Нальчик шахарны биринчи номерли поликлиникасында КъМР-ни Саулукъ сакълау министерствосуну коллегиясыны жыйылыуу болгъанды. Аны ишине КъМР-ни Башчысы Казбек Коков къатышханды.
Коллегияда озгъан жылда эм 2026 жылны биринчи кварталында тамамланнган ишле сюзюлгендиле, энчи эс «Узун эм тири жашау», «Юйюр» миллет проектлеге берилгенди. Бу программалагъа кёре кёрюмдюле бла бизни республика Россейде бек игилени онуну санына киргенди. Сёз ючюн, арт жылланы ичинде жашауну узунлугъу 78 жыл болгъанды – бу кёрюмдю Россейде бизни алтынчы жерге чыгъаргъанды. Демография жаны бла да республика иги айныйды. Халкъны саны шёндюгю дунияда къыралны кючюне шагъатлыкъ этген шартладан бириди.
Коллегияда жаланда жетишимлени юсюнден бармагъанды хапар, къыйын проблемала да сюзюлгендиле. Аладан бири инсультладан бла инфарктладан ёлюмдю, ол да бир кесек азайгъанды. Республикада саулукълу жашауну (ЗОЖ) сайлагъанла, тренажёр заллагъа жюрюгенле кёпдюле.
Ремонт этилген неда жангыдан ишленнген медицина учрежденияны саны оналтыгъа жетгенди, бу иш жангыртыуну программасына кёре бардырылады. Кенжеде, Акъ-Сууда, Куба-Табада, Светловодскоеде, Красносельскоеде, Дейскоеде, Эски Черекде эм Тёбен Черекде жангы амбулаторияла эшиклерин ачхандыла. Онтёрт санитар автотранспорт эм отуз алты медицина аппаратура алыннганды. Дыгулыбгейде, Нартанда, Къашхатауда, Анзорейде тиширыулагъа консультация арала ачылгъандыла, ала шёндюгю излемлеге келишген аппаратура бла жалчытылыннгандыла.
Нальчикде бек уллу тюрлениуледен эм жетишимледен бири – биринчи шахар поликлиниканы къурулушу эм жашаугъа кийирилиую болгъанды. Бу медицина араны жери тогъуз минг квадрат метрди, анга кюндюз стационар бла энчиленнген арала киредиле. Поликлиникада бир жылгъа жыйырма минг эндоскопия тинтиуле бардырыргъа онг барды.
Бек магъаналы жетишимледен бири Республикалы клиника больницаны мурдорунда мычымай жетген медицина болушлукъну стационарыны ачылыуу болгъанды. Бу сынам Россейде бек игиге саналгъанды. Жарсыугъа, жоллада аварияладан сора ёлгенле кёпдюле. Бу болумну тюрлендирир ючюн, уллу иш бардырылады. Биринчиден, водительлеге излемле къатыракъ болгъандыла, жаяу жолоучула бла жарыкъландырыу иш бардырылады. Бек башы уа авариягъа тюшгенлеге медицина болушлукъну мычымай этиудю. Бусагъатда бизни республиканы сынамы Россейни башха регионларына да жайылады.
Андан сора да, Къабарты-Малкъар качествону менеджментин кийириуде да иги кёрюмдюлеге чыкъгъанды. Саусуз медицина учреждениягъа келгенден сора къаллай бир заманнга аны жарсыууна къарайдыла, сакъламай, терк окъуна специалистге тюшемиди, тынгылы аппаратураны хайыры бла тинтемидиле саулугъун – битеу бу затла энди тинтилген этедиле эм битеуроссей мардалагъа тийишли болургъа керекдиле. Росздравнадзор билдиргеннге кёре, Къабарты-Малкъар бусагъатда РФ-ни беш эм иги регионуна саналады, жыйырма бла беш медицина учреждение уа качествону эм къоркъуусузлукъну излемлерине келишедиле.
Коллегияда Казбек Коков тамамланнган иш ючюн жюрек ыразылыгъын билдиргенди, аны бла бирге жангы жумушланы белгилегенди: республикалы сабий больницаны инфекция бёлюмюне жангы мекям къошулургъа керекди, льготалагъа кёре дарманла бла жалчытыугъа ахча кёбюрек бёлюнюрюкдю, дагъыда медиклени иш хакълары да ёсерикди.
Коллегияда чертилгенди: СВО-гъа къатышханланы саулукъларына энчи эс буруллукъду. Аланы реабилитациялары къырал магъаналы ишди: санаторийледе багъыллыкъдыла, жылдан-жылгъа саулукълары тинтилип турлукъду.
Битеу докладлада да баш оюм бир эди: халкъны саулугъун игилендириу медиклени сыйлы борчларыды.
Байсыланы Марзият.
