Быйыл 15 майдан башлап Къабарты-Малкъарда зыбыр къалгъан-къулгъанланы кетериу жаны бла жангы регион оператор ишине киришгенди. Аны бла байламлы КъМР-ни къурулуш эмда ЖКХ министрини къуллугъун толтургъан Андрей Журавлёв ЦУР-да республикалы журналистлеге пресс-конференция бардыргъанды.
Алгъыннгы «Экологистика» регион оператор ишин кир-кипчикни айырып жыйыудан башлагъанын эсигизге салайыкъ. Аны борчун тийишлисича толтурмагъаны уа жангы жылны аллында элледе бла шахарлада кир-кипчик тёбеле бир да болмагъанча кёп жайылгъанларында толусунлай ачыкъланнган эди. Ол заманда Къабарты-Малкъарны Башчысы Казбек Коков «тюзюнлей эфирде» ол кемчиликни кетерирге сёз берген эди. Андан сора оператив штаб да къуралды, ол регионну оноучусу салгъан борчну толтуруу бла кюрешеди.
Андрей Журавлёв «Экологистика» бла этилген келишим 28 апрельде бошалгъанын, андан сора жангы регион операторну сайлау жаны бла конкурс ишле эки кере бардырылгъанларын да билдиргенди. Анга къатышханланы араларында аны излемлерине келишгенле табылмагъанлары себепли зыбыр къалгъан-къулгъанланы кетериу жаны бла регион операторну борчун «Экотехпром» муниципал унитар предприятияны боюнуна салыргъа оноу этилгенди.
Былайда бир затны эсгертирге тийишлиди: «Экотехпром» «Экологистика» компанияны «келечиси» тюйюлдю, аны себепли алгъыннгы регион операторну борчлары жангысына кёчмейдиле – «Экотехпром» МУП ишин жап-жангыдан башлайды. «Экологистика» уа 14 майгъа дери берилмеген тёлеулени излерикди. 15 майдан а кир-кипчик ючюн хакъны жангы операторгъа тёлерге тюшерикди. Тарифле алайлай къаладыла, аланы КъМР-ни Тарифле жаны бла къырал комитети тохташдырады. Организацияла, учрежденияла эмда предприятияла бла энчи келишимле этилликдиле – ала 7030 боладыла. Инсанла бла уа аллай кезиуледе жарашдырылгъанча келишимле тауусуллукъдула.
Бюгюнлюкде жангы регион оператор энчи автотехниканы арендагъа алгъанды, жууукъ заманлада техниканы жангы къауумун алыргъа белгиленеди. Ол санда уллу къалгъан-къулгъанлагъа сегиз кублу 50 бункер эмда кир-кипчикни ташырча да 5 автомобиль алынырыкъдыла. Ала уа элледе бла шахарлада, артыкъда жангы къурулушла баргъан жерледе жыйылыучу эски мебельни, къурулуш къалгъан-къулгъанланы ташыр ючюн керекдиле.
- Республиканы Башчысы энчи техниканы санын аз-аз кёбейте барыргъа керекди деп, аллай борч салгъанды, запасда да болурча, – деп чертгенди Андрей Журавлёв.
Ол айтханнга кёре, «Экологистика» энчи иели компания болгъанды эмда келишимге кёре ишлегенди. Жангы оператор бла иш башхады – ол муниципал предприятияды. Аны кир-кипчикни кетериу ишине, энчи техника бла жалчытылыууна да къаты контроль этилликди. Аны бла бирге уа зыбыр къалгъан-къулгъанланы кетериу жаны бла ишни тийишлисича бардырыргъа ахча болушлукъ этилирге да боллукъду.
Тёлеуле бла байламлы низамны юсюнден соруугъа жууап бере, министрни къуллугъун толтургъан регион оператор ишин чырмаусуз бардырыр ючюн, жамауат, предприятияла да аны жумушлары ючюн хакъны заманында тёлерге керекдиле, деп чертгенди. Арт юч жылны ичинде кир-кипчик ючюн тёлегенле 50 процентден озмай эдиле. Ол регион операторну ишинде кемчиликлени сылтауларындан бири болгъанды.
Сёз Урванда полигонну юсюнден да баргъанды. Андрей Журавлёв билдиргеннге кёре, КъМР-ни Правительствосуну эмда «Кир-кипчикни айырыучу завод» ООО бла этилген келишимге кёре, шёндюгю заманнга келишген полигонну проекти жарашдырылгъанды. Анга кир-кипчикни айырыучу завод, аны брикетлеге жыйгъан система эмда сууну тазалагъан сооруженияла киредиле. Проект Главгосэкспертизадан ётгенди. Энди битеу къыралда, ол санда Къабарты-Малкъарда да, быллай борч салынады – 2030 жылгъа къалгъан-къулгъанланы бек аздан 50 процентин басдырырча этерге. Къалгъаны уа жангыдан жарашдырылыргъа керекди.
- Биз Россей Федерацияны Правительствосундан тийишли документлени сакълап турабыз, иги кесек грант алыр ючюн кюреширге онг беририне ышанабыз. Алай болса, жылны ичинде жангы полигонну хайырланып башларгъа деп аллай борч салынады, – дегенди Андрей Журавлёв.
Юсюпланы Галина
хазырлагъанды.
