Модельер-дэрбзэр Сэралъп Мадинэ и Арт-центрым щагъэлъагъуэ Сирием къиIэпхъукIыжа ди лъэпкъэгъу, УФ-м и СурэтыщIхэм я зэгухьэныгъэмрэ ЮНЕСКО-м гъуазджэхэмкIэ и дуней­псо ассоциацэмрэ хэт дыщэкI Сос­накъ Мухьэмэд и лэжьыгъэхэр.

Соснакъ Мухьэмэд Дамаск щыпсэу адыгэ унагъуэм къыщалъхуащ. Хэку­жьым пэIэщIэми, и адэ-анэм ар адыгэ хабзэмрэ щэнхабзэмрэ щIапIыкIащ. Мухьэмэд 2000 гъэм Къэбэрдей-Балъкъэр къэрал мэкъумэш академием щIэтIысхьэри, инженер IэщIагъэр иIэу къиухащ. Адыгэ щэнхабзэм ар щыдихьэхыпар Сирием игъэзэжа нэужьщ. Бзылъхугъэ лъэпкъ фэилъхьэгъуэхэм щIыгъу хьэпшыпхэм я дахагъэм щитхьэкъум, абы зрипщытыну мурад ищIащ. Пасэрей адыгэ бгырыпххэм ятелъ­ тхыпхъэхэм ар нэхъри хуагъэушащ лъэпкъ тхыдэмрэ щэнхабзэмрэ иджыным. 
Мухьэмэд и лэжьыгъэхэм адыгэ теп­лъэ зэраIэмрэ лъэпкъ IуэрыIуа­тэм ижь къазэрыщIихуамрэ къадэкIуэу, дуней псом щикъухьа ди лъэпкъэгъухэр дэнэ щIыпIэ къыщыхутами, пасэрей хабзэр ди нобэм къызэрахьэсыфам и нэ­щэнэу тхыдэ лъэмыжым урагъэплъэж. Гъэлъэгъуэныгъэм хагъэхьащ адыгэ цIыхубз фащэхэм ящIыгъу бгырыпххэр, бгъэIулъхэр, пхъэм, гъущIым, нэгъуэщI­хэм къыхэщIыкIа хьэпшыпхэр. ГъэщIэ­гъуэнщ пасэрей адыгэ щэнхабзэмрэ IуэрыIуатэмрэ я дунейм ухэзышэ ажэ­гъа­фэхэм къагъэсэбэпу щыта нэкIуIупхъуэхэр зэрищI щIыкIэри. Адыгэ тхы­дэмрэ щэнхабзэмрэ зи лъабжьэ лэжьыгъэхэм удамыхьэхынкIэ Iэмал иIэкъым. Лъэпкъ бзылъхугъэ фэилъхьэгъуэхэм ящIыгъу хьэпшыпхэм, дыщэ-дыжьынхэкIхэм я дахагъэр къыпхуэмыIуэтэнщ. Иджырей зэманым декIуу Соснакъым къигъэщIэрэщIэжа, щIэупщIэ зиIэ лэ­жьыгъэхэри и мащIэкъым. Ахэр щыхьэт тохъуэ гъуазджэм гъунэ зэримыIэм. 
- Зэгуэр бзэри фIыуэ имыщIэу Налшык къэкIуауэ щыта Соснакъ Мухьэмэд и IэпщIэлъапщIагъэм зэман кIэщIым къриубыдэу езыр-езыру зэрыхигъэ­хъуар, зэрызиужьар узыгъэгуфIэщ. И лэжьыгъэхэм нэгъуэщIхэм я Iэдакъэ къыщIэкIахэм щумылъагъу гуэрхэр къызэрыщигъэсэбэпым, къыщыхъуа щIыналъэм щызекIуэ дуней лъагъукIэ зэриIэм гу лъумытэнкIэ Iэмал иIэкъым. И лэжьыгъэхэр зэманым зэрыдекIум къы­хэкIыу, пщащэхэм зэрахьэну яфIэфI дыдэщ. Мухьэмэдрэ сэрэ куэд щIауэ дызэдолажьэри, зэпымыууэ и Iэзагъэм зэрыхигъахъуэр си нэгу зэрыщIэкIым срогушхуэ. ДяпэкIи Тхьэм иригъэ­фIакIуэ, - жиIащ Сэралъп Мадинэ. 
- Мухьэмэдрэ сэрэ зэгуэр ды­теп­сэлъыхьат пасэрей хабзэмрэ классикэмрэ зи лъабжьэ иджырей гъуазджэ лэжьыгъэхэм тегъэщIэн зэрыхуейм, - жеIэ сурэтыщI Тхьэзэплъыж Руслан. – Мы гъэлъэгъуэныгъэр а гупсысэхэм я щапхъэщ. Абы и щыхьэтщ лэжьыгъэхэр къы­зыхэщIыкIари абыхэм я плъыфэри. Сэралъп Мадинэ игъэхьэзыра фэилъ­хьэгъуэхэм жэзым, гъуаплъэм, домбеякъым къыхэщIыкIа, зи плъыфэр нэхъ «щIауфа» цIуугъэнэхэр щыщIыгъужым деж, дахагъэм нэр етхьэкъу. Адыгэ хабзэмкIэ дыщэми дыжьынми я плъыфэр ящIыртэкъым нэм зыщIидзэу. Мухьэмэд а Iэмалыр ноби къызэригъэсэбэпыр уо­лъагъу. Кавказым ис IэпщIэлъапщIэхэм я лэжьыгъэхэр пасэрей адыгэ Iэпэ­Iэ­сэхэм ейм къащхьэщыкIырт икIи ар зи IэрыкIыр хэмыгъуащэу занщIэу къэп­цIыхурт. 

ТЕКIУЖЬ Заретэ.