КъМР-ни Жарыкъландырыу эмда илму министерствосунда бу кюнледе  Билим бериу учрежденияланы мекямларына тынгылы ремонт этиу ишлени бирге тийишдириу эмда алагъа контроль этиу жаны бла комиссияны жыйылыуу болгъанды. 
Аны башлай, КъМР-ни Правительствосуну Председателини орунбасары, комиссияны таматасы Марат Хубиев былтыр бла быйыл билим бериу учрежденияланы, сабий садланы да иги кесеги тап халгъа келтирилгенин, жангылары да хайырланылыргъа берилгенлерин эсгертгенди. Болсада алыкъа кёп окъуу юйлени, сабий садланы да жангыртыргъа керек болгъанын чертгенди.
Ызы бла КъМР-ни жарыкъландырыу эмда илму министрини орунбасары  Екатерина Мисостова сёлешип, 2025 жылда билим бериу учреждениялагъа тынгылы ремонт этиу эмда аланы керекли оборудование бла жалчытыу къалай баргъаныны юсюнден билдириу этгенди.  «Билим бериуню айнытыу республикада эм магъаналы къырал жумушладан бирине саналады. Бюгюнлюкде ёсюп келген тёлюге окъургъа, аны юйретиуге тынгылы онгла къурау – регионну ырахатлы эмда монглу келир заманыны мурдоруду», – дегенди ол.
Министерствону къуллукъчусу айтханыча, 2025 жылдан башлап билим берген организацияланы мекямларын тапландырыу «Жаш тёлю эм сабийле» эмда  «Юйюр»  миллет проектлеге кёре бардырылады. Алай бла республикада 2025 жылда 19 мекямгъа тынгылы ремонт этилгенди. Алагъа  битеу да 1 632 563,28 сом къоратылгъанды. Ол ахчадан жангыртылгъан мекямлагъа керекли оборудование алыннгъанды. 
Екатерина Мисостова быллай шартланы да туура этгенди: республикада мектепге дери билим берген учрежденияла 305 боладыла, алагъа 53 685 сабийге жер барды. КъМР-ни Правительствосуну оноуу бла  2030 жылгъа дери дагъыда  203 сабий садны тапландырыргъа белгиленеди. Быйыл да жангыртыу ишле 19 мекямда бардырыллыкъдыла. Аланы араларында битеулю билим берген окъуу юйлени общежитлери да бардыла. Ремонт ишлени кезиуюнде окъутуу тохтаусуз  бардырылады.
Битеу ол жумушланы КъМР-ни Жарыкъландырыу эмда илму  министерствосу дайым да контрольда тутады. Анга уа ата-анала да уллу болушлукъ этедиле. Ол иш къалай къуралгъаныны юсюнден Ата-аналаны жамауат контролюну штабыны башчысы Лилия Добросердова билдиргенди. Ол айтханнга кёре, окъуу юйлени, сабий садланы, башха билим бериу организацияланы мекямларында тапландырыу ишле тынгылы бардырылгъанларында, сабийлеге дерсле тийишлисича берилгендиле, садлагъа жюрютюр онгла къуралгъандыла. 
2026 жылда тапландырыу  ишле эмда мекямланы керекли затла бла жалчытыу къалай къуралгъанларыны, подряд организацияланы араларында конкурсну юсюнден да  КъМР-ни жарыкъландырыу эмда илму министрини орунбасары Мухамед Харзинов билдириу этгенди.
- 2026 жылны 13 майына тынгылы ремонт этиллик 54 объектге конкурс документация  жарашдырылгъанды. Тёрт объектде  КъМР-ни УФАС-на баргъан тарыгъыулагъа кёре экинчи кере конкурс къураргъа керек болуп турады. Аны бла байламлы 27 майда келишимге къол салыргъа белгиленеди, - деп, ол къайсы объектлеге жангыдан конкурс этиллигин да билдиргенди.
Мухамед Харзинов айтханнга кёре, быйылны бу кюнюне бюджет ахчаны 837 240,00 минг сому хайырланылгъанды. Ол а бёлюннген  ахчаны жаланда 22,2 процентиди. Билим берген учрежденияланы мекямларын жангыртыу, аланы керекли оборудование бла жалчытыу ишле мындан ары да тохтаусуз бардырыллыкъдыла.
Чыгъып сёлешгенлеге залда олтургъан подрядчикле соруула бергендиле, жууапларын да эшитгендиле. 
Ахырында Марат Хубиев комиссия къаты ишлегенин эмда анга киргенле ол тириликлери ёчюлмезлигине ышаннганын билдиргенди. Подрядчикле да  боюнларына алгъан борчну не къадар тынгылы эмда тап тамамларгъа кереклилерин эсге салгъанды. «Сиз ишлеген эмда жангыртхан мекямла сабийлерибизге деп этилгенлерин унутмагъыз, хар ишни да алагъа не къадар тап болурча тамамларсыз деп, бек ышанабыз», -  дегенди.

Холаланы Марзият.