Къабарты-Малкъарны Правительствосуну Председатели Мусукланы Алийни башчылыгъында бардырылгъан кенгешде къырал ырысхыгъа оноу этиу, билим бериу, саулукъ сакълау эмда инфраструктураны айнытыу жаны бла бир ненча магъаналы башламчылыкъгъа къаралгъанды. Аланы сюзюуге министерстволаны, ведомстволаны эмда жер-жерли администрацияланы башчылары бла келечилери да къатышхандыла.

Шимал Кавказда жашагъан миллетлени маданият хазналарын сакълау бла кюрешген Къабарты-Малкъарда «Исток» жамауат биригиуге регион магъаналы объектни хакъсыз бериуню дурус кёргендиле кенгешде. Сёз Нальчикде Ковтуненко атлы орамда орналгъан эски юйню юсюнден барады. Анда В.И. Ленинни нёгерлери Лепешинская Ольга Борисовна бла Лепешинский Пантелеймон Николаевич 1921 жылда жашап эмда ишлеп тургъандыла. Этилген оноуну чеклеринде ол жашау журтну сакълау эмда тап халгъа келтириу ишле бардырыллыкъдыла.
«Чайка» санаторийни бошуна тургъан мюлкюн КъМР-ни къырал иелигине алыргъа оноу этиледи. Аны бла ол энди экономика жумушлада хайырланыллыкъды. Дагъыда кеслери алларына учхан авиация системаланы айнытыу жаны бла регион программагъа тюрлениуле кийирилгендиле: 2025 жылда кёрюмдюле тийишдирилгендиле, 2030 жылгъа дери белгиленнген борчла эмда умутла да жангыдан тохташдырылгъандыла.
Бегимледен биринде жашау журт-коммунал мюлк эмда социал организацияланы келир кюзге эмда къышха хазырлауну юсюнден айтыла эди; аны бла байламлы тийишли умутла да къабыл этилгендиле.
Къырал орта билим бериу организацияланы тизмесинде тюрлениуле болгъандыла: энчи (коррекция) школ-интернатла бюджет угъай, казна халда ишге кёчюрюлгендиле. Саулукъларында чекленнген онглары болгъан сабийлеге аны хайырындан билим бериуню энчи халда къураргъа боллукъду.
КъМР-ни Правительствосу Москваны физика-технология институту (МФТИ) эмда Физтех-школа айнытыу фонд бла арада байламлыкъла жюрютюу келишимни проектин дурус кёргенди. Бирге ишлеу профильли классланы айнытыугъа, илму проектлени бардырыугъа, республиканы тюз эм табийгъат илмула жаны бла устазларыны усталыкъларын кючлендириуге бурулады.

Улбашланы Мурат.