Къабарты-Малкъарда бешкюнлюк аскер-патриот жыйылыула башланнгандыла. Бу жол алагъа республикадан беш мингден аслам адам къатышады - асламында школчула.
Бюгюнлюкде окъуна мингден артыкъ школчу эмда орта профессионал билим берген юйлени окъуучулары Нальчикде бла Терк районда базалада энчи программагъа кёре хазырлана турадыла. Программа башланнган аскер хазырлыкъгъа, низамлыкъгъа, башхала ючюн къайгъырыргъа, бир бирге билеклик этерге юйретеди.
Насийхатчыла сабийлени батыр болургъа, Ата журтну сюерге, анга кертичи болургъа талпындырадыла. Аланы башчылыкъларында жыйылыулагъа къатышханла аскер ишни теория мурдорларына тюшюнедиле, патриот оюнлагъа къошуладыла, пилотсуз аппаратланы учурууну баш жорукъларына, жер-жерледе ажашмауну, биринчи медицина болушлукъ бериуню амалларына юйренедиле.
Жаш адамланы хазырлаугъа энчи аскер операцияны ветеранлары да къатышадыла. Ала жашчыкъланы бла къызчыкъланы тенглерини алларында жууаплы болургъа,республиканы бла къыралны инсанлары болгъанларын сезерге, аланы тарыхларына бла къоруулаучуларына хурмет этерге юйретедиле, деп билдириледи КъМР-ни Жаш тёлюню ишлери жаны бла министерствосуну сайтында.
