КъМР-ни Парламентинде баш кюн республиканы шахарларындан бла районларындан 30-дан аслам жаш адам бла аланы устазлары жыйылгъан эдиле. Ала «Мени законла чыгъарыу  башламчылыгъым» конкурсда хорлагъанладыла. 
Жаш адамлагъа бла аланы илму таматаларына законла чыгъарыучу органны башчысыны орунбасары Мурат Карданов, Билим бериу, илму, физкультура, спорт эм жаш адамланы ишлери жаны бла комитетни таматасы Нина Емузова, Миллетле аралы болумла жаны бла комитетни экинчи башчысы, Урунуу, социал политика, саулукъ сакълау эм ветеранланы ишлери жаны бла комитетни  таматасыны орунбасары Владимир Безгодько, Маданият, граждан обществону айнытыу эм информация политика жаны бла комитетни башчысы Текуланы Амырбий алгъышлагъандыла. Тюбешиуню аллында уа окъуучуланы Парламентни  мекямы бла шагъырейлендиргендиле. 
 Мурат Карданов, школчуланы алгъышлай, конкурс 2005 жылдан бери бардырылгъанын, быйыл а анга илму ишлерин 59 жаш адам ийгенин, ала школланы тамата классларыны, орта эм бийик профессионал билим берген учрежденияланы окъуучулары болгъанларын билдиргенди. Нальчик, Прохладный шахарланы бла Прохладна, Чегем районланы школчулары бютюнда тири болгъанларын чертгенди. 
- Конкурс жаш адамланы политикагъа сейирлерин къозгъар мурат бла бардырылады. Хар жылдан да анга сейир ёсгенин белгилерчады.  Жаш адамла сайлагъан соруула уа ёсюп келген  тёлю кемчиликлени, жетишмеген затланы кёргенлерине шагъатлыкъ этедиле. Бюгюн а биз 30 жаш адамны бла аланы  устазларын, ала уа 23-дюле, саугъаларгъа сюебиз,-дегенди Мурат Наусбиевич. 
Нина Емузова уа илму ишле тынгылы болгъанларын, хар секцияда бек аздан 5-10 соруу тинтилгенин   белгилегенди. 
- Алада шёндюгю заманда артыкъда магъаналы соруула кётюрюлгенлери къууандырады.  Алгъын илму ишни  башха адамдан кёчюргенлерине бла къалгъанларына ишекли болургъа да тюшгенди, алай ахыр заманда уа жаш адамла кеслерини акъылларын, оюмларын базыныулу билдиргенлерин айтыргъа сюеме. Ким биледи, сизни башламчылыкъларыгъыз законнга бурулуп да къалырла, - дегенди ол.
Ызы бла саугъалау башланнганды. Быйыл конкурс 12 бёлюмде бардырылгъанды: къырал къурулуш эм инсанны конституциялы эркинликлеринден башлап, къоркъуусузлукъгъа, экономиканы айнытыугъа, жашау журт-коммунал мюлкге, информация политикагъа дери да  соруула бар эдиле. Аладан 8 илму тинтиу - биринчи, 9-су  - экинчи, 13-сю уа ючюнчю жерлеге тийишли болгъандыла. 
Биринчи дипломну алгъанланы араларында Беппайланы Алийхан  да барды. Ол Яникойну Байсолтанланы Алим атлы орта школуну 10-чу классыны окъуучусуду. Алийханны илму тинтиую тукъумланы тарых къалаларын сакълауну закон  бла бегитиуге  аталгъанды. 
Чегем шахарны 3-чю номерли орта школуну 9-чу классыны окъуучусу Шауаланы Тамерлан а «Экономика политика» бёлюмде экинчи жерге чыкъгъанды. Ол товарлагъа экология белги салгъанда этилген бузукълукъла ючюн административ жууаплылыкъны кючлендириуню  амалларын ачыкъ этгенди. 
Жаболаны Амелия уа эм къыйын бёлюмню сайлагъанды: жашау журт-коммунал мюлк. Ол Жаш тёлюню бла сабийлени чыгъармачылыкъларыны къаласына жюрюйдю. Роман Контроин бла бирге республиканы жашау журт-коммунал комплексини ишин игилендириуню мадарларын излегендиле. 
Ызы бла биринчи жерлеге чыкъгъан жаш адамла  жыйылгъанланы   проектлери бла шагъырей этгендиле. 
Саугъалаудан сора Мурат Карданов жаш тинтиучюлени, аланы илму таматаларын бла ата-аналарын энтта бир кере алгъышлап, жангы жетишимле тежегенди. 
Тюбешиу бирге суратха тюшюу бла бошалгъанды.

Токъланы Фатима.