Быйыл 15 майда Совет Союзну Жигити Байсолтанланы Алим туугъанлы 107 жыл толгъанды. Аны бла байламлы миллетибизни атын айтдыргъан уланны музейине байрым кюн кёп адам жыйылгъан эди. 
Алагъа Байсолтан улуну къарындашларындан туугъанла Мухтар бла Ануар эм эгечи Азинат тюбеген эдиле.  
Келгенле жигитни эсгертмесине гюлле салгъандыла, дууа тутдургъандыла. Тюбешиуде сёлеше, «Бирлик» жамауат биригиуню башчысы Сумайланы Ахмат, Байсолтан улу халкъыбызны атын бийик даражагъа кётюрген уланладан болгъанын чертип, миллетибиз бар къадарда, аны аты ёмюрде да унутулмазлыгъын айтханды.  
Байсолтанланы Мухтар келгенлеге энчи жюрек ыразылыгъын билдиргенди. Ызы бла Ахмат Харунович къарындашыны аты ёмюрлеге сакъланырча этиу ишге уллу къыйын сала келген Азинат Юсюповнагъа биригиуню ыспас къагъытын саугъалагъанды. Ол да миллетибизни келечилери былай  келип, Жигитни эсгергенлерине ыразылыгъын билдиргенди. 
Андан сора музейге Нальчикни Байсолтан улуну атын жюрютген 19-чу номерли школуну окъуучулары директорлары Ирина Темрокованы башчылыгъында келгендиле. Алагъа Яникой элни школчулары да къошулгъан эдиле. Къонакълагъа Байсолтанланы тукъумну адамлары тюбегендиле. 
Сабийлени музейде болгъан затла бла шагъырей эте, Байсолтанланы Азинат бюгюннгю тёлю ол жигитлени атларын унутмазгъа борчлу болгъанларын чертгенди. Нальчикчи школчула уа Алимге жораланнган назмуланы айтхандыла эм аны 100-жыллыгъына жазылгъан жангы жырны орус тилде жырлагъандыла. 
Тюбешиу  бирге суратха тюшюу бла бошалгъанды. 

Таппасханланы Аминат.