Урысейм и Президентым и полномочнэ лIыкIуэу Кавказ Ищхъэрэ федеральнэ щIыналъэм щыIэ Чайкэ Юрий лэжьыгъэ IуэхукIэ республикэм къэкIуащ.

КъБР-м и Iэтащхьэ КIуэкIуэ Казбек абы щыIущIам тепсэлъыхьахэщ республикэм  и социально-экономикэ зыужьыныгъэм деж­кIэ мыхьэнэшхуэ зиIэ Iуэхухэм, щIыналъэм щыIэ жылагъуэ-политикэ щытыкIэм.
Дызэрыт илъэсым и япэ мазищым кърикIуахэм къызэрагъэлъагъуэмкIэ, промыш­ленностым къыщIигъэкIым и индексыр проценти 109,3-рэ хъуащ, ухуэныгъэ лэ­жьыгъэхэм ейр проценти 103,9-рэ, сатууэ ящIыр проценти 104,8-рэ. Мэкъумэш IэнатIэм къыщалэжьар проценти 3,8-кIэ нэхъыбэщ. Республикэ бюджетым и хэхъуэр щIышылэм - мэлыжьыхьым къриу­быдэу, илъэс кIуам и апхуэдэ пIалъэм зэ­рыщытам нэхърэ проценти 8-кIэ нэхъыбэ хъуащ, езым и хэхъуэм щIригъэгъуащ процент 13-кIэ.
Къэбэрдей-Балъкъэрыр хэтщ ягъэзащIэ лъэпкъ проект 12-м, абыхэм трагъэкIуэдэну хухахар сом мелард 14,3-рэ мэхъури, мелард 11,7-р къэрал бюджетым къыхокI. Мы зэманым яухуэми, зэрагъэпэщыжми, зэIузэпэщ ящIми ухуэныгъи 140-м йолэжь, егъэджэныгъэ, узыншагъэр хъумэн, щэнхабзэ, спорт, гъуэгу, псэупIэ-коммунальнэ IэнатIэхэм хыхьэу.
Чайкэ Юрий Налшык щыщыIам къриу­быдэу зи щхьэ IуэхукIэ зыкъыхуэзыгъэзэну хуейхэми епсэлъащ. Абы щыхэплъащ ­КИФЩI-м щыпсэухэм къэралым и уна­фэ­щIым зэрызыхуагъазэ Iуэхухэм.
Къапщтэмэ, абыхэм ящыщт Налшык сабий сад щыухуэным, Черкесск къалэм щыщ, дзэ Iуэху хэхам хэтым и унэм газыр ешэлIэным хуэунэтIа лэжьыгъэхэр и кIэм нэгъэсыным, Мэхъэчкъалэ фэтэр куэду зэхэт и унэхэм ящыщ зыр къызыхуэтыншэу зэгъэпэщыжыным, Ставрополь щIыналъэм хыхьэ Предгорнэ муниципальнэ округым хиубыдэ, щIыпIэ мыхьэнэ зиIэ гъуэгур зыхуей хуэгъэзэным ехьэлIахэр. Зы­тепсэлъыхьа Iуэху псори зэрагъэзэщIэнум теухуа унафэхэр къащтащ, зыхуэфащэ IэнатIэхэм пщэрылъхэр ящищIащ.
Урысейм и Президентым и полномочнэ лIыкIуэу Кавказ Ищхъэрэ федеральнэ щIы­налъэм щыIэ Чайкэ Юрий а махуэ дыдэм ФIыщIэгуапэ тхылъхэр яритащ щIы­налъэм щыпсэухэу республикэм и жы­лагъуэ-по­литикэ, со­циально-экономикэ зыу­жьы­ны­гъэм хэлъ­хьэныгъэшхуэ хуэзы­щIахэм.
Апхуэдэ гулъытэ зыгъуэтахэм ящыщщ я IэщIагъэм зэрыхуэIэзэм, илъэс куэд хъуа­уэ хьэлэлу зэрылажьэм папщIэ ягъэлъэ­пIахэу «Ленинцы» гъэш комплексым и жэ­мыш Меньшаевэ Надеждэ, «Партнер» ООО-м и инженер нэхъыщхьэ Жамборэ Мухьэрбэч, къудамэм и унафэщI - дохутыр-сурдолог-отоларинголог Азаматовэ Элеонорэ, Шыд Хь. Т. и цIэр зезыхьэ курыт школ №2-м и пэщIэдзэ классхэм я егъэджакIуэ Мезенцевэ Любовь, «Урысейм и агрохимие къулыкъу» ФГБУ-м и унафэщI Беслъэней СулътIан сымэ.
КIуэкIуэ Казбек Чайкэ Юрий фIыщIэшхуэ хуищIащ Къэбэрдей-Балъкъэрым къызэ­рыкIуам, республикэм щыпсэухэм я дежкIэ мыхьэнэшхуэ зиIэ Iуэхухэр къазэрыди­Iыгъым, гулъытэ къазэрыхуищIым пап­щIэ.