Бу кюнледе Нальчикде Искусстволаны Шимал-Кавказ институтунда адабият тюбешиу къуралгъанды. Ол КъМР-ни, Къалмукъну да халкъ поэти Гуртуланы Салихге жораланнганды. Аны ишине  жазыучула, назмучула, журналистле да къатышхандыла. Ол санда Додуланы Аскер, Табакъсойланы Мухтар, Фатима Маржохова, Ботталаны Мухтар, Тенгиз Маржохов, Рахайланы Аминат эм башхала. Аладан  сора да, шахарны Билим бериу департаментини келечилери эм къауум мектепден малкъар тилден бла литературадан устазла. Терк районну Билим бериу управлениясындан да келген эдиле адамла. Салихни къаршы жууукълары да къошулгъандыла тюбешиуге.
Адабият ингирни жазыучу Къудайланы Фарида къурагъанды, бардыргъан да ол этгенди. Чынг алгъа ол бу ишге къатышыргъа Москвадан, Краснодар крайдан келген жазыучула Инна Силенок, Александр Петренко, Алёна Коссаковская бла жыйылгъанланы  шагъырей этгенди. Ызы бла Салихни литературагъа салгъан къыйыныны юсюнден айтханды.
Андан сора жазыучулагъа, журналистлеге сёз бергенди. Ала да кёп жылыу сёзле бла  Салихни эсгергендиле, аны бла къачан, къалай шагъырей болгъанларын айтхандыла, бир-бирле назмуларын да окъугъандыла. Инна Силенок, пианинода согъуп,  поэтни назмусуна жазгъан жырын эшитдиргенди.
Гуртуланы Салихни юсюнден хар сёлешген эм алгъа аны адамлыгъын эсгере эди. Ызындан аты иги бла айтылгъан да ол уллу насыпды. Салихни уа къайда да намысы, сыйы, даражасы бийик эди, мындан арысында да халкъны эсинде алай къаллыкъды.

Лейлун улу Х.