Кёп болмай Къабарты-Малкъар къырал аграр университетни келечилери Чегем шахарны 5-чи номерли мектебинде 8-чи–10 -чу классланы окъуучулары бла тюбешгендиле. Бу жол анга сынамлы  преподавательле  Ахматланы Мадина, Черкесланы Солтан, Андзор Болотоков,  Асият Назарова, Марина Шогенова эм Индира Микитаева къатышхандыла. 
Тюбешиуню магъанасы жаш адамлагъа усталыкъ сайларгъа эм ызы бла жетишимли урунургъа  болушургъады. Алай бла жаш адамла бла ачыкъ ушакъ къуралгъанды. Тамата классланы окъуучулары  эл мюлк бёлюм бла байламлы иги кесек соруу бергендиле,    агропромышленный комплексге аслам эс  бургъандыла. Бюгюнлюкде къаллай усталыкълагъа сурам уллу болгъанын, жетишимли урунурча онгланы эм башха затланы юслеринден да  билирге сюйгендиле. 
Къонакъла бийик билим берген окъуу юйде къаллай бёлюмле болгъанларыны, окъутуу къалай баргъаныны, сынамларын кючлер ючюн, не онгла къуралгъанларыны, агрокласслада окъугъанлагъа  вузну жанындан  къаллай себеплик этиллигини юслеринден да тынгылы хапар айтхандыла.   
Ахырында  университетни келечилери быллай тюбешиуле арада жууукъ байламлыкъ къуралырына ахшы себеплик этгенлерин, жаш адамлагъа эм окъуу юйге да хайырлы болгъанларын   белгилегендиле. 

Магометланы 
Сулейман.