тренери Арсен Закуев да айтханды. «74 килограммгъа дери ауурлукъ къауум жангылычланы кечмейди. Быллай уллу эришиуде хар ычхындырылгъан баллны багъасы эки кереге кёбейеди. Сермешлеригизни ахшы ётдюрюрюгюзню, саулугъугъузгъа чып тюшмей къалырын, эм тийишли хорларын тежейме»,-дегенди ол.
Ызы бла журналистлени бла къараучуланы сорууларына гёжефле жууапла бергендиле. Ала не тюрлю спортда да бир бирге хурмет этиу биринчи жерде болгъанын, кюч-къарыуларын жангызда тутушуу «кюйюзде» кёргюзтюрге сюйгенлерин, тынч сермешле сакъламагъанларын айтхандыла.
Эришиуле экинчи кюн тюшден сора бардырылгъандыла. Аланы къууанчлы халда ачылыулары «Кабардинка» ансамбльни тепсеую бла башланнганды. Ызы бла уа республиканы Музыка театрыны хору Россейни гимнин эшитдиргенди.
Жыйылгъанланы Къабарты-Малкъарны Башчысы Казбек Коков да алгъышлагъанды. «Бусагъатда къыралыбызда жаш тёлюбюз спортда жетишимли болурча битеу онгла тапдырыладыла. Спорт инфраструктура айныр ючюн, Президент уллу къыйын салады. Аны хайыры бла быллай даражалы эришиуню къураргъа амалыбыз барды. Бюгюн Кенжеде «Пять колец» Академияны «Вымпел» арасында спорт тутушуудан «PWL Nalchik 74» деген халкъла аралы кезиую бардырылады. Ол Россейни Спорт министерствосуну эришиулени регионла аралы, битеуроссей эм халкъла аралы бир календарь планына киреди. Турнирни къурагъанлагъа эмда Россейни Спорт тутушуудан федерациясыны башчысы Михаил Мамиашвилиге регионда спортну айнытыугъа этген къошумчулукълары, къайгъырыулары ючюн ыразылыгъымы билдирирге сюеме. Республикабызны жаш спортчуларына бу эришиу ёсерге, айтхылыкъ гёжефлени сынамларына юйренирге, спорт тутушуудан школгъа уа айныуунда алгъа барыргъа кюч береди. Къонакъларыбыз хош келсинле, эм кючлюле хорласынла!» - дегенди ол.
Михаил Мамиашвили уа Ата журтлу тутушууну айнытыуда Къабарты-Малкъарны магъанасы уллу болгъанын белгилегенди эмда спорт бла кюреширге сюйгенлеге субъектде къуралгъан онглагъа бийик багъа бичгенди. Спортчуланы Олимпиаданы эркин тутушуудан чемпиону Давид Мусульбес да алгъышлагъанды.
Эришиуню юсюнден айтханда, финалны 1/8 эм 1/4 кесеклеринде къытдыргъанла жапсарыу сермешлеге жиберилмегендиле. Жарым финаллада америкалы Уэбстер Филипп Кэннон Россейни чемпиону Иман Ганишев бла, Россейни чемпиону Анзор Закуев а Европаны чемпиону Курбан Шираев бла тюбешгендиле. Аладан финалгъа Анзор Закуев бла Филипп Кэннон чыкъгъандыла.
Сермешни аллында аланы тренерлери умутларыны юслеринден билдиргендиле. Алай бла америкалы спортчуну юйретген Брайан Вебстер россейли гёжеф бла сермеш тынч болмазлыгъын ангылагъанын, аны хорлар ючюн Филип кеси кючлюрек болгъан жерлени тап хайырланып, Анзорну арытыргъа керек болгъанын айтханды. Ол турнирни къурагъанлагъа хар не да тынгылы ётгени ючюн ыспас этгенди эмда биздеги атлетле кёп башха уллу эришиуледе кёргенлеринден къарыулу болгъанларын, быллай эришиулюк аланы барысыны да усталыкъларын ёсдюрюрге себеплик этгенин чертгенди.
Анзорну атасы, эркин тутушуудан тамата тренер Арсен Закуев да финалны аллында кёп-тюрлю сезим бийлегенин айтханды. «Сёзсюз, быллай кезиуде тынч тюйюлдю, бютюнда сермешге жашым чыгъарыгъын эсге алсакъ. Алай биз спорт бла эрттеден бери кюрешебиз, ол тынчлыкъсыз сезимледен къутулургъа болушады. Россейли, тыш къыраллы къонакъла бла ушакъла этгенме, ала барысы да бизде къуралгъан юйретиу-жарау этиу онгланы жаратхандыла. Къараучулагъа быллай халда, софитле, жарыкъ чыракъла да жанып ётдюрюлген турнирле сейир кёрюнедиле, бусагъатда эришиулени былай къурау Германияда, Америкада, башха къыраллада да кенг жайылыпды. Бизде да ол жерин табарыкъ, жаш адамланы тутушуугъа келирге кёллендирлик сунама», - дегенди ол.
Филипп 22-жыллыкъ спортчуду, алай болгъанлыкъгъа, абаданланы араларында панамерикан чемпионатда кюмюш майдалны алгъанды. Анзор да Россейде, андан тышында да саугъасыз хазна къалмайды. Анга кёре уа лиганы ахыр сермеши къыйын, къызыу да ётгенди. Жарсыугъа, Анзор ачыгъанды, болсада, аягъына чып тюшгенине къарамай, жерлешибиз хорламны ычхындырмагъанды. Энди аны, башда сагъыннганыбызча, Заурбек Сидаков бла чемпион бел бау ючюн тюбешиу сакълайды. Эсигизге салайыкъ, Заурбек бел бауну лиганы Ташкентде ётдюрюлген кезиуюнде алгъанды, аны ючюн ол Япониядан дунияны чемпиону Кот Такахашини хорлагъан эди.
Кульчаланы Зульфия.
