«Урысей зэкъуэт» политикэ партым и Къэбэрдей-Балъкъэр къудамэм и Iуэху­щIапIэм лъэIукIэ зы­хуэ­зы­гъэ­захэм яIущIащ УФ-м и Къэрал Думэм и депутат Щхьэгуэш Адэлбий. Республикэм и цIыхухэм партым зыкъыхуагъэзащ я псэуныгъэр егъэфIэ­кIуэ­ным, узыншагъэр зэфIагъэувэжыным текIуэдэну ахъшэ зэрамыIэм, лэжьыгъэ Iуэхухэм, нэгъуэщIхэми теухуауэ. 

Республикэм и цIыху­хэм яIущIэным ипэ къихуэу Щхьэгуэшым жэуап иритащ журналистхэм я упщIэ­хэм. Ахэр теухуат цIыхухэр къы­зытекIухь щхьэусыгъуэ­хэм, зыбжанэрэ зыдэ­Iэпы­къуа­хэм я гъащIэр зэры­зэ­теу­вам, къэралым ще­кIуэ­кIыну политикэ Iуэху­гъуэ нэ­хъыщ­хьэм – хэхыныгъэхэм. 
- ЦIыхухэм я псэуныгъэм теухуауэ зыкъытхуагъазэ щIэх­-щIэхыурэ. Ноби ды­щIы­зэIущIэр ди цIыхухэм защIэдгъэкъуэну, дадэ­Iэ­пы­къу­ну, мурадхэр ящIы­ным тедгъэгушхуэну, гуапагъэ гуэр зыхедгъэщIэну аращ. Пэжым ухуеймэ, Iуэ­ху зы­къомыр онлайн жып­хъэм тету зэфIыдогъэкIыф. Интернет зэпы­щIэныгъэм ап­хуэдэ IэмалыфIыр къыдет. Ауэ щыхъукIи, мып­хуэ­дэу цIыхухэм дахуэзэным, гу­лъы­тэ яхуэт­щIыным, деп­сэлъэным мы­хьэнэшхуэ иIэщ. Ахэр зыгъэгузавэр, я Iуэху зытетыр, я хэкIыпIэн­ша­гъэр зэрызы­хэт­щIэр ялъа­гъумэ, Iуэхуу зыз­ра­пщытхэм нэхъ тегуш­хуэу си гугъэщ.
Нобэ дэIэпыкъуныгъэ хуэ­ныкъуэу зыкъытхуэзыгъэзахэр цIыхуипщI мэхъу. Узын­шагъэ, псэуныгъэ Iуэ­хум ехьэлIащ я лъэIухэр. ТелефонкIэ е видеозэпыщIэ­ны­гъэкIэ махуэ къэс Iуэху­хэр зэфIэдгъэкI пэтми, мып­хуэдэ ди зэIущIэхэр зэрыхъу­кIэ нэхъыбэ тщIыну ды­хуейщ. «Онлайну зы­зэ­ры­нып­хуэдгъэзэфыр хъар­зы­нэщ, итIани, дыпIущIэу ды­нопсэлъэну дыхуейт» жа­Iэ языныкъуэхэм. Зы­къыт­хуэзыгъазэхэм къахокI етI­уанэу, ещанэу ды­зы­дэIэ­пыкъу. Псалъэм пап­щIэ, я лъэIур узыншагъэ Iуэ­хум теу­хуамэ, абыхэм ди гупэр яхуэгъэзащи, дгъэ­щIэхъур­къым. 
Экономикэ, спорт, щэнхабзэ, егъэджэныгъэ, гъуазджэ Iуэхугъуэхэм теухуауэ нэ­гъуэщI республикэхэм зед­гъапщэмэ, гу лъыдотэ ди деж зэхъуэкIыныгъэфI­хэр­ зэрыщыщыIэм. Респуб­ликэм и унафэщIхэм ягъэбелджылыфащ экономикэм зегъэужьыным тещIы­хьа бгъэ­ды­хьэкIэ тэмэм, - жиIащ Щхьэгуэшым. 
Мыгувэу къэралым ще­кIуэ­кIыну хэхыныгъэхэми теп­сэлъыхьащ депутатыр. КъызэрыхигъэщамкIэ, по­ли­тикэ Iуэхугъуэ нэхъыщ­хьэм хэтынущ дзэ Iуэху хэхам ­къулыкъу щызыщIэ куэ­д. 
- ЩIыналъэ зыкъомым щыщщ дзэ Iуэху хэхам хэту депутат хъуну хуейуэ зыкъэзыгъэлъагъуэхэр. Абы­хэм сцIыхухэри яхэтщ, сыту жыпIэмэ, дзэ Iуэху хэхам щыIэ ди щIалэхэм я деж ды­щыкIуэкIэ, я Iуэху зытетым дыщIэупщIэ хабзэщ. Депутат хъуну хуейхэр хэти Урысейм и ЛIыхъужьщ, хэти а зэпэщIэувэныгъэм хахуэу хэтщ, хэти дзэ Iуэху хэхам щы­Iэхэм сыт и лъэныкъуэ­кIи защIэзыгъакъуэ волонтёрхэщ. Депутатхэм я иужь­рей зэхуэсыгъуэм къриубы­дэу унафи 150-рэ къащтащ дзэ Iуэху хэхам хэтхэм ятеухуауэ. Къыхэзгъэщыну сы­хуейщ абы и IуэхукIэ «Хэкум и хъу­ма­кIуэхэр» фондым и республикэ къудамэр лъэщу зэрылажьэри. Мыбдеж Iуэ­хур зытетыр дзэ Iуэху хэхам гугъу щехьахэм, зи узын­шагъэ щекIэкIуахэм, лIыгъэ­щIапIэ щихуахэм ядэ­Iэпы­къуным и закъуэкъым. Нэхъыщхьэжыр дзэ Iуэху хэхам зи бэшэчагъэрэ лIыгъэрэ ипсыхьахэм, зи хэку лъагъу­ныгъэр къэзыгъэлъэгъуа­хэм IуэхуфIкIэ уа­щыгугъ зэ­рыхъунур жы­ла­гъуэм гурыбгъэIуэнырщ,- жиIащ Щхьэгуэшым. 
ШабзэкIэ уэнымкIэ Урысейм и гуп къыхэхам хэт КIыщ Ахьмэд «Урысей зэ­къуэт» партым зыхуигъэзащ лэ­жьыгъэ IуэхукIэ. ЩIалэм и узыншагъэм сэкъат иIэ пэтми, илъэс 13 хъуауэ шабзэкIэ уэнымкIэ спортым зы­хуегъасэ, зэпымыууэ зэпе­уэ­хэм макIуэ, ехъулIэныгъэ­хэр зыIэрегъэхьэ. Ахь­мэд Къэ­рал Думэм и де­путатым жриIащ и ехъулIэныгъэхэр зыхуэдэр, иджыб­лагъэ Кавказ Ищхъэрэм щекIуэкIа ­зэпеуэм япэ увыпIэр къы­зэрыщихьар, Урысейм и апхуэдэ зэ­хьэзэхуэшхуэм зэ­рыхэтар. Мы зэманым ар ­КъБКъУ-м и студентщ, прикл­адной математикэмкIэ къудамэм и ещанэ курсым щоджэ. Ахьмэд жиIащ сайт зэхэгъэувэным зэрыхи­щIыкIыр, апхуэдэу игъэ­зэ­щIа зы лэжьыгъэм универ­си­тетым щезыгъаджэхэр къы­зэрыщытхъуар икIи при­к­ладной математикэ, ин­форматикэ Iуэхум тещIыхьауэ лэжьыгъэ IэнатIэ иIэным зэрыщIэхъуэпсыр. Щхьэгуэш Адэлбий щIалэм жри­Iащ пщIэкIэ сайт зэхригъэувэу еплъыну зэрыхуейр­, унэм щIэсу игъэзэщIэн лэ­жьы­гъэ къызэрыхузэрагъэ­пэщынур.
Ныкъуэдыкъуагъ зиIэ зы бзы­лъхугъэм Щхьэгуэш Адэл­бий зыхуигъэзащ ­мы­лъ­кукIэ къыдэIэпыкъуну. Абы и унагъуэм зришэлIэжащ я благъэ цIыхубз ны­къуэды­къуэр икIи абы кIэ­лъып­лъыным, медицинэ Iуэхутхьэбзэхэр хуэщIэным текIуа­дэ мылъкур яхуримыкъуж хъуащ, министерствэм хуигъэува дэIэпыкъуныгъэри къо­­мэщIэкI. Щхьэгуэш Адэл­бий зыкъыхуэзыгъэзам фIыщIэ хуищIащ езым и узыншагъэр мыщIагъуэ пэтми, и благъэм гущIэгъу зэ­ры­хуищIым, абы и Iуэхум зэрытезэкIухьым папщIэ. ИкIэщIыпIэкIэ зи гугъу ищIа дэ­Iэпыкъуныгъэр зэ­ры­Iэ­ры­хьэнури жриIащ.
Нэ­гъуэщI зы цIыхухъу «Урысей зэкъуэ­тым» и егъэ­блэгъапIэм ­кIуащ, и узыншагъэм зэры­ригъэIэзэну ахъшэ къратыну щIэлъэIуу. Ар илъэс ипэ Москва узыншагъэ IуэхукIэ щыIащ, медицинэ Iуэхутхьэбзэу къы­хуащIахэр сэбэп къыхуэ­хъуащ. Мы махуэхэм тригъэзэн хуейщ. Абыи Щхьэ­гуэшым жриIащ и лъэ­Iур зэрыхуагъэзэщIэнур, и узыншагъэр ефIэ­кIуэжынуи ехъуэхъуащ. 
Щхьэгуэш Адэлбий гуапэу яIущIащ гуныкъуэгъуэ яIэу зыкъыхуэзыгъэзахэм. Дэтхэ­нэ лъэIури зэхищIыкIащ, хэ­кIыпIэу щыIэхэр къигъэ­лъэ­гъуащ, чэнджэщ яритащ. 
Тхыгъэри сурэтри ГУГЪУЭТ Заремэ ейщ.