Къабарты-Малкъар Республиканы школларында ахыргъы къонгуроула зынгырдап бошагъандыла, ала бла бирге газ бла жалчытыучула бардыргъан къоркъуусузлукъ жаны бла жумушланы кезиую да жабылгъанды, - деп белгилегендиле «Газпром межрегионгаз Нальчик» биригиуден.

Битеу окъуу жылны ичинде республиканы газ компанияларыны къуллукъчулары билим бериу учреждениялагъа келип, сабийле бла эм магъаналы затланы юсюнден сёлешгендиле: юйдеги газ оборудованияны къоркъуусуз къалай хайырланыргъа керекди, табийгъат кёк отлукъ къайдан чыгъады эмда бизни юйлерибизге къалай жетеди.

Дерследе школчула газны чыгъарыуну кезиулерини эмда регионнга отлукъну бир тюрлю тыйгъыч болмай жибериуню юсюнден билип къалмай, бу бёлюмде сейирлик усталыкъла бла да шагъырейленнгендиле. Ким биледи бара-баргъан заманлада бу сабийлени арасында урунуу жолларын инженер эмда техник усталыкъла бла байламлы этерге сюйгенле чыкъсала да.

Алай бла окъуу жыл башланнганлы бери мектепледе 58 тийишли дерс бардырылгъанды, алагъа кёп къалмай юч минг сабий къатышханды — школгъа дери билим берген учреждениялагъа жюрюгенледен башлап выпускниклеге дери. Жыл сан  къауумларына кёре специалистле энчи форматла хазырлагъандыла: сейирлик видеола кёргюзтгендиле, интерактив ишле бергендиле — алай бла билим тынч эмда зауукълу халда сингдирилгенди.

Бу магъаналы иш ючюн педагоглагъа эмда газчылагъа ыспас этебиз: сабийле къоркъуусузлукъну юсюнден не къадар кёп билселе, бизни келир заманыбыз да ол къадар тынч эмда ышаныулу боллукъду, дегендиле компанияда.

Улбашланы Мурат.